İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 329 Hüküm no: 220 Orijinal metin no: [45b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgancı esnâfından İbrahim Edhem Efendi b. Hasan’ın vasiyeti ve Mahmud Aziz Efendi b. Hasan’ı vasi tayin etmesi Husûs ile vasiyyet Husûs-ı âti’l-beyânın mahallinde ketb ü tahrîri için cânib-i şerî‘at-ı garrâdan bi’l-iltimâs me’zûnen irsâl olunan Kâtib es-Seyyid el-Hâc Ahmed Aziz Efendi mahmiye-i İstanbul’da Çırçır kurbünde el-Hâc Hasan mahallesinde vâki‘ yorgancı esnâfından İbrahim Edhem Efendi b. Hasan’ın sâkin olduğu menziline varıp zeyl-i kitâbda muharrerü’l-esâmî müslimîn huzûrlarında akd-i meclis-i şer‘-i âlî etdikde mezbûr İbrahim Edhem Efendi meclis-i ma‘kūd-ı mezkûrde zikri âtî vesâyâ-i mu‘ayyene ve gayr-i mu‘ayyenesi tenfîze vasiyy-i muhtâr nasb ve ihtiyâr eylediği esnâf-ı merkūmeden bâ‘isü’l-kitâb Mahmud Aziz Efendi b. Hasan mahzarında esnâf-ı merkūmeden Hafız Ali Efendi b. Ahmed ile mezbûr İbrahim Edhem Efendi’nin zevcesi zâtı müslimûn-ı merkūmûn ta‘rîfleriyle mu‘arrefe olan Âişe Hanım bt. Mustafa ve sulbî kebîr oğlu Mehmed Cemaleddin Efendi hâzır oldukları hâlde ikrâr-ı tâm ve takrîr-i kelâm edip ben bi emr-i hüdâ irtihâl-i dâr-ı bekā eylediğimde cemî‘-i terekem ve zimem-i nâsda hukūku mahz u kabz olunup evvelâ kadr-ı ma‘rûf olan altı yüz guruş harc u sarfla vech-i mesnûn üzere techîz ve tekfîn ve levâzım-ı defnim görülüp zevcem hâzıra-i mezbûre Âişe Hanım’a zimmetimde mütekarrir ve ma‘kūdun aleyh deynim olan mehr-i müeccel iki yüz guruş ve cihet-i karzdan bâ-tahvîl deynim olan beş bin guruş ile sâir duyûn-ı müsbetem zuhûr eder ise ba‘de’l-edâ bâkī kalan terekemin sülüsü ifrâz ve sülüs-i mezkûrdan bin guruş iskāt-ı salât-ı fâ’item ve kefâret-i savm ve yemin ve nuzûrat-ı sâirem için ber-nehc -i şer‘î ba‘de’d-devr fukarâ-i müslimîne tasadduk oluna ve vefâtım gecesi huffâz-ı kirâm da‘vet ve bir hatm-i şerîf tilâvet etdirilip hâsıl olan ecr ve mesûbâtı benim ve sâir müminîn ve müminâtın ervâhımıza ba‘de-l ihdâ sülüs-i mezkûrdan üç yüz guruş huffâz-ı mûmâ-ileyhüma bi-tarîki’s-sıla seviyyen taksîm ve i‘tâ oluna ve sülüs-i mezkûrdan üç yüz guruş harc u sarfla tabh-ı helvâ olunup huffâz-ı mûmâ-ileyhüm ile sâir fukarâ-i müslimîn it‘âm oluna ve yine sülüs-i mezkûrdan dört yüz elli guruş harc u sarfla tabh-ı lokma ve it‘âm-ı fukarâ oluna ve yine sülüs-i mezkûrdan dört yüz guruş harc u sarfla ta‘mîr-i kabrim görüle ve yine sülüs-i mezkûrdan yedi bin beş yüz guruş menâsik-i hacc-ı şerîfe âlim ve dindâr bir zât-ı sütûde-sıfât[a] verilip ol dahi benim için hac ide ve yine sülüs-i mezkûrdan iki bin guruş ile dört Mushaf-ı şerîf iştirâ olunup müstahıkkından birer kimesneye verile ve yine sülüs-i mezkûrdan dört yüz guruş yorgancı esnâfı münâdîlerine alâ tarîki’s-sıla seviyyen verile ve yine sülüs-i mezkûrdan iki yüz guruş baldızım Fâtıma Hatun ve sadrî oğlu Ali’ye bi-tarîki’s-sıla seviyyen verile ve yine sülüs-i mezkûrdan yüz guruş Nefise Hanım’a ve elli guruş Hasan Ağa’ya ve elli guruş Kamil Ağa’ya ve yüz guruş Torbacı Ali zevcesi Zenciye Halime Kadın’a ve elli guruş çırağım Yusuf Ağa ve elli guruş dahi Raif Ağa’ya bi-tarîki’s-sıla verile ve yine sülüs-i mezkûrdan bin guruş vakf-ı sahîh-i şer‘î mü’ebbed ve habs-i sarîh-i muhalled ile vakf ve habs olunup meblağ-ı mezkûr bâ-ma‘rifet-i şer‘ alâ vechi’l-helâl istirbâh ve istiğlâl olunup hâsıl olan gallesinden senevî yüz guruş ile mûm iştirâ mahmiye-i mezkûrede Yüksek Kaldırım civârında Seydibey mahallesi câmi‘inde îkād oluna ve vakf-ı mezkûrumun tevliyeti esnâf-ı merkūme evkāfı mütevellisi olanlara meşrût olup galle-i merkūmeden senevî on guruş vazîfe-i tevliyete müstahik ola ve vakf-ı mezkûruma esnâf-ı merkūme kethüdâsı ve yiğitbaşısı ve kâtibi olanlara nâzır olup galle-i vakf-ı mezkûrdan senevî on guruş vazîfeye müstahık olalar ve şurût-ı mezkûreye ri‘âyet müte‘azzire olur ise mutlaka galle-i vakf-ı mezkûr fukarâ-yı müslimîne verile ve yine sülüs-i mezkûrdan yedi yüz elli guruş dahi vasiyy-i muhtârım mezbûr Mahmud Aziz Efendi kendi nefsi için ahz u kabzeyleye ve sülüs-i mezkûrdan her ne fazla kalır ise fazla-i merkūme vasim mezbûr Mahmud Aziz Efendi re’yiyle vücûh-ı bir ve hayra sarf oluna ve sülüsân-ı terekem dahi veresem olan zevcem hâzıra-i mezbûre Âişe Hanım ile sulbî kebîr oğlum hâzır-ı mezbûr Mehmed Cemaleddin Efendi ve sulbiye murâhıka kızım Munise Hanım beynlerinde alâ mâ farazallâhü’l-alîmü’l-hakîm tevzî‘ ve taksîm oluna deyu vasiyyet ve tenfîzine mezbûr Mahmud Aziz Efendi’yi vasiyy-i muhtâr ve üzerine hâzır-ı mezbûr Ali Efendi’yi nâzır nasb ve ta‘yîn eylediğimde onlar dahi ber-vech-i muharrer vesâyet ve nezâret-i merkūmeleri kabûl ve merâsimini vaktinde kemâ-yenbagī edâya ta‘ahhüd eyledi dedikde gıbbe’t-tasdîki’ş-şer‘î vâkî‘- hâli kâtib-i mûmâ-ileyh mahallinde ketb ü tahrîr ve ma‘an meb‘ûs ümenâ-i şer‘le meclis-i şer‘e gelip alâ vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 29 Ramazan sene 1279 Şuhûdü’l-hâl: Mahalle-i mezkûre imâmı el-Hâc Hafız Mehmed Efendi b. Ali, Muhtâr-ı evveli Ahmed Nuri Ağa b. Abdurrahman, Muhtâr-ı sânîsi el-Hâc Ahmed Ağa b. Mehmedve ahâlisinden el-Hâc Mustafa Efendi b. Hasan, Esnâf-ı merkūme yiğitbaşısı Ahmed Şakir Efendi b. el-Hâc Ebubekir, Esnâf-ı merkūmeden Mehmed Emin Efendi b. el-Hâc Ahmed ve esnâf-ı merkūmeden el-Hâc Ahmed Efendi b. Ahmed, Muhzır Feyzullah Ağa b. ( ), Çukadâr İbrahim Ağa b. ( ), ve gayruhum