İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 334 Hüküm no: 224 Orijinal metin no: [46a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zoyice bt. Hıristo’nun börekçi fırınındaki hisselerini Eleniko bt. Viktor’a satması Börekçi fırını gediği mübâya‘ası 2000 guruş Kezâlik mahrûse-i Galata’ya muzâfe İstinye nâhiyesine tâbi‘ Büyükdere karyesinde sâkine teba‘a-i Devlet-i aliyye’nin Rum milleti nisvânından olup şahsı ta‘rîf-i şer‘î ile mu‘arrefe olan Zoyice bt. Hıristo meclis-i şer‘-i şerîf-i hatîrde mahrûse-i mezkûre hâricinde Beyoğlu civârında sâkine teba‘a-i Devlet-i aliyye’nin Rum milleti nisvânından olduğu bâ-ilmühaber mütehakkık olan bâ‘isetü’r-rakīm Kasâb Petro zevcesi Eleniko bt. Viktor tarafından husûs-ı âti’l-beyânda tasdîka vekîl-i şer‘îsi teba‘a-i Devlet-i aliyye’nin Rum milletinden Sandıkkâr Dimitraki v. Yorgi muvâcehesinde mahrûse-i merkûme ve tevâbi‘inde vâki‘ çörekçi ve börekçi esnâfının kethüdâsı el-Hâc Mustafa Ağa b. Hasan tarafından mürsel teba‘a-i Devlet-i aliyye’den ve esnâf-ı merkūme ustabaşılarından Hıristo v. Oyanos hâzır olduğu hâlde ikrâr-ı tâm ve takrîr-i kelâm edip zikr olunan Büyükdere karyesinde vâki‘ bir tarafdan Yanko şerbethânesi ve bir tarafdan Togodoş’un tütüncü dükkânı ve bir tarafdan Bakkal Yorgi’nin menzili ve taraf-ı râbi‘i tarîk-i âm ile mahdûd sadrî kebîr oğullarım işbu hâzırân bi’l-meclis Anaştaş ve Vasil ve sadriye kebîre kızım gāibe ani’l-meclis Vasilike evlâd el-müteveffâ Dimo’nun yedimizde mülkümüz olan şehriye altı guruş kirâlı bir bâb börekçi fırını derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûmenin nısf hisse-i şâyi‘ası cennet-mekân adn-i âşiyân merhûm ve mağfiret-nişân Sultan Mahmud Hân-ı Sânî tâbe serâhu hazretlerinin Evkâf-ı celîleleri müstegallâtından olarak hâzırân-ı merkūmân Anaştaş ve Vasil ve gāibe-i merkūme Vasiliki’ye ve gāibe ani’l-meclis Eleni bt. Vasil’in bi’l-icâreteyn taht-ı tasarruflarında olup mâ‘adâ âhar nısf hisse-i şâyi‘ası kırk sehm i‘tibârıyla beş sehm hisse-i şâyi‘ası benim ve on dörder sehimden yirmi sekiz sehm hisse-i şâyi‘ası hâzırân-ı merkūmân Anaştaş ve Vasil’in ve yedi sehm hisse-i şâyi‘ası dahi kızım gāibe-i merkūme Vasilike’nin işbu sene-i mübâreke şehr-i Rebî‘ülevveli’nin yirminci günü târihiyle müverraha İstanbul Mahkemesi’nden verilen bir kıt‘a hüccet-i şer‘iyye ve kethüdâ-yı mûmâ-ileyhin takdîm eylediği bir kıt‘a ilmühaber mantûklarınca yedimizde mülk ve hakkımız olmağla ben âlât-ı gedik-i mezkûrun âhar nısf hisse-i şâyi‘asında akd-i âti’z-zikrin sudûruna değin ber-minvâl-i muharrer mâlike olduğum beş sehm hisse-i şâyi‘asını tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ-i merkūmûn iki bin guruşa müvekkile-i merkūme Eleniko’ya bey‘ ve temlîk ve vech-i lâyıkıyla teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm iki bin guruşu tamamen bana def‘ u teslîm ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik ba‘de’l-yevm âhar nısf hisse-i şâyi‘a-i âlât-ı gedik-i mezkûrun beş sehm hisse-i şâyi‘a-i mezkûresinde benim aslâ ve kat‘â alâka ve medhalim kalmayıp müvekkile-i merkūme Eleniko’nun mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 8 Ramazan sene 1279 Şuhûdü’l-hâl: Muhzır Şakir Ağa b. ( ), Muhzır Süleyman Ağa b. ( ), Muhzır Mustafa Ağa b. ( ), Muhzır Feyzullah Ağa b. ( ), ve gayruhum