İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 311 Hüküm no: 206 Orijinal metin no: [42b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbulluoğlu Ohannes v. Serkiz ve havyarcı bakkalı esnâfından Petrekoğlu Nikola v. Tanaş’ın havyarcı dükkânındaki hisselerini Ürgüplü Mehmed Yesarî Efendi’ye satmaları Havyarcı mübâya‘ası Galata’da Kezâlik teba‘a-i Devlet-i aliyye’den ve poliçeci tâifesinden İstanbulluoğlu Ohannes v. Serkiz teba‘a-i Devlet-i aliyye’den havyarcı bakkalı esnâfından Petrekoğlu Nikola v. Tanaş hâzır olduğu hâlde meclis-i şer‘-i şerîf-i hatîrde mahmiye-i İstanbul’da Örücüler? nâm mahalde vâki‘ Kuşakçı Hânı’nda sâkin bâ‘isü’l-kitâb Ürgüplü Mehmed Yesarî Efendi b. Ömer mahzarında her biri teba‘a-i Devlet-i aliyye’den esnâf-ı merkūme kethüdâsı Maroşoğlu Vasil v. Kostandi tarafından mürsel vekîli esnâf-ı merkūme ustalarından Yovakim v. Kiryako ve esnâf-ı merkūme ustalarından Anderya v. Tanaş hâzır oldukları hâlde ikrâr-ı tâm ve takrîr-i kelâm edip mahrûse-i Galata hısnı ebvâbından Balık pazarı hâricinde kâin bir tarafdan Kazdağlı dükkânı demekle arîf Mustafa Ağa’nın havyarcı bakkal dükkânı ve bir tarafdan Anderya’nın Tenevvürcüoğlu dükkânı demekle arîf balıkçı dükkânı ve bir tarafdan leb-i deryâ ve taraf-ı râbi‘i tarîk-i âm ile mahdûd merhûm İbrahim Paşa müsakkafâtından olup esnâf-ı merkūmeden Yuvan v. Paskal’ın bâ-temessük-i mütevelli bi’l-icâreteyn taht-ı tasarrufunda olan senevî üç yüz on sekiz guruş kirâlı Angeli dükkânı demekle arîf bir bâb havyarcı bakkal dükkânı derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûmenin yüz yirmi sehm i‘tibârıyla yetmiş beş sehm hisse-i şâyi‘ası cennet-mekân adn-i âşiyân merhûm ve mağfiret-nişân Sultan Mahmud Hân-ı Sânî aleyhi-rahmetü men enzele seb‘a’l-mesânî hazretlerinin evkāf-ı celîleleri müstagallâtından âharların bi’l-icâreteyn taht-ı tasarruflarında ve yirmi sekiz sehm hisse-i şâyi‘ası ber-vech-i mülkiyet âharların yedlerinde mülkleri olup mâ‘adâ on sehm hisse-i şâyi‘ası benim ve yedi sehm hisse-i şâyi‘ası dahi hâzır-ı merkūm Nikola’nın işbu sene-i mübâreke Cumâdelûlâsının yirmi üçüncü günü târihiyle müverraha ve ol târihde Dârü’l-hilâfeti’l-aliyye kādısı olan sudûr-ı izâmdan semâhatlü Mehmed Arif Hilmi Efendi hazretlerinin imzâ ve hatmlarını hâviye işbu bir kıt‘a mübâya‘a hücceti ve kethüdâ-merkūmun takdîm eylediği bir kıt‘a ilmühaber mantûklarınca akd-i âti’z-zikrin sudûruna değin yedimizde mülk ve hakkımız olmağla ben âlât-ı gedik-i mezkûrdan ber-minvâl-i muharrer mâlik olduğum on sehm hisse-i şâyi‘a-i mezkûreyi bi-safkatin vâhidetin otuz bin guruşa ve hâzır-ı merkūm Nikola dahi kezâlik âlât-ı gedik-i mezkûrdan ber-vech-i meşrûh mâlik olduğu yedi sehm hisse-i şâyi‘a-i mezkûrenin dört sehm hisse-i şâyi‘asını yedinde bi’l-ibkā mâ‘adâ üç sehm hisse-i şâyi‘asını bi-safkatin vâhidtine dokuz bin guruşa tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ile bâ-izn-i şürekâ mezbûr Mehmed Yesarî Efendi’ye bey‘ ve temlîk ve vech-i lâyıkıyla teslîm eylediğimizde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semenleri olan cem‘an otuz dokuz bin guruşu tamâmen bize def‘ u teslîm biz dahi yedinden bi’t-tamâm ve’l-kemâl ahz u kabz edip mebî‘-i mezkûrların tağrîr ve gabnlarına müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik ba‘de’l-yevm âlât-ı gedik-i mezkûrun on sehm hisse-i şâyi‘a-i mezkûresinde benim ve üç sehm hisse-i şâyi‘a-i mezkûresinde hâzır-ı merkūm Nikola’nın aslâ ve kat‘â alâka ve medhalimiz kalmayıp cem‘an on üç sehm hisse-i şâyi‘ası mezbûr Mehmed Yesarî Efendi’nin mülk-i müşterası ve hakk-ı sırfı olmuşdur dedikde gıbbe’t-tasdîki’ş-şer‘î. Fî 26 Zilhicce sene 1278 Şuhûdü’l-hâl: Muhzır el-Hâc Yusuf Ağa b. ( ), Muhzır Feyzullah Ağa b. ( ), Muhzır Süleyman Ağa b. ( ), Muhzır Mehmed Ağa b. ( ), ve gayruhum