İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 341 Hüküm no: 229 Orijinal metin no: [47a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saide bt. Mehmed’in kocası çulha esnâfından Hacı Hüseyin Ağa b. Ebubekir’e eşya satması ve semeninden vazgeçmesi Husûs Husûs-ı âti’l-beyânın mahallinde ketb ü tahrîri için cânib-i şerî‘at-ı garrâdan bi’l-iltimâs me’zûnen irsâl olunan Kâtib es-Seyyid Hafız Osman Nuri Efendi mahmiye-i İstanbul’da Dragman kurbünde Tercümân Yunus mahallesinde vaki‘ Şerife Saide Hanım’ın sâkine olduğu menzile varıp zeyl-i kitâbda muharrerü’l-esâmî müslimîn huzûrlarında akd-i meclis-i şer‘-i Nebevî etdikde zâtı müslimûn-ı merkūmûn ta‘rîfleriyle ile mu‘arrefe olan mezbûre Şerife Saide Hanım bt. Mehmed meclis-i ma‘kūd-ı mezkûrda hâlâ zevci çulha esnâfından bâ‘isü’l-kitâb el-Hâc Hüseyin Ağa b. Ebubekir muvâcehesinde ikrâr-ı tâm ve takrîr-i kelâm edip akd-i âtiz’z-zikrin sudûruna değin yedimde emvâlim olup işbu meclis-i şer‘de mu‘âyene olunan mecmû‘u müsta‘mel yün memlû yedi minder ve kıtık memlû on iki çatma duvar yastığı ve yün memlû Moskov bezi üç döşek ve penbe memlû yedi basma yorgan ve yün memlû dört basma baş yastığı ve bir nuhâs cameşûy leğeni ve bir nuhâs lenger ve üç nuhâs sahan ma‘a kapak ve bir nuhâs tencere ve iki nuhâs şorba tası ve biri kumaş ve biri sevâyi ve biri altı parmak cem‘an üç entari ve biri kazmir ve ikisi sof cem‘an üç ferâce ve kaliçe seccâde ve üç aded havlu ve bir Pirinç hamam tası ve bir sepet sandığımı tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile zevcim mezbûr el-Hâc Hüseyin Ağa’ya bin guruş semen tesmiyesiyle bey‘ ve temlîk ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz u kabûl etdikden sonra semeni olan meblağ-ı mezkûr bin guruşun mutâlebesine müte‘allika da‘vâdan zevcim mezbûrun zimmetini ibrâ-yı sahîh-i şer‘î ile kabûlünü hâvî ibrâ vü ıskāt eyledim ba‘de’l-yevm eşyâ ve evânî-i nühâsiyye-i muharrere-i mezkûrede benim aslâ ve kat‘â alâka ve medhalim kalmayıp zevcim mezbûrun emvâl-i müşterâtı ve hakk-ı sırfı olmuşdur dedikde gıbbe’t-tasdîk vâki‘ hâli kâtib-i mûmâ-ileyh mahallinde ketb ü tahrîr ve ma‘anmeb‘ûs ümenâ-i şer‘le meclis-i şer‘a gelip alâ vukū‘ihi inhâ ve takrîr etmeğin mâ-vaka‘a bi’t-taleb ketb olundu. Fî 20 Ramazan sene 1279 Şuhûdü’l-hâl: Çulha Mustafa Ağa b. Mehmed ve mahalle-i merkūme ahâlisinden Çulha İpşir Ağa b. Ali ve muhtâr-ı sânîsi el-Hâc Abdullah Ağa b. Süleymanve muhtâr-ı evveli Ahmed Ağa b. el-Hâc İbrahim, Marrü’z-zikr Tercümân Yunus mahallesi Hafız Mehmed Kamil Efendi b. İbrahim, Muhzır Osman b. ( ), Çukadâr İbrahim b. ( ), ve gayruhum