İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 314 Hüküm no: 208 Orijinal metin no: [43a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şehremini Seyyid Hüseyin Hasib Beyefendi’nin françalacı fırını ve uncu değirmenini İbrahim Edhem Efendi ile Agya’ya satması Françalacı mübâya‘ası. Nushateyn Kezâlik e‘âzım-ı ricâl-i Devlet-i aliyye’den hâlâ Şehremini atûfetlü es-Seyyid Hüseyin Hasib Beyefendi hazretleri b. el-vezîri’l-merhûm Mehmed Tahir Paşa taraflarından husûs-ı âti’l-beyânda ikrâra vekîlleri olduğu ekmekçi esnâfı salıcılarından Mehmed Arif Ağa b. Mustafa ve Süleyman Ağa b. Mehmed şehâdetleriyle ber-nehc -i şer‘î sâbit olan ketebeden el-Hâc Mehmed Tevfik Efendi b. Mehmed meclis-i şer‘-i şerîf-i enverde bâ‘isü’l-kitâb esnâf-ı merkūmeden İbrahim Edhem Efendi b. el-Hâc Süleyman ve teba‘a-i Devlet-i aliyye’den ve esnâf-ı merkūmeden Agya v. Hazer muvâcehelerinde esnâf-ı merkūme kethüdâsı İbrahim Ağa b. Ahmed ile sâir mazbûtü’l-esâmî nizâm ustaları taraflarından mürsel vekîlleri Yiğitbaşı es-Seyyid İsmail Efendi b. es-Seyyid Mehmed Emin hâzır olduğu hâlde bi’l-vekâle ikrâr-ı tâm ve takrîr-i kelâm edip müvekkilim müşârün-ileyh es-Seyyid Hüseyin Hasib Beyefendi ben mahrûse-i Galata’ya muzâfe İstinye nâhiyesine tâbi‘ Yeniköy’de vâki‘ bir tarafdan Mumcu Hıristo menzili ve bir tarafdan Aya Nikola kilisesi ve bir tarafdan kilise-i mezkûrun akārâtından arsa ve taraf-ı râbi‘i tarîk-i âm ile mahdûd şehriye yirmi guruş kirâlı bir bâb françalacı fırını ve ona merbût karye-i merkūmede bağ derûnunda vâki‘ etrâf-ı erba‘ası Dolapçı Panayot ve Yorgi ve Ligor evlâd-ı Kostandi’nin bağı ile mahdûd şehriye on beş guruş kirâlı üç horoslu bir bâb uncu değirmeni derûnlarında mevcûde beyne’l-esnâf gedik ta‘bîr olunur on iki re’s bârgir ve onlara tâbi‘ sâir âlât-ı lâzime-i ma‘lûme akd-i âti’z-zikrin sudûruna değin bin iki yüz altmış üç senesi Zilka‘deti’ş-şerîfesinin on birinci günü tarihiyle müverraha ve ol târihde Dârü’l-hilâfeti’l-aliyye kādısı olan sudûr-ı izâmdan Kevakibîzâde Mehmed Said Efendi merhûmun imzâ ve hatemini hâviye işbu bir kıt‘a mübâya‘a hücceti ve kethüdâ-yı mezbûrun takdîm eylediği bir kıt‘a ilmühaber mantûklarınca yedimde mülk ve hakkım olmağla ber-minvâl-i muharrer mâlik olduğum âlât-ı gedik-i mezkûru tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile kırk bin guruşa mezbûrân İbrahim Efendi ve Agya’ya ale’l-iştirâki’s-seviy bey‘ ve temlîk ve teslîm eylediğimde onlar dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm kırk bin guruşu tamamen bana def‘ u teslîm ben dahi yedlerinden bi’t-tamâm ve’l-kemâl ahz u kabz etmemle fîmâ-ba’d âlât-ı gedik-i mezkûrda benim aslâ ve kat‘â alâka ve medhalim kalmayıp mezbûrân İbrahim Efendi ve Agya’nın ale’l-iştirâki’s-seviy mülk-i müşterâları ve hakk-ı sırfları olmuşdur buyurdular dedikde gıbbe’t-tasdîki’ş-şer‘î mâ-vaka‘a bi’t-taleb ketb ü imlâ olundu. Fî 20 Receb sene 1279 Şuhûdü’l-hâl: Şâhidûn es-sâbıkūn