İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 337 Hüküm no: 226 Orijinal metin no: [46b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Refeka ve Mezanto kardeşlerin kendilerine miras kalan bakkal dükkânını Enfiyeci Aron ve kardeşi İsak Yahudi’ye satmaları Yahudi bakkal mübâya‘ası 10000 guruş. Kaydı ihrâc şüd fî 21 Şa‘bân sene [12] 86 Kezâlik mahmiye-i İstanbul hısnı ebvâbından Balat kapısı dâhilinde el-Hâc İsa mahallesinde sâkin iken bundan mukaddem fevt olan teba‘a-i Devlet-i aliyye’nin Yahud milletinden Mordehay v. İsak v. Adam’ın verâseti teba‘a-i Devlet-i aliyye’den sulbî kebîr oğlu Kemal’a münhasıra ve ba‘dehû merkūm Kemal dahi fevt olup verâseti her biri teba‘a-i Devlet-i aliyye’den sadriye kebîre kızı Refeka ve Mezanto’ya münhasıra olduğu lede’ş-şer‘i’l-enver zâhir ve mütehakkık oldukdan sonra merkūmetân Refeka ve Mezanto taraflarından husûs-ı âti’l-beyânda vekîlleri olduğu şahıslarını bilirler teba‘a-i Devlet-i aliyye’nin Yahud milletinden Hekîm Avram v. Davit ve yine Hekîm Nesim v. Yosef şehâdetleriyle ber-nehc -i şer‘î sâbit olan teba‘a-i Devlet-i aliyye’den ve Yahud milletinden Ferrâş Merkado v. Avram meclis-i şer‘-i hatîrde her biri teba‘a-i Devlet-i aliyye’nin Yahud milletinden olduğu bâ-ilmühaber mütehakkık olan bâ‘iseyi’r-rakīm nefsinden asîl ve li-ebeveyn er karındaşı Enfiyeci Aron v. Şemanto taraflarından husûs-ı âti’l-beyânda tasdîka vekîl-i şer‘îsi İsak Yahudi muvâcehesinde bakkal esnâfının pazarbaşısı Ahmed Efendi b. Mustafa tarafından mürsel esnâf-ı merkūme çavuşu Aleksi v. Foti hâzır olduğu hâlde bi’l-vekâle ikrâr-ı tâm ve takrîr-i kelâm edip mahalle-i mezkûrede Dörtyolağzı’nda vâki‘ bir tarafdan Kasâb Salamon kasâb dükkânı ve bir tarafdan Canbazoğlu Kahvesi demekle arîf merkūmân Aron ve İsak Yahudilerin kahve dükkânı ve bir tarafdan Kazzâz Nesim dükkânı ve taraf-ı râbi‘i tarîk-i âm ile mahdûd Muhyiddin Fenârî Vakfı müsakkafâtından müvekkil-i merkūm Aron Yahudi ile merkūm İsak Yahudi’nin taht-ı tasarruflarında olan şehriye elli para kirâlı bir bâb Yahudi bakkal dükkânı derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûme müteveffâ-yı evvel merkūm Mordihay Yahudi’nin hayâtında ile’l-fevt bin iki yüz on üç senesi Recebü’l-ferdinin yedinci günü târihiyle müverraha İstanbul mahkemesi sicillinden muhrece işbu bir kıt‘a kayd-ı hüccet-i şer‘iyye ve pazarbaşı-yı mûmâ-ileyhin takdîm eylediği bir kıt‘a ilmühaber mantûklarınca yedinde müstakillen mülkü ve ba‘de fevtihî müvekkilelerim merkūmetân Refeka ve Mezanto’ya bi-tarîki’l-münasaha mevrûs olmağla ben müvekkilelerim merkūmetân Refeka ve Mezanto’nun akd-i âti’z-zikrin sudûruna değin ber-minvâl-i muharrer mâlike oldukları âlât-ı gedik-i mezkûru tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile on bin guruşa asîl ve vekîl ve müvekkil-i merkūmân Aron ve İsak Yahudilere seviyyen bi’l-vekâle bey‘ ve temlîk ve teslîm eylediğimde onlar dahi ber-vech-i muharrer iştirâ ve temellük ve tesellüm ve kabz u kabûl eylediklerinden sonra semeni olan meblağ-ı merkūm on bin guruşu tamamen bana def‘ u teslîm ben dahi yedlerinden bi’l-vekâle tamâmen ve kâmilen ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî bi’l-asâle ve izâfetle bi’l-vekâle ibrâ vü ıskāt eyledik ba‘de’l-yevm âlât-ı gedik-i mezkûrda müvekkilelerim merkūmetân Refeka ve Mezanto’nun aslâ ve kat‘â alâka ve medhalleri kalmayıp asîl ve vekîl ve müvekkil-i merkūmân Aron ve İsak’ın ale’l-iştirâki’s-seviy mülk-i müşterâları ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a. Fî 19 Ramazan sene 1279 Şuhûdü’l-hâl: Muhzır Feyzullah Ağa b. ( ), Muhzır Süleyman Ağa b. ( ), Muhzır Ahmed Ağa b. ( ), Muhzır Mustafa Ağa b. ( ), ve gayruhum