İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 325 Hüküm no: 216 Orijinal metin no: [44b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Hürmüz Hanım bt. İbrahim Edhem’in boşandığı eşi mülâzım Ali Behzad Bey’e bir buçuk yaşındaki oğulları için aylık 100 kuruş nafaka bağlattırması Nafaka-i sagīr 100 guruş Medîne-i Hazret-i Ebâ Eyüb el-Ensârî radıye anhü’l-bârî mahallâtından Defterdâr Mahmud Efendi mahallesinde sâkine ve zâtı zeyl-i vesîkada muharrerü’l-esâmî müslimîn ta‘rîfleriyle mu‘arrefe olan işbu bâ‘isetü’l-vesîka Emine Hürmüz Hanım bt. İbrahim Edhem tarafından vekîl-i müseccel-i şer‘îsi es-Seyyid İlyas Bey b. es-Seyyid Süleyman meclis-i şer‘-i şerîf-i lâzımü’t-teşrîfde müvekkile-i mûmâ-ileyhânın zevc-i sâbıkı asâkir-i nizâmiye-i şâhâne mülâzımlarından Ali Behzad Bey b. el-merhûm Ahmed Zekeriye Paşa mahzarında bi’l-vekâle takrîr-i kelâm ve ta‘bîr ani’l-merâm edip müvekkilem mûmâ-ileyhânın mûmâ-ileyh Ali Behzad Bey ile mukaddemâ zevciyet beynlerinde kāime iken mûmâ-ileyhin firâşından hâsıl ve müvekkilem mûmâ-ileyhâdan mütevellid ve hâlâ bi-hakkı’l-hıdâne hâlâ hacr ve terbiyesinde olan sulbî oğlu tahmînen bir buçuk yaşında Zekeriya Azmi nâm sagīrin aslâ mâlı olmayıp nafaka ve kisveye eşedd-i ihtiyâc ile muhtâc olmağla sagīr-i mezbûrun nafaka ve kisve-bahâsı için pederi mûmâ-ileyh üzerine kıbel-i şer‘den kadr-ı ma‘rûf meblağ farz ve takdîr olunmak bi’l-vekâle matlûbumdur dedikde gıbbe’t-tasdîki’ş-şer‘î hâkim-i hâsim-i muvakki‘ sadr-ı kitâb tûbâ lehû ve hüsnü me’âb efendi hazretleri dahi sagīr-i mezbûrun nafaka ve kisve-bahâsı için pederi mûmâ-ileyh Ali Behzad Bey üzerine işbu târih-i kitâbdan i‘tibâren bi’t-terâzi beher şehr yüz guruş farz ve takdîr buyurup meblağ-ı mefrûz-ı mezkûr beher şehr yüz guruşu sagīr-i mezbûrun nafaka ve kisve ve sâir levâzım-ı zarûriyesine harc u sarfa ve lede’l-iktizâ istidâneye ve inde’z-zafer pederi mûmâ-ileyh Ali Behzad Bey üzerine rucû‘a vâlidesi ve hâdınesi müvekkile-i mûmâ-ileyhâ Emine Hürmüz Hanım’a izin vermeğin mâ-vaka‘a bi’t-taleb ketb olundu. Fî 20 Şa‘bânsene 1279 Şuhûdü’l-hâl: MuhzırAhmed Ağa b. ( ), Muhzır Mustafa Ağa b. ( ), Muhzır Yusuf Ağa b. ( ), Tahtacı Salih Ağa b. ( ), ve gayruhum