İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 332 Hüküm no: 222 Orijinal metin no: [46a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saraç esnâfından Hacı Ahmed Ağa b. Mehmed Sadık’ın saraç dükkânının yarı hissesini Hacı Ali Efendi b. Hüseyin’e satması Serrâc gediği mübâya‘ası 625 guruş. Kaydı ihrâc şüd fî 21 Receb sene [1]330 Kezâlik serrâc esnâfından el-Hâc Ahmed Ağa b. Mehmed Sadık meclis-i şer‘-i münîrde esnâf-ı merkūmeden bâ‘isü’l-kitâb el-Hâc Ali Efendi b. Hüseyin mahzarında esnâf-ı merkūme kethüdâsı el-Hâc İbrahim Ağa b. Ahmed tarafından mürsel vekîli Ali Efendi b. Ebubekir hâzır olduğu hâlde ikrâr-ı tâm ve takrîr-i kelâm edip mahmiye-i İstanbul’da Sarachâne derûnunda câmi‘ tahtında vâki‘ bir tarafdan Ali Ağa’nın serrâc dükkânı ve bir tarafdan el-Hâc Ahmed Ağa’nın mağazası ve tarafeyni tarîk-i âm ile mahdûd Ayasofya-i Kebîr Câmi‘-i şerîfi evkāfı müsakkafâtından el-Hâc Ali Ağa’nın bi’l-icâreteyn taht-ı tasarrufunda olan bir bâb serrâc dükkânı derûnunda mevcûde beyne’l-esnâf gedik ta‘bîr olunur akd-i âti’z-zikrin sudûruna değin işbu şehr-i hâlin on ikinci günü târihiyle müverraha İstanbul Mahkemesi’nden verilen bir kıt‘a mübâya‘a hücceti nâtıka olduğu üzere yedimde mülk ve hakkım olan âlât-ı lâzime-i ma‘lûmenin nısf hisse-i şâyi‘asını yedimde bi’l-ibkā mâ‘adâ âhar nısf hisse-i şâyi‘asını tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-ilmühaber altı yüz yirmi beş guruşa mezbûr el-Hâc Ali Efendi’ye bey‘ ve temlîk ve vech-i lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm altı yüz yirmi beş guruşu tamamen bana def‘ u teslîm ben dahi yedinden bi’t-tamâm ve’l-kemâl ahz u kabzedip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik ba‘de’l- yevm âlât-ı gedik-i mezkûrun nısf hisse-i şâyi‘asında benim aslâ ve kat‘â alâka ve medhalim kalmayıp mezbûr el-Hâc Ali Efendi’nin mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 13 Ramazan sene 1279 Şuhûdü’l-hâl: Muhzır Ahmed Ağa b. ( ), Muhzır el-Hâc Yusuf Ağa b. ( ), Muhzır el-Hâc Salih Ağa b. ( ), ve gayruhum