İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 339 Hüküm no: 228 Orijinal metin no: [47a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haci Bali’nin vefât eden babası bakkal esnâfından Hacı Vasil v. Bali’den kendisine miras kalan yağcı bakkalı dükkânı hisselerini satması Vezneciler’de Bakkal mübâya‘ası 8000 guruş Kezâlik vilâyet-i Anadolu’da medîne-i Kayseriye’ye muzâfe İncesu kasabasında sâkin iken bundan mukaddem fevt olan teba‘a-i Devlet-i aliyye’nin Rum milletinden ve bakkal esnâfından Haci Vasil v. Bali v. Adam’ın verâseti her biri teba‘a-i Devlet-i aliyye’den zevce-i metrûkesi Gergene bt. Eftim ile anası Mağdeleni bt. Nikola ve sulbî kebîr oğlu Haci Bali ve sulbiye kebîre kızları Marina ve Katerina ve Odine’ye münhasıra ve tashîh-i mesele-i mirâsları yüz yirmi sehimden olup sihâm-ı mezkûreden on beş sehmi merkūme Gergene’ye ve yirmi sehmi ümm-i merkūme Mağdeleni’ye ve otuz dört sehmi merkūm Bali’ye ve on yedişer sehimden elli bir sehmi dahi merkūmât Marina ve Katerina ve Odine’ye isâbeti lede’ş-şer‘i’l-enver zâhir ve mütehakkık oldukdan sonra merkūm Bali meclis-i şer‘-i hatîrde mahmiye-i İstanbul’da Langa-i kebîr’de Bostaniçi nâm mahalde sâkine teba‘a-i Devlet-i aliyye’nin Rum milleti nisvânından olduğu ba ilmühaber mütehakkık olan bâ‘isetü’r-rakīm Magarine’nin babası ve tarafından husûs-ı âti’l-beyânda tasdîka vekîl-i şer‘îsi teba‘a-i Devlet-i aliyye’den ve esnâf-ı merkūmeden Yakof v. Yuvan muvâcehesinde esnâf-ı merkūme pazarbaşısı Ahmed Efendi tarafından mürsel esnâf-ı merkūme çavuşu Aleksi v. Kostandi ile her biri teba‘a-i Devlet-i aliyye’den ve esnâf-ı merkūmeden Sarâchâneli Bedros v. Ligor Irgadpazarlı Yasef v. Harzema ve Veznecilerli Venet v. Eftim ve Kulekapılı Sava v. Karagöz ve Langalı Yuvan v. Pretamos hâzır oldukları hâlde ikrâr-ı tâm ve takrîr-i kelâm edip mahmiye-i mezkûrede Vezneciler nâm mahalde vâki‘ bir tarafdan kasâb dükkânı ve bir tarafdan Said Bey konağı ve tarafeyni tarîk-i âm ile mahdûd şehriye sekiz buçuk guruş kirâlı Halil Paşa dükkânı demekle arîf bir bâb yağcı bakkalı dükkânı derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûmenin yüz yirmi sehm i‘tibârıyla otuz sehm hisse-i şâyi‘ası ber-vech-i vakfiyet ve altmış sehm hisse-i şâyi‘ası ber-vech-i mülkiyet âharların taht-ı tasarruflarında olup mâ‘adâ otuz sehm hisse-i şâyi‘ası dahi babam müteveffâ-yı merkūm Hacı Vasil’in hayâtında ile’l-fevt bin iki yüz otuz altı senesi Recebi’l-ferdinin yirmi beşinci günü târihiyle müverraha ve ol târihde Dârü’l-hilâfeti’l-aliyye kādısı olan Arabzâde Mehmed Sadullah Efendi merhûmun imzâ ve hateminihâviye işbu bir kıt‘a mübâya‘a hücceti ve pazarbaşı-yı mûmâ-ileyhin takdîm eylediği bir kıt‘a ilmühaber mantûklarınca yedinde mülkü ve ba‘de fevtihî benimle verese-i sâire-i mezkûresine ber tashîh-i merkūm mevrûs olmağla ben âlât-ı gedik-i mezkûrun otuz sehm hisse-i şâyi‘a-i mezkûresinden akd-i âti’z-zikrin sudûruna değin ber tashîh-i merkūm irsen mâlike olduğum otuz dört sehm hisse-i şâyi‘asını tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ sekiz bin guruşa müvekkile-i merkūme Magerine’ye bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm sekiz bin guruşu tamamen bana def‘ u teslîm ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik ba‘de’l-yevm âlât-ı gedik-i mezkûrun otuz sehm hisse-i şâyi‘a-i merkūmesinin ber tashîh-i merkūm otuz dört sehm hisse-i şâyi‘a-i mezkûresinde benim aslâ ve kat‘â alâka ve medhalim kalmayıp müvekkile-i merkūme Magerine’nin mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî Gurre-i Safer sene 1279 Şuhûdü’l-hâl: Eş-şahidune’s-sabıkūn