İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 327 Hüküm no: 218 Orijinal metin no: [45a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerbethâneci esnâfından Vasil v. Lefter’in şerbethâne hisselerini karısı Efmiye bt. Praşkova’ya satması Şerbethâne mübâya‘ası 20000 guruş Kezâlik teba‘a-i Devlet-i aliyye’nin Rum milletinden ve şerbethâneci esnâfından Vasil v. Lefter meclis-i şer‘-i şerîf-i hatîrde zevcesi teba‘a-i Devlet-i aliyye’nin Rum milleti nisvânından bâ‘isetü’r-rakīm Efmiye bt. Praşkova tarafından husûs-ı âti’l-beyânda tasdîka vekîl-i şer‘îsi teba‘a-i Devlet-i aliyye’den ve esnâf-ı merkūmeden Avram v. Pretamos muvâcehesinde teba‘a-i Devlet-i aliyye’den ve esnâf-ı merkūmenin Çarşı kolu ustabaşısı diğer Avram v. Kiryako hâzır olduğu hâlde ikrâr-ı tâm ve takrîr-i kelâm edip mahmiye-i İstanbul’da bâb-ı Caferî dâhilinde kâin bir tarafdan Zindan Hanı ve bir tarafdan cidâr-ı hısn ve bir tarafdan Emir Hanı ve taraf-ı râbi‘i tarîk-i âm ile mahdûd Ayasofya-i Kebîr Câm‘‘-i şerîfi ve Kule-i zemîn ve Hace Âişe Sultan Evkāfı müsakkafâtından benim bi’l-icâreteyn taht-ı tasarrufumda olan şehriye iki yüz yirmi beş guruş kirâlı Sa‘lebçi koltuğu demekle arîf bir bâb şerbethâne derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûmenin yüz yirmi sehm i‘tibârıyla yüz üç sehm üç buçuk pul hisse-i şâyi‘ası âharın yedinde mülkü olup mâ‘adâ on altı sehm yarım pul hisse-i şâyi‘ası akd-i âti’z-zikrin sudûruna değin bin iki yüz yetmiş bir senesi şehr-i Rebî‘ülâhiri’nin altıncı günü târihiyle müverrah ve ol târihde Rusûm-i zecriye muhassılı olan sa‘âdetlü Rıza Beyefendi’nin mührüyle memhûr işbu bir kıt‘a sûret ve hâlâ Zecriye Nâzırı izzetlü Hüseyin Ağa’nın bir kıt‘a ilmühaberi mantûklarınca yedimde müstakillen mülk ve hakkım olmağla ben âlât-ı gedik-i mezkûrdan ber-minvâl-i muharrer mâlik olduğum on altı sehm yarım pul hisse-i şâyi‘a-i mezkûresini tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şerîk yirmi bin guruşa zevcem müvekkile-i merkūme Efmiye’ye bey‘ ve temlîk ve vech-i lâyıkıyla teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm yirmi bin guruşu tamâmen bana def‘ u teslîm ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik ba‘de’l-yevm âlât-ı gedik-i mezkûrun on altı sehm yarım pul hisse-i şâyi‘a-i mezkûresinde benim aslâ ve kat‘â alâka ve medhalim kalmayıp müvekkile-i merkūme Efmiye’nın mülk-i müşterâsı ve hakk-ı sırfı olmuşdur dedikde gıbbe’t-tasdîk. Fî 13 Şa‘bân sene 1279 Şuhûdü’l-hâl: MuhzırAhmed Ağa b. ( ), Muhzır Süleyman Ağa b. ( ), Muhzır Mustafa Ağa b. ( ), Muhzır Feyzullah Ağa b. ( ), ve gayruhum