İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 323 Hüküm no: 215 Orijinal metin no: [44b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halime Hatun’un babası Hacı Ömer Ağa’dan kendisine miras kalan yumurtacı dükkânı hisselerini kardeşleri Seyyid Hasan Ağa ve Seyyid Ahmed Ağa’ya satması Yumurtacı gediği mübâya‘ası 2300 guruş Kezâlik vilâyet-i Anadolu’da Nevşehir kazâsı kurâsından Damse karyesinde sâkin iken bundan mukaddem vefât eden el-Hâc Osman Ağa b. Ömer bin Abdullah’ın verâseti sulbî kebîr oğulları es-Seyyid el-Hâc Ömer Ağa ve es-Seyyid Mahmud Ağa ve sulbiye kebîre kızı Şerife Fâtıma Hatun’a münhasıra ba‘dehû mezbûr es-Seyyid el-Hâc Ömer Ağa dahi vefât edip verâseti sulbî kebîr oğulları es-Seyyid Hasan Ağa ve es-Seyyid Ahmed Ağa ve sulbiye kebîre kızları karye-i mezkûrede sâkineler Şerife Halime ve Şerife Hadice Hatunlara münhasıra ba‘dehû mezbûr es-Seyyid Mahmud Ağa dahi vefât edip verâseti sulbî kebîr oğlu es-Seyyid Mehmed Ağa ve sulbiye kebîre kızları Şerife Nazife Hatun ve Şerife Maryem Hatun ve Şerife Rabia Hatun’a münhasıra ve tashîh-i mesele-i mirâsları bi-hükmi’l münâsaha yetmiş beş sehimden olup sihâm-ı mezkûreden on beş sehmi mezbûre Şerife Fâtıma Hatun’a ve onar sehimden yirmi sehmi mezbûrân es-Seyyid Hasan Ağa ve es-Seyyid Ahmed Ağa’ya ve beşer sehimden on sehmi mezbûretân Şerife Halime ve Şerife Hadice Hatunlara ve on iki sehmi mezbûr es-Seyyid Mehmed Ağa’ya ve altışar sehimden on sekiz sehmi dahi mezbûrât Şerife Nazife Hatun ve Şerife Maryem Hatun ve Şerife Rabia Hatun’a isâbeti lede’ş-şer‘i’l-enver zâhir ve mütehakkık oldukdan sonra mezbûre Şerife Halime Hatun tarafından husûs-ı âti’l-beyânda bâ-hüccet-i şer‘iyye vekîl olduğu zâtını ârifân karye-i mezkûre ahâlisinden ve yumurtacı esnâfından Ahmed Ağa b. Ömer ve Hüseyin Ağa b. el-Hâc Ali şehâdetleriyle ber-nehc -i şer‘î sâbit olan esnâf-ı merkūmeden el-Hâc Ahmed Ağa b. Ahmed meclis-i şer‘-i şerîf-i enverde bâ‘iseyi’l-kitâb mezbûrân es-Seyyid Hasan Ağa ve es-Seyyid Ahmed Ağa mahzarlarında esnâf-ı merkūme kethüdâsı el-Hâc Osman Ağa b. el-Hâc Mehmed ve esnâfından Ahmed Efendi b. Ali ve İbrahim Efendi b. Mehmed hâzır oldukları hâlde bi’l-vekâle ikrâr-ı tâm ve takrîr-i kelâm edip mahmiye-i İstanbul hısnı ebvâbından Hatab kapısı hâricinde Yumurtacılar sûkunda vâki‘ bir tarafdan mukaddemâ Mustafa Ağa ve hâlâ oğlu Hüseyin Efendi dükkânı ve bir tarafdan cidâr-ı hısn ve bir tarafdan mukaddemâ el-Hâc Süleyman Ağa ve hâlâ el-Hâc İsmail Ağa dükkânı ve taraf-ı râbi‘i tarîk-i âm ile mahdûd Ayasofya-i Kebîr Câmi‘-i şerîfi evkāfı müsakkafâtından müvekkilem mezbûre Şerife Halime Hatun ile mezbûrân es-Seyyid Hasan Ağa ve es-Seyyid Ahmed Ağa’nın bi’l-icâreteyn taht-ı tasarruflarında olan şehriye beş guruş kirâlı bir bâb yumurtacı dükkânı derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûme müteveffâ-yı evvel el-Hâc Osman Ağa’nın hayâtında ile’l-vefât bin iki yüz elli beş senesi Şa‘bânü’l-mu‘azzamının on beşinci günü târihiyle müverrah ol târihde evkāf müfettişi Mehmed Emin Asaf Beyefendi merhûmun bir kıt‘a i‘lâm-ı şer‘îsi ve kethüdâ-yı hâzır-ı mûmâ-ileyhin takdîm eylediği bir kıt‘a ilmühaber mantûklarınca müstakillen yedinde mülkü ve ba‘de fevtihî müvekkilem mezbûre Halime Hatun ile sâir verese-i mezkûresine ber tashîh-i mezkûr mevrûs oldukdan sonra mezbûrân es-Seyyid Hasan Ağa ve es-Seyyid Ahmed Ağa mezbûre Şerife Fâtıma Hatun’un âlât-ı gedik-i mezkûrdan ber tashîh-i mezkûr mâlike olduğu on beş sehm hisse-i şâyi‘asını mezbûre Şerife Fâtıma Hatun’dan bâ-hüccet-i şer‘iyye seviyyen iştirâ etmeleriyle ben müvekkilem mezbûre Şerife Halime Hatun’un âlât-ı gedik-i mezkûrdan akd-i âti’z-zikrin sudûruna değin ber tashîh-i mezkûr mâlike olduğu beş sehm hisse-i şâyi‘asını tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ iki bin üç yüz guruşa mezbûrân es-Seyyid Hasan Ağa ve es-Seyyid Ahmed Ağa’ya bi’l-vekâle ale’l-iştirâki’s-seviy bey‘ ve temlîk ve vech-i lâyıkıyla teslîm eylediğimde onlar dahi ber-vech-i muharrer seviyyen iştirâ ve temellük ve tesellüm ve kabz u kabûl eylediklerinden sonra semeni olan meblağ-ı merkūm iki bin üç yüz guruşu tamâmen bana def‘ u teslîm ben dahi yedlerinden bi’l-vekâle tamâmen ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî bi’l-asâle ve izâfetle bi’l-vekâle ibrâ vü ıskāt eyledik ba‘de’l-yevm âlât-ı gedik-i mezkûrun ber tashîh-i merkūm beş sehm hisse-i şâyi‘a-i merkūmesinde müvekkilem mezbûre Şerife Halime Hatun’un aslâ ve kat‘â alâka ve medhali kalmayıp âlât-ı gedik-i mezkûrun cem‘an otuz beş sehm hisse-i şâyi‘ası mukaddemâ irsen ve beş sehm hisse-i şâyi‘ası dahi bu def‘â şirâen ki min haysü’l-mecmû‘ kırk sehm hisse-i şâyi‘ası mezbûrân es-Seyyid Hasan Ağa ve es-Seyyid Ahmed Ağa’nın ale’l-iştirâki’s-seviy mülk-i mahzı ve hakk-ı sırfları olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 19 Ramazan sene 1279 Şuhûdü’l-hâl: Muhzır Şakir Ağa b. ( ), Muhzır Mustafa Ağa b. ( ), Muhzır Feyzullah Ağa b. ( ), Muhzır Süleyman Ağa b. ( ), ve gayruhum