İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 338 Hüküm no: 227 Orijinal metin no: [46b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gergene bt. Eftim’in vefât eden kocası bakkal esnâfından Hacı Vasil v. Bali’den kendisine miras kalan yağcı bakkalı dükkânı hisselerini satması Vezneciler’de bakkal mübâya‘ası 4000 guruş Kezâlik vilâyet-i Anadolu’da medîne-i Kayseriye’ye muzâfe İncesu kasabasında sâkin iken bundan mukaddem fevt olan teba‘a-i Devlet-i aliyye’nin Rum milletinden ve bakkal esnâfından Haci Vasil v. Bali v. Adam’ın verâseti her biri teba‘a-i Devlet-i aliyye’den zevce-i metrûkesi Gergene bt. Eftim ile anası Madeleni bt. Nikola ve sulbî kebîr oğlu Haci Bali ve sulbiye kebîre kızları Marina ve Katerina ve Odine’ye münhasıra ve tashîh-i mesele-i mirâsları yüz yirmi sehimden olup sihâm-ı mezkûreden on beş sehmi merkūme Gergene’ye ve yirmi sehmi ümm-i merkūme Madeleni’ye ve otuz dört sehmi merkūm Bali’ye ve on yedişer sehimden elli bir sehmi dahi merkūmat Marina ve Katerina ve Odine’ye isâbeti lede’ş-şer‘i’l-enver zâhir ve mütehakkık oldukdan sonra şahsı ta‘rîf-i şer‘î ile mu‘arrefe olan merkūme Gergene meclis-i şer‘-i hatîrde mahmiye-i İstanbul’da Langa-i kebîr’de Bostaniçi nâm mahalde sâkine teba‘a-i Devlet-i aliyye’nin Rum milleti nisvânından olduğu bâ-ilmühaber mütehakkık olan bâ‘isetü’r-rakīm Magerine bt. Yakof tarafından husûs-ı âti’l-beyânda tasdîka vekîl-i şer‘îsi teba‘a-i Devlet-i aliyye’den ve esnâf-ı merkūmeden Petro v. Yuvan muvâcehesinde esnâf-ı merkūme pazarbaşısı Ahmed Efendi b. Mustafa tarafından mürsel vekîli esnâf-ı merkūme çavuşu Aleksi v. Kostandi ile her biri teba‘a-i Devlet-i aliyye’den ve esnâf-ı merkūmeden Sarâchâneli Bodos v. Ligor ve Irgadpazarlı Yasef v. Harzema ve Veznecilerli Venet v. Eftim ve Kulekapılı Sava v. Karagöz ve Langalı Yuvan v. Pretamos hâzır oldukları hâlde ikrâr-ı tâm ve takrîr-i kelâm edip mahmiye-i mezkûrede Vezneciler nâm mahalde vâki‘ bir tarafdan kasâb dükkânı ve bir tarafdan Said Bey konağı ve tarafeyni tarîk-i âm ile mahdûd şehriye sekiz buçuk guruş kirâlı Halil Paşa dükkânı demekle arîf bir bâb yağcı bakkalı dükkânı derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûmenin yüz yirmi sehm i‘tibârıyla otuz sehm hisse-i şâyi‘ası ber-vech-i vakfiyet ve altmış sehm hisse-i şâyi‘ası ber-vech-i mülkiyet âharların taht-ı tasarruflarında olup mâ‘adâ otuz sehm hisse-i şâyi‘ası dahi zevcim müteveffâ-yı merkūm Haci Vasil’in hayâtında ile’l-fevt bin iki yüz otuz altı senesi Recebü’l-ferdi’nin yirmi beşinci günü târihiyle müverraha ve ol târihde Dârü’l-hilâfeti’l-aliyye kādısı olan Arabzâde Mehmed Sadullah Efendi merhûmun imzâ ve hatemini hâviye işbu bir kıt‘a mübâya‘a hücceti ve pazarbaşı-i mûmâ-ileyhin takdîm eylediği bir kıt‘a ilmühaber mantûklarınca yedinde mülkü ve ba‘de fevtihî benimle verese-i sâire-i mezkûresine ber tashîh-i merkūm mevrûs olmağla ben âlât-ı gedik-i mezkûrun [47a] otuz sehm hisse-i şâyi‘a-i merkūmesinden akd-i âti’z-zikrin sudûruna değin ber tashîh-i merkūm irsen mâlike olduğum on beş sehm hisse-i şâyi‘asını tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ dört bin guruşa müvekkile-i merkūme Magerine’ye bey‘ ve temlîk ve vech-i lâyıkıyla teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm dört bin guruşu tamamen bana def‘ u teslîm ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik fîmâ-ba’d âlât-ı gedik-i mezkûrun otuz sehm hisse-i şâyi‘a-i mezkûresinin ber tashîh-i merkūm on beş sehm hisse-i şâyi‘a-i merkūmesinde benim aslâ ve kat‘â alâka ve medhalim kalmayıp müvekkile-i merkūme Magerine’nin mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 5 Rebî‘ülevvel sene 1279 Şuhûdü’l-hâl: Muhzır Mustafa Ağa b. ( ), Muhzır Süleyman Ağa b. ( ), Muhzır Feyzullah Ağa b. ( ), Muhzır Şakir Ağa b. ( ), ve gayruhum