İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 309 Hüküm no: 205 Orijinal metin no: [42b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tüccârdan Bogos v. Artin’in ekmekçi fırını ve uncu değirmenindeki hisselerini Hacı Bogos v. Kigork’a satması ve devlete olan borçlarının ödenmesi Habbâz fırını mübâya‘ası Âsitâne-i sa‘âdet âşiyâne ve bilâd-ı selâse mahkemelerine bâ-fermân-ı âlî mine’l-kadîm merbût olan duhâncı gediklerinden mâ‘adâ gerek Dersaâdet ve gerek bilâd-ı selâse-i mezkûrede kâin ber-vech-i mülkiyet tasarruf olunmakda bulunan her nev‘ gediklerin mübâya‘a ve ikrâr-ı mülk ve hibe ve irsen intikāl misillü kâffe-i mu‘âmelâtı ve vukū‘ bulan muhâkemâtı münhasıran ve mahsûsan İstanbul Mahkemesi’nden icrâ ve iktizâ eden i‘lâm ve hüccet-i şer‘iyyeleri ancak mahkeme-i mezkûre tarafından i‘tâ olunmak ve gedikât ashâbının rızâ ve muvâfakatları olmadıkça kadîm mülk kirâları tezyîd olunmamak ve senedât-ı sahîha ve mu‘tebere ile ber-vech-i mülkiyet tasarruf olunmakda bulunan gediklerin müstakır oldukları mahalden ihrâc ve imhâsı zımnında mülk sâhibleri tarafından da‘vâya tasaddî olunur ise hükkâm-ı şer‘-i şerîf cânibinden istimâ‘ olunmaması bâlâsı tuğrâ-yı garrâ-yı cihân-bânî ile muvaşşah ve müzeyyen bir kıt‘a nizâmnâme ve bâ-fermân-ı âlî müesses olan nizâm-ı müstahsene iktizâsından bulunduğuna binâen vilâyet-i Anadolu’da medîne-i Erzurum’da vâki‘ Yenihân’da sâkin teba‘a-i Devlet-i aliyye’nin Ermeni milletinden ve tüccârdan Bamkertanoğlu Bogos v. Artin v. Adam tarafından husûs-ı âti’l-beyânda bâ-hüccet-i şer‘iyye vekîl olduğu her biri teba‘a-i Devlet-i aliyye’den ve tüccârdan Oğlugan Bogos v. Bedros ve Seferoğlu Karabet v. Ohannes şehâdetleriyle ber-nehc -i şer‘î sâbit olan mahmiye-i İstanbul’da vâki‘ Büyük Yenihân’da sâkin teba‘a-i Devlet-i aliyye’den ve Avrupa tüccârından Tokadlı Aslanoğlu Manuk v. Kerupe meclis-i şer‘-i şerîf-i hatîrde teba‘a-i Devlet-i aliyye’nin Ermeni milletinden ve ekmekçi esnâfı ustabaşılarından diğer Haci Bogos v. Kigork muvâcehesinde esnâf-ı merkūme kethüdâsı İbrahim Ağa b. Ahmed ile sâir mazbûtü’l-esâmî nizâm ustaları taraflarından mürsel vekîlleri Yiğitbaşı es-Seyyid İsmail Efendi b. Mehmed Emin hâzır olduğu hâlde bi’l-vekâle ikrâr-ı tâm ve takrîr-i kelâm edip mahrûse-i Galata’ya muzâfe kasaba-i Tophane’de Boğazkesen nâm mahalde vâki‘ Boğazkesen fırını demekle arîf ma‘lûmu’l-hudûd Şeyhülislâm-ı esbak Mîrzazâde merhûm es-Seyyid Mehmed Said Efendi Vakfı müsakkafâtından âhar Bogos v. İsador’un bâ-temessük-i mütevelli bi’l-icâreteyn taht-ı tasarrufunda olan şehriye yirmi guruş kirâlı bir bâb habbâz fırını ve fırın-ı mezkûre merbût karşısında kâin beş horosu ekmekçi ve bir horosu uncu ki cem‘an altı horoslu şehriye otuz guruş kirâlı bir bâb değirmen derûnlarında mevcûde beyne’l-esnâf gedik ta‘bîr olunur dört re’s bârgir uncu ve yirmi re’s bârgir ekmekçi ki cem‘an yirmi dört re’s bârgir ve onlara tâbi‘ sâir âlât-ı lâzime-i ma‘lûmenin iki re’s bârgir uncu ve on üç re’s bârgir ekmekçi ki cem‘an on beş re’s bârgir ve onlara isâbet eden âlât-ı sâiresi âharların yedlerinde mülkleri olup mâ‘adâ iki re’s bârgir uncu ve yedi re’s bârgir ekmekçi ki cem‘an dokuz re’s bârgir ve onlara îcâb eden âlât-ı sâiresi akd-i âti’z-zikrin sudûruna müvekkilim merkūm Bogos’un bin iki yüz altmış beş senesi Muharremü’l-harâmının on birinci ve on ikinci günleri târihiyle müverrahalar ve ol târihlerde Dârü’l-hilâfeti’l-aliyye kādısı olan sudûr-ı izâmdan Yahya Beyzâde İbrahim İsmet Beyefendi merhûmun imzâ ve hatmlarını hâviye işbu iki kıt‘a mübâya‘a hücceti ve kethüdâ-yı mûmâ-ileyhin takdîm eylediği bir kıt‘a ilmühaber mantûklarınca yedinde mülk ve hakkı olmağla ben müvekkilim merkūm Bogos’un âlât-ı gedik-i mezkûrdan ber-minvâl-i muharrer mâlik olduğu sâlifü’l-beyân dokuz re’s bârgir ve onlara îcâb eden âlât-ı sâiresi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ seksen yedi bin guruşa merkūm diğer Bogos’a bi’l-vekâle bey‘ ve temlîk ve vech-i lâyıkıyla teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra müvekkilim merkūm Bogos’un cânib-i mîrîye zimmetinde kırk iki bin guruş deyni olmağla ben semen-i merkūm seksen yedi bin guruşun kırk iki bin guruşunu deyn-i mezkûre mahsûben kabza memûruna edâ ve teslîm etmek üzere merkūm diğer Bogos’a bi’l-vekâle emr ve tarafımdan tevkîl eylediğimde ol dahi kabûl ve ber-vech-i meşrûh edâ-i deyne ta‘ahhüd edip semen-i merkūm seksen yedi bin guruşun mâ’adâsı olan kırk beş guruşu bana tamâmen def‘ u teslîm ben dahi yedinden bi’l-vekâle tamâmen ahz u kabz eyledim fîmâ-ba‘d sâlifü’l-beyân dokuz re’s bârgir ve onlara îcâb eden âlât-ı sâiresinde müvekkilim merkūm Bogos’un aslâ ve kat‘â alâka ve medhali kalmayıp merkūm diğer Bogos’un mülk-i müşterâsı ve hakk-ı sırfı olmuşdur dedikde gıbbe’t-tasdîk merkūm diğer Bogos meclis-i şer‘-i hatîrde bâ‘isü’l-kitâb kethüdâ-yı mûmâ-ileyh İbrahim tarafından husûs-ı âti’l-beyânda vekîl-i müseccel-i şer‘îsi esnâf-ı merkūme salıcılarından Ahmed Ağa b. Mehmed mahzarında ikrâr-ı tâm ve takrîr-i kelâm edip ben dahi ber-vech-i muharrer ânifen ve şirâen mâlik olduğum sâlifü’l-beyân dokuz re’s bârgir ve onlara îcâb eden âlât-ı sâireyi tarafeynden bi’l-îcâb ve’l-kabûl bâtten ve sahîhan bi-safkatin vâhidetin bâ-izn-i şürekâ seksen yedi bin guruşa müvekkil-i mûmâ-ileyh İbrahim Ağa için vekîl-i mezbûr Ahmed Ağa’ya bey‘ ve temlîk ve vech-i lâyıkıyla teslîm eylediğimde vekîl-i mezbûr Ahmed Ağa dahi müvekkil-i mûmâ-ileyh İbrahim Ağa için bi’l-vekâle ber-vech-i muharrer iştirâ ve temellük ve tesellüm ve kabz u kabûl eyledikden sonra benim cânib-i mîrîye zimmetimde kırk iki bin guruş deynim olmağla semen-i merkūm seksen yedi bin guruşun kırk iki bin guruşunu deyn-i mezkûre mahsûben kabza memûruna edâ ve teslîm etmek üzere müvekkili mûmâ-ileyh İbrahim Ağa’ya emr ve tarafımdan tevkîl eylediğimde vekîl-i mezbûr Ahmed Ağa dahi bi’l-vekâle kabûl ve ber-vech-i meşrûh edâ-i deyne ta‘ahhüd edip semen-i merkūm seksen yedi bin guruşun mâ’adâsı olan kırk beş bin guruşu bi’l-vekâle bana tamâmen def‘ u teslîm ben dahi yedinden tamâmen ve kâmilen ahz u kabz eyledim fîmâ-ba‘d sâlifü’l-beyân dokuz re’s bârgir ve onlara îcâb eden âlât-ı sâiresi müvekkil-i mûmâ-ileyh İbrahim Ağa’nın mülk-i müşterâsı ve hakk-ı sırfı olup benim aslâ ve kat‘â alâka ve medhalim kalmamışdır dedikde gıbbe. Fî 13 Safer sene 1279 Şuhûdü’l-hâl: Muhzır el-Hâc Salih Ağa b. ( ), Muhzır Mustafa Ağa b. ( ), Muhzır Şakir Ağa b. ( ), Muhzır Süleyman Ağa b. ( ), ve gayruhum