İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 312 Hüküm no: 207 Orijinal metin no: [43a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Oskohi bt. İstefan ve ekmekçi esnâfından Agasi v. Karabet’in françalacı fırını ve değirmenindeki hisselerini Nikola v. Hıristo’ya satmaları Françalacı fırını mübâya‘ası Kezâlik mahrûse-i Galata’ya muzâfe Ortaköy’de sâkine teba‘a-i Devlet-i aliyye’nin Ermeni milleti nisvânından Oskohi bt. İstefan v. Hazer’in zevci ve tarafından husûs-ı âti’l-beyânda vekîl olduğu zâtını bilürler her biri teba‘a-i Devlet-i aliyye’den mahmiye-i İstanbul’da vâki‘ Büyük Yenihân sarrâflarından Hamamcıoğlu Mircan v. Minas ve Ayak sarrâfı Papasoğlu Agop v. Mardiros şehâdetleriyle ber-nehc -i şer‘î sâbit olan teba‘a-i Devlet-i aliyye’den ve Avrupa tüccârından Pişmişoğlu Hoca Kirhor v. Karabet teba‘a-i Devlet-i aliyye’nin Ermeni milletinden ve ekmekçi esnâfından Agasi v. Karabet hâzır olduğu hâlde meclis-i şer‘-i şerîf-i hatîrde mahrûse-i mezkûrede Havyar hânında sâkin teba‘a-i Devlet-i aliyye’nin Latin tâifesinden olduğu bâ-ilmühaber mütehakkık olan tüccârdan bâ‘isü’r-rakīm Nikola v. Hıristo tarafından husûs-ı câi’z-zikrde tasdîka vekîl-i şer‘îsi teba‘a-i Devlet-i aliyye’den Yani v. Mihal muvâcehesinde esnâf-ı merkūme kethüdâsı İbrahim Ağa b. Ahmed ile mazbûtü’l-esâmî nizâm ustaları taraflarından mürsel Yiğitbaşı es-Seyyid İsmail Efendi b. es-Seyyid Mehmed Emin ile teba‘a-i Devlet-i aliyye’den ve esnâf-ı merkūmeden Haçador v. Babacan hâzır oldukları hâlde bi’l-vekâle ikrâr-ı tâm ve takrîr-i kelâm edip mahrûse-i Galata’da Yorgancılariçi nâm mahalde kâin bir tarafdan Doksanbeşoğlu Mehmed Ağa’nın menzili ve ba‘zen tütüncü dükkânı ve bir tarafdan el-Hâc Mahmud Ağa dükkânı ve tarîk-i âm ve tarafeyni yine tarîk-i âm ile mahdûd merhûmûn Rüstem Paşa ve el-Hâc Mehmed Reis ve Hoca Sinan ve Hekîm Kutbeddîn vakıfları müsakkafâtından benimle hâzırân-ı merkūmân Agasi ve Haçador’un taht-ı tasarrufumuzda olan şehriye otuz guruş kirâlı bir bâb françalacı fırını derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûmenin yüz yirmi sehm i‘tibârıyla on beş sehm hisse-i şâyi‘ası hâzır-ı merkūm Haçador’un yedinde mülkü olup mâ‘adâ altmış sehm hisse-i şâyi‘ası bin iki yüz altmış bir senesi Saferi’l-hayrının yirmi altıncı günü târihiyle müverraha ve ol târihde Dârü’l-hilâfeti’l-aliyye kādısı olan Paşmakçızâde es-Seyyid İbrahim Efendi merhûmun imzâ ve hatemini hâviye işbu bir kıt‘a hüccet-i şer‘iyye ve bin iki yüz yetmiş senesi Zilhicceti’ş-şerîfesinin yirmi ikinci günü ve bin iki yüz yetmiş bir senesi Saferi’l-hayrının dördüncü günü târihleriyle müverrahalar ve ol târihlerde Dârü’l-hilâfeti’l-aliyye kādısı olan sudûr-ı izâmdan merhûm Ahmed Şükrü Efendi merhûmun imzâ ve hatmleriyle mahtûme işbu bir kıt‘a hüccet-i şer‘iyye ve hâmişi mantûklarınca müvekkilem merkūme Oskohi’nin ve kırk sehm hisse-i şâyi‘ası dahi bin iki yüz yetmiş altı senesi şehri Rebî‘ülevveli’nin on sekizinci günü târihiyle müverraha ve ol târihde Dârü’s-saltanati’s seniyye kādısı olan Hüseyin Hulusi Efendi merhûmun imzâ ve hatemini hâviye işbu bir kıt‘a hüccet-i şer‘iyye mantûkunca merkūm Agasi’nin yedlerinde mülkleri ve fırın-ı mezkûr derûnunda kâin şehriye yirmi guruş kirâlı dört horoslu bir bâb françalacı değirmeni derûnunda mevcûde beyne’l-esnâf gedik ta‘bîr olunur on altı re’s bârgir ve onlara tâbi‘ sâir âlât-ı lâzime-i ma‘lûmenin iki re’s bârgir ve onlara isâbet eden âlât-ı sâiresi hâzır-ı merkūmHaçador’un yedinde mülkü olup mâ‘adâ sekiz re’s bârgir ve onlara îcâb eden âlât-ı sâiresi ber mantûk-ı hücec-i şer‘iyye-i mezkûre müvekkilem merkūme Oskohi’nin ve altı re’s bârgir ve onlara iktizâ eden âlât-ı sâiresi dahi hâzır-ı merkūm Agasi’nin yedlerinde mülkleri olmağla ben müvekkilem merkūme Oskohi’nin fırın gediği âlâtından ber-minvâl-i muharrer mâlike olduğu altmış sehm hisse-i şâyi‘asıyla değirmen gediği âlâtından dahi ber-vech-i meşrûh mâlike olduğu sekiz re’s bârgir ve onlara îcâb eden âlât-ı sâiresini safka-i vâhide ile kırk bin guruşa ve hâzır-ı merkūm Agasi’nin dahi fırın gediği âlâtından ber-minvâl-i muharrer mâlik olduğu kırk beş sehm hisse-i şâyi‘asıyla değirmen gediği âlâtından mâlik olduğu altı re’s bârgir ve onlara iktizâ eden âlât-ı sâiresini kezâlik bi- safkatin vâhidetin otuz bin guruşa tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve hâzır-ı merkūm Haçador’un izniyle bâ-ilmühaber müvekkil-i merkūm Nikola’ya bi’l-vekâle ve bi’l-asâle bey‘ ve temlîk ve vech-i lâyıkı üzere teslîm eylediğimizde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semenleri olan cem‘an yetmiş bin guruşu bize def‘ u teslîm biz dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnlarına müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî bi’l-asâle ve izâfetle bi’l-vekâle ibrâ vü ıskāt eyledik ba‘de’l-yevm fırın gediği alâtının altmış sehm hisse-i şâyi‘a-i mezkûresiyle değirmen gediği alâtının sekiz re’s bârgir ve onlara isâbet eden âlât-ı sâiresinde müvekkilem merkūme Oskohi’nin ve yine fırın gediği alâtının kırk beş sehm hisse-i şâyi‘a-i mezkûresiyle değirmen gediği alâtının altı re’s bârgir ve onlara isâbet eden âlât-ı sâiresinde hâzır-ı merkūm Agasi’nin aslâ ve kat‘â alâka ve medhalleri kalmayıp fırın gediği alâtının cem‘an yüz beş sehm hisse-i şâyi‘a-i mezkûresi ve değirmen gediği alâtının cem‘an on dört re’s bârgir ve onlara îcâb eden âlât-ı sâiresi müvekkil-i merkūm Nikola’nın mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î. Fî Selh-i Şa‘bân sene 1279 Şuhûdü’l-hâl: Muhzır Feyzullah Ağa b. ( ), Muhzır Ahmed Ağa b. ( ), Muhzır el-Hâc Salih Ağa b. ( ), Muhzır Mustafa Ağa b. ( ), Muhzır Süleyman Ağa b. ( ), ve gayruhum