İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 331 Hüküm no: 221 Orijinal metin no: [45b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden saraç esnâfından Seyyid Ahmed Muhtar Ağa b. Mehmed Said’e ait serrâc dükkânının müzayede yoluyla satılması Serrâc gediği mübâya‘ası 1250 guruş Âsitâne-i sa‘âdet âşiyâne ve bilâd-ı selâse mahkemelerine bâ-fermân-ı âlî mine’l-kadîm merbût olan duhâncı gediklerinden mâ‘adâ gerek Dersaâdet ve gerek bilâd-ı selâse-i mezkûrede kâin ber-vech-i mülkiyet tasarruf olunmakda bulunan her nev‘ gediklerin mübâya‘a ve ikrâr-ı mülk ve hibe ve irsen intikāl misillü kâffe-i mu‘âmelâtı ve vukū‘ bulan muhâkemâtı münhasıran ve mahsûsan İstanbul Mahkemesi’nden icrâ ve iktizâ eden i‘lâm ve hüccet-i şer‘iyyeleri ancak mahkeme-i mezkûre tarafından i‘tâ olunmak ve gedikât ashâbının rızâ ve muvâfakatları olmadıkça kadîm mülk kirâları tezyîd olunmamak ve senedât-ı sahîha ve mu‘tebere ile ber-vech-i mülkiyet tasarruf olunmakda bulunan gediklerin müstakır oldukları mahalden ihrâc ve imhâsı zımnında mülk sâhibleri tarafından da‘vâya tasaddî olunur ise hükkâm-ı şer‘-i şerîf cânibinden istimâ‘ olunmaması bâlâsı tuğrâ-yı garrâ-yı cihân-bânî ile muvaşşah ve müzeyyen bir kıt‘a nizâmnâme ve bâ-fermân-ı âlî müesses olan nizâm-ı müstahsene iktizâsından bulunduğuna binâen mahmiye-i İstanbul’da Davudpaşa mahallesinde sâkin iken bundan mukaddem vefât eden serrâc esnâfından es-Seyyid Ahmed Muhtar Ağa b. Mehmed Said bin Abdullah’ın verâseti zevce-i menkûha-i metrûkesi Hafize Hanım bt. el-Hâc Salih ile sulbî sagīr oğlu es-Seyyid Abdülkerim’e münhasıra olduğu lede’ş-şer‘î’l-enver zâhir ve mütehakkık oldukdan sonra sagīr-i mezbûrun vâlidesi ve tesviye-i umûruna kıbel-i şer‘den mansûbe vasîsi mezbûre Hafize Hanım tarafından husûs-ı âti’l-beyânda vekîl-i müseccel-i şer‘îsi esnâf-ı merkūmeden el-Hâc Ali Efendi b. Hasan meclis-i şer‘-i münîrde esnâf-ı merkūmeden bâ‘isü’l-kitâb Ahmed Ağa b. Mehmed Sadık mahzarında esnâf-ı merkūme kethüdâsı el-Hâc İbrahim Ağa b. Ahmed tarafından mürsel vekîli esnâf-ı merkūmeden Ali Efendi b. Ebubekir hâzır olduğu hâlde bi’l-vekâle ikrâr-ı tâm ve takrîr-i kelâm edip mahmiye-i mezkûrede Sarachâne derûnunda câmi‘ tahtında vâki‘ bir tarafdan Ali Ağa’nın serrâc dükkânı ve bir tarafdan el-Hâc Ahmed Ağa’nın mağazası ve tarafeyni tarîk-i âm ile mahdûd Ayasofya-i Kebîr Câmi‘-i şerîfi evkāfı müsakkafâtından el-Hâc Ali Ağa’nın bi’l-icâreteyn taht-ı tasarrufunda olan şehriye altmış para kirâlı bir bâb serrâc dükkânı derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûme müteveffâ-yı mezbûr es-Seyyid Ahmed Muhtar Ağa’nın hayâtında ile’l-vefât Kısmet-i Askerîye mahkemesiyle kethüdâ-yı mûmâ-ileyh taraflarından vürûd eden bir kıt‘a ilmühaber mantûkunca yedinde müstakillen mülkü ve ba‘de vefâtihî müvekkilem mezbûre Hafize Hanım ile sagīr-i mezbûr es-Seyyid Abdülkerim’e mevrûs olmağla ben âlât-ı gedik-i mezkûru lede’l-müzâyede [46a] ve gıbbe inkıtâ‘ı’r-rağbe el-yevm semen-i misli idüğü bî-garez ehl-i vukūf ihbârlarıyla lede’ş-şer‘i’l-enver zâhir ve mütehakkık olan bin iki yüz elli guruşa tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mezbûr el-Hâc Ahmed Ağa’ya bi’l-vekâle bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm bin iki yüz elli guruşu tamamen bana def‘ u teslîm ben dahi yedinden bi’l-vekâle tamâmen ahz u kabz ve müteveffâ-yı mezbûrun defter-i kassâmına idhâl eyledim fîmâ-ba’d âlât-ı gedik-i mezkûre müvekkilem merkūme Hafize Hanım ile sagīr-i mezbûrun aslâ ve kat‘â alâka [ve] medhalleri kalmayıp mezbûr el-Hâc Ahmed Ağa’nın mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 12 Ramazan sene 1279 Şuhûdü’l-hâl: Muhzır Ahmed Ağa b. ( ), Muhzır Süleyman Ağa b. ( ), Muhzır Mustafa Ağa b. ( ), Muhzır Feyzullah Ağa b. ( ), ve gayruhum.