İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 326 Hüküm no: 217 Orijinal metin no: [45a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eczacı İstavraki v. Sofranyoz’un şerbethânesini Oniko bt. Ekincioğlu Avram’a satması Şerbethâne mübâya‘ası 7000 guruş Âsitâne-i sa‘âdet âşiyâne ve bilâd-ı selâse mahkemelerine mine’l-kadîm bâ-fermân-ı âlî merbût olan duhâncı gediklerinden mâ‘adâ gerek Dersaâdet ve gerek bilâd-ı selâse-i mezkûrede kâin ber-vech-i mülkiyet tasarruf olunmakda olan her nev‘ gediklerin mübâya‘a ve ikrâr-ı mülk ve hibe ve irsen intikāl misillü kâffe-i mu‘âmelâtı ve vukū‘ bulan muhâsamâtı münhasıran ve mahsûsan İstanbul mahkemesinde icrâ ve iktizâ eden i‘lâm ve hüccet-i şer‘iyyeleri ancak mahkeme-i mezkûre tarafından i‘tâ olunmak ve gedikât ashâbının rızâ ve muvâfakatları olmadıkça kadîm mülk kirâları tezyîd olunmamak ve senedât-ı sahîha ve mu‘tebere ile tasarruf olunmakda olan gediklerin müstakır oldukları mahalden ihrâc ve imhâsı zımnında mülk sâhibleri cânibinden da‘vâya tasaddî olunur ise hükkâm-ı şer‘-i şerîf cânibinden istimâ‘ olunmaması bâlâsı tuğrâ-yı garrâ-yı hazret-i cihân-bânî ile muvaşşah ve müzeyyen bir kıt‘a nizâmnâme ve bâ-fermân-ı âlî müesses olan nizâm-ı müstahsene iktizâsından bulunduğuna binâen teba‘a-i Devlet-i aliyye’nin Rum milletinden Eczacı İstavraki v. Sofranyoz meclis-i şer‘-i hatîrde mahmiye-i İstanbul hısnı ebvâbından Fener kapısı hâricinde sâkine teba‘a-i Devlet-i aliyye’nin Rum milleti nisvânından olduğu ba ilmühaber mütehakkık olan Mânifaturacı Haralombus zevcesi bâ‘isetü’r-rakīm Oniko bt. Ekincioğlu Avram tarafından husûs-ı âti’l-beyânda tasdîka vekîl-i şer‘îsi teba‘a-i Devlet-i aliyye’den ve şerbethâneci esnâfı çavuşlarından Artin v. Agop muvâcehesinde esnâf-ı merkūmenin Beyoğlu kolu ustabaşısı Nikola v. Apostol hâzır olduğu hâlde ikrâr-ı tâm ve takrîr-i kelâm edip mahzrûse-i Galata hâricinde Beyoğlu civârında Oskordalya? mahallesinde bakkal dükkânı ittisâlinde bir tarafdan Bakkal Kilimandos bakkal dükkânı ve bir tarafdan Attar Artin menzili ve bir tarafdan Agop menzili ve taraf-ı râbi‘i tarîk-i âm ile mahdûd merhûm el-Hâc A‘ma Vakfı müsakkafâtından Muzîka-i hümâyûn hademesinden Emin Ağa b. el-Hâc Mustafa Ağa’nın bi’l-icâreteyn taht-ı tasarrufunda olan şehriye yirmi beş guruş kirâlı Bakkal koltuğu demekle arîf bir bâb şerbethâne derûnunda mevcûde beyne’l-esnâf gedik ta‘bîr olunur akd-i âti’z-zikrin sudûruna değin bin iki yüz yetmiş iki senesi şehr-i Ramazani’l-mübâreki’nin yirminci günü târihiyle müverrah ve ol târihde Rusûm-i zecriye muhassılı olan sa‘âdetlü Rüstem Paşa’nın mührüyle memhûr işbu bir kıt‘a sûret ve hâlâ Zecriye Nâzırı izzetlü Hüseyin Efendi’nin bir kıt‘a ilmühaberi mantûklarınca yedimde müstakillen mülk ve hakkım olan âlât-ı lazime-i ma‘lûmeyi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile yedi bin guruşa müvekkile-i merkūme Oniko’ya bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik ba‘de’l-yevm âlât-ı gedik-i mezkûrda benim aslâ ve kat‘â alâka ve medhalim kalmayıp müvekkile-i merkūme Oniko’nun mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 17 Ramazan sene 1279 Şuhûdü’l-hâl: Muhzır Ahmed Ağa b. ( ), Muhzır Mehmed Ağa b. ( ), Tahtacı Salih Ağa b. ( ), ve gayruhum