İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 333 Hüküm no: 223 Orijinal metin no: [46a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bahçıvan tâifesinden Yani v. Hıristo’nun ekmekçi fırını hisselerinin kendisine ait olduğuna dair hüccet talebi Ekmekçi fırını ihbârı Kezâlik mahrûse-i Galata’ya muzâfe Ortaköy’de sâkin teba‘a-i Devlet-i aliyye’nin Rum milletinden ve bahçıvan tâifesinden Yani v. Hıristo meclis-i şer‘-i hatîrde ekmekçi esnâfının kethüdâsı İbrahim Ağa b. Ahmed ve sâir mazbûtü’l-esâmî nizâm ustaları taraflarından mürsel Yiğitbaşı es-Seyyid İsmail Efendi b. es-Seyyid Mehmed Emin ve esnâf-ı merkūme salıcılarından Mehmed Arif Ağa b. Mustafa ve Süleyman Ağa b. Mehmed hâzır oldukları hâlde takrîr-i kelâm ve ta‘bîr ani’l-merâm edip zikr olunan Ortaköy’de vâki‘ bir tarafdan benimle babam merkūm Hıristo’nun mutasarrıf olduğumuz şerbethâne ve bir tarafdan mukaddema Yako ve el-yevm Avram Yahudhânesi ve tarafeyni tarîk-i âm ile mahdûd ser-çavuşân-ı esbak merhûm Süleyman Ağa Vakfı müsakkafâtından kezâlik benimle babam merkūm Hıristo’nun bâ-temessük-i mütevelli bi’l-icâreteyn taht-ı tasarrufumuzda olan şehriye otuz guruş kirâlı terbî‘an yetmiş zirâ‘ on bir parmak arsa üzerinde mebnâ bir bâb ekmekçi fırını derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûme işbu sene-i mübâreke Cumâdelâhiresi’nin yirmi üçüncü günü târihiyle müverrah işbu bir kıt‘a sûret ve kethüdâ-yı mûmâ-ileyhin takdîm eylediği bir kıt‘a ilmühaber mantûklarınca yedimde müstakillen mülk ve hakkım olmağla ben ber-minvâl-i muharrer mâlik olduğum âlât-ı gedik-i mezkûru yüz yirmi sehm i‘tibârıyla kırk sehm hisse-i şâyi‘asını yedimde bi’l-ibkā mâ‘adâ seksen sehm hisse-i şâyi‘asını âhara bâ-hüccet-i şer‘iyye bey‘ ve teslîm etmemle mâ‘adâ yedimde ibkā eylediğim kırk sehm hisse-i şâyi‘a-i âlât-ı gedik-i mezkûr ber-minvâl-i muharrer mâlik olduğunu nâtık yedimde sened-i şer‘î olmamağla hakīkat-ı hâl husûs-ı mezkûre vukūf-ı tâmları olan kimesnelerden istihbâr ve suâl olunup haberleri tahrîr ve imlâ ile kırk sehm hisse-i şâyi‘a-i âlât-ı gedik-i mezkûr ber-vech-i meşrûh mülküm olduğunu nâtıka kıbel-i şer‘den yedime bir kıt‘a hüccet-i şer‘iyye i‘tâ buyurulmak murâdımdır deyu istid‘â etdiklerinde hâl merkūm Yani’nin bâlâda bast ve beyân eylediği minvâl üzere olduğunu husûs-ı mezkûre vukūf-ı tâmları olan esnâf-ı hâzirûn-ı mezbûrûn ile cerîdede mazbûtü’l-esâmî kimesnelerden her biri alâ tarîki’ş-şehâde haber vermeleriyle vâki‘-i hâl hıfzan li’l-makāl işbu vesîka-i enîka ketb olundu. Fî 10 Receb sene 1279 Şuhûdü’l-hâl: Muhzır Ahmed Ağa b. ( ), Muhzır Feyzullah Ağa b. ( ), Tahtacı el-Hâc Salih Ağa b. ( ), ve gayruhum