İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 335 Hüküm no: 225 Orijinal metin no: [46b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zoyice bt. Hıristo ve oğlu Anaştaş v. Dimo’nun börekçi fırınındaki hisselerini Eleniko bt. Viktor’a satmaları Börekçi mübâya‘ası 4500 + 5500 = 10000 guruş Kezâlik mahrûse-i Galata’ya muzâfe İstinye nâhiyesine tâbi‘ Büyükdere karyesinde sâkine teba‘a-i Devlet-i aliyye’nin Rum milleti nisvânından olup şahsı ta‘rîf-i şer‘î ile mu‘arrefe olan Zoyice bt. Hıristo sadrî kebîr oğlu teba‘a-i Devlet-i aliyye’den ve Rum milletinden Anaştaş v. Dimo hâzır olduğu hâlde meclis-i şer‘-i şerîf-i hatîrde mahrûse-i mezkûre hâricinde Beyoğlu civârında sâkine teba‘a-i Devlet-i aliyye’nin Rum milleti nisvânından olduğu bâ-ilmühaber mütehakkık olan işbu bâ‘isetü’r-rakīm Kasâb Petro zevcesi Eleniko bt. Viktor tarafından husûs-ı âti’l-beyânda tasdîka vekîl-i şer‘îsi teba‘a-i Devlet-i aliyye’nin Rum milletinden Sandıkkâr Dimitraki v. Yani muvâcehesinde mahrûse-i mezkûre ve tevâbi‘inde vâki‘ çörekçi ve börekçi esnâfının kethüdâsı el-Hâc Mustafa Ağa b. Hasan tarafından mürsel teba‘a-i Devlet-i aliyye’den ve esnâf-ı merkūme ustabaşılarından Hıristo v. Oyanos hâzır olduğu hâlde ikrâr-ı tâm ve takrîr-i kelâm edip nâhiye-i mezkûreye tâbi‘ Tarabya karyesinde vâki‘ bir tarafdan Karakolhâne ve bir tarafdan Berber Yanko’nun berber dükkânı ve bir tarafdan leb-i deryâ ve taraf-ı râbi‘i tarîk-i âm ile mahdûd cennet-mekân merhûm ve mağfiret-nişân Sultan Bayezid-i Velî Hân tâbe serâhu hazretlerinin evkāf-ı celîleleri müsakkafâtından nısf hisse-i şâyi‘ası şerbethâneci Yorgi v. Zaharya’nın ve rub‘ hisse-i şâyi‘ası hâzır-ı merkūm Anaştaş ile diğer sadrî oğlu Vasil ve sadriye kızım Vasilike’nin babaları müteveffâ-yı merkūm Dimo’dan müntakil ve âhar rub‘ hisse-i şâyi‘ası dahi Todori’nin bâ-temessük-i mütevelli bi’l-icâreteyn taht-ı tasarruflarında olan şehriye on iki guruş kirâlı bir bâb börekçi fırını derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûmenin yüz yirmi sehm i‘tibârıyla nısf sehm hisse-i şâyi‘ası nefs-i Harameyn-i muhteremeyn Evkâf-ı celîlesi müstagallâtından hâzır-ı merkūm Anaştaş ve merkūmân Vasil ve Vasilike ile merkūm Todori’nin bâ-temessük-i mütevelli bi’l-icâreteyn taht-ı tasarruflarında olup mâ‘adâ âhar nısf sehm hisse-i şâyi‘ası dahi kırk sehm i‘tibârıyla on iki sehm hisse-i şâyi‘ası benim ve on dört sehm hisse-i şâyi‘ası hâzır-ı merkūm Anaştaş’ın ve diğer on dört sehm hisse-i şâyi‘ası dahi merkūm Vasil’in işbu sene-i mübâreke şehr-i Rebî‘ülevveli’nin yirmi ve yirmi beşinci günleri târihleriyle müverrahalar İstanbul Mahkemesi’nden verilen iki kıt‘a hüccet-i şer‘iyye ve kethüdâ-yı mûmâ-ileyhin takdîm eylediği bir kıt‘a ilmühaber mantûklarınca yedimizde mülk ve hakkımız olmağla ben nısf hisse-i şâyi‘a-i âlât-ı gedik-i mezkûrun akd-i âti’z-zikrin sudûruna değin ber-minvâl-i muharrer mâlike olduğum on iki sehm hisse-i şâyi‘a-i mezkûreyi bi-safkatin vâhidetin dört bin beş yüz guruşa ve hâzır-ı merkūm Anaştaş dahi kezâlik nısf hisse-i şâyi‘a-i âlât-ı gedik-i mezkûrdan akd-i âti’z-zikrin sudûruna değin mâlik olduğu on dört sehm hisse-i şâyi‘asını kezâlik bi-safkatin vâhidetin beş bin beş yüz guruşa merkūm Vasil’in izniyle müvekkile-i merkūme Eleniko’ya bey‘ ve temlîk ve vech-i lâyıkıyla teslîm eylediğimizde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan cem‘an on bin guruşu tamâmen bize def‘ u teslîm biz dahi yedinden bi’t-tamâm ve’l-kemâl ahz u kabz edip mebî‘-i mezkûrların tağrîr ve gabnlarına müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik ba‘de’l-yevm nısf hisse-i şâyi‘a-i âlât-ı gedik-i mezkûrun on iki sehm hisse-i şâyi‘a-i merkūmesinde benim ve on dört sehm hisse-i şâyi‘a-i mezkûresinde hâzır-ı merkūm Anaştaş’ın aslâ ve kat‘â alâka ve medhalimiz kalmayıp cem‘an yirmi altı sehm hisse-i şâyi‘ası müvekkile-i merkūme Eleniko’nun mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 8 Ramazan sene 1279 Şuhûdü’l-hâl: Muhzır Feyzullah Ağa b. ( ), Muhzır Mustafa Ağa b. ( ), Muhzır Şakir Ağa b. ( ), Muhzır Süleyman Ağa b. ( ), ve gayruhum