İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 328 Hüküm no: 219 Orijinal metin no: [45a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çırçırlı Mehmed Ağa b. Ahmed’in tuzcu dükkânını Ürgüplü Süleyman Ağa b. Hacı Abdullah’a satması Tuzcu gediği mübâya‘ası 14000 guruş Kezâlik tuzcu esnâfından Çırçırlı Mehmed Ağa b. Ahmed meclis-i şer‘-i şerîf-i enverde esnâf-ı merkūmeden bâ‘isü’l-kitâb Ürgüplü Süleyman Ağa b. el-Hâc Abdullah mahzarında esnâf-ı merkūme kethüdâsı Ahmed Efendi b. el-Hâc Mehmed tarafından mürsel esnâf-ı merkūmeden Küçük Mustafapaşalı es-Seyyid Ali Ağa b. Ahmed ile esnâf-ı mezkûreden es-Seyyid Hasan Ağa b. es-Seyyid Mehmed Emin hâzır oldukları hâlde ikrâr-ı tâm ve takrîr-i kelâm edip mahmiye-i İstanbul hısnı ebvâbından Bâb-ı Caferî hâricinde Hasır İskelesi kurbünde Tuzcular sûkunda kâin bir tarafdan kethüdâ-yı mezbûr Ahmed Efendi’nin dükkânı ve bir tarafdan Balmumcubaşı Mehmed Ağa dükkânı ve bir tarafdan benim dükkânım ve taraf-ı râbi‘i tarîk-i âm ile mahdûd mahmiye-i mezkûrede Ayasofya-i Kebîr Câmi‘-i şerîfi Vakfı müsakkafâtından benim taht-ı tasarrufumda olan şehriye beş guruş kirâlı bir bâb tuzcu dükkânı derûnunda mevcûde beyne’l-esnâf gedik ta‘bîr olunur akd-i âti’z-zikrin sudûruna değin bin iki yüz yetmiş senesi Recebü’l-ferdinin on beşinci günü târihiyle müverrah ol târihde Rumeli kādıaskeri olan es-Seyyid Hasan Tahsin el-Hüseynî Beyefendi merhûmun hatemiyle mahtûm işbu bir kıt‘a i‘lâm-ı şer‘î ve kethüdâ-yı mezbûrun takdîm eylediği bir kıt‘a ilmühaber mantûklarınca yedimde müstakillen mülk ve hakkım olan âlât-ı lâzime-i ma‘lûmeyi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile on dört bin guruşa mezbûr Süleyman Ağa’ya bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm on dört bin guruşu tamâmen bana def‘ u teslîm ben dahi yedinden bi’t-tamâm ve’l-kemâl ahz u kabz edip fîmâ-ba’d âlât-ı gedik-i mezkûrda benim aslâ ve kat‘â alâka ve medhalim kalmayıp merkūm Süleyman Ağa’nın mülk-i müşterâsı ve hakk-ı sırfı olmağla mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 4 Ramazan sene 1279 Şuhûdü’l-hâl: Eş-şahidune’s-sabıkūn