İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 342 Hüküm no: 230 Orijinal metin no: [47a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşetü’s-sıdıka Hatun bt. Abddullah’ın Tevhide Hatun bt. Ali’ye eşya satması ve kocası Maltepe Hastahânesi eczâcısı Hacı Ahmed Efendi b. Abdullah’a saat hibe etmesi Husûs Husûs-ı âti’l-beyânın mahallinde ketb ü tahrîri için cânib-i şerî‘at-ı garrâdan bi’l-iltimâs me’zûnen irsâl olunan Kâtib es-Seyyid İsmail Arif Efendi mahmiye-i İstanbul’da Kaliçacılar köşkü kurbünde Molla Ali el-Fenârî mahallesinde sâkine Âişetü’s-sıdıka Hatun bt. Abdullah’ın sâkine olduğu menziline varıp zeyl-i vesîkada muharrerü’l-esâmî müslimîn huzûrlarında akd-i meclis-i şer‘-i âlî etdikde zâtı müslimûn-ı mezbûrûn ta‘rîfleriyle mu‘arrefe olan mezbûre Âişetü’s-sıdıka Hatun meclis-i ma‘kūd-ı mezkûrde kezâlik menzil-i mezkûrede sâkine zâtı müslimûn-ı mezbûrûn ta‘rîfleriyle mu‘arrefe olan işbu bâ‘isetü’l-vesîka Tevhide Hatun bt. Ali mahzarında mezbûre Tevhide Hatun’un hâlâ zevci Maltepe Hastahânesi eczâcısı el-Hâc Ahmed Efendi b. Abdullah hâzır olduğu hâlde ikrâr-ı tâm ve takrîr-i kelâm edip hibe-i atîyetü’z-zikrin sudûruna değin yedimde mâlım olup işbu mu‘âyene olan bir aded piryol? koyun sâ‘atimi hâzır-ı mezbûr el-Hâc Ahmed Efendi’ye hibe-i sahîha-i şer‘iyye ile hibe ve temlîk ve teslîm ve akd-i âti’z-zikrin sudûruna değin kezâlik yedimde emvâlim olan mecmû‘u müsta‘mel yün memlû bir minder ve bir basma mak‘ad ve yün memlû iki döşek ve ot memlû bir minder ve ot [47b] memlû basma on iki duvar yasdığı ve penbe memlû basma bir şilte ve yün memlû iki basma baş yasdığı ve basma penbe memlû dört yorgan ma‘a çârşeb basma penbe memlû iki yüz yasdığı ve köhne bir ihrâm mak‘ad ve altı ihrâm yasdık kılıfı ve bir halı seccâde ve siyah bir çuka ferâce ve siyah çukaya kaplu bir nafe kürk ve kendir bir aded orta keçesi ve bir nuhâs mangal ve nuhâs iki abdest leğeni ma‘a kapak ma‘a ibrik ve nuhâs sagīr üç tencere ma‘a kapak nuhâs iki çorba tası ve bir kapak ve nuhâs bir kuşhâne tenceresi mâa‘a kapak ve nuhâs sekiz sahan ma‘a kapak ve nuhâs iki tâbe ve iki nuhâs kadayif tepsisi ve nuhâs bir ta‘âm sinisi ve nuhâs bir cameşûy kazganımı tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile zevcim mezbûre Tevhide Hatun’a bin guruşa bey‘ ve temlîk ve teslîm eylediğimde onlar dahi ber-vech-i muharrer ittihâb ve iştirâ ve temellük ve tesellüm ve kabz u kabûl etdikden sonra semeni olan meblağ-ı mezkûr bin guruşu mezbûre Tevhide Hatun bana def‘ u teslîm eylediğinde ben dahi yedinden tamâmen ve kâmilen ahz u kabz edip mebî‘-i mezkûrun tağrîr vegabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile ibrâ vü ıskāt ve her birimiz ber-vech-i muharrer âharın ibrâsını kabûl eyledik, ba‘de’l-yevm mezkûr sâ‘at mezbûr el-Hâc Ahmed Efendi’nin mâl-ı mevhûbu ve eşyâ ve evânî-i nühâsiye ve gayr-i nuhâsiye-i muharrere-i mezkûre mezbûre Tevhide Hatun’un mülk-i müşterâsı ve hakk-ı sırfı olup benim aslâ ve kat‘â alâka ve medhalim kalmamıştır dedikde gıbbe’t-tesâdukı’ş-şer‘î vaki‘-i hâlî kâtib-i mûmâ-ileyh ilh. Fî 23 Ramazan sene 1279 Şuhûdü’l-hâl: Mahalle-i mezbûre imâmı Mehmed Salih Efendi b. Mehmed, Muhtâr-ı evveli Hasan Ağa b. Hasan, Muhtâr-ı sânîsi Mehmed Ali Ağa b. Hasan, Ahâlisinden el-Hâc Muharrem Efendi b. Osman, Es-Seyyid Mehmed Emin Efendi b. Mehmed, Lutfullah Efendi b. Mehmed, Hâfız Mehmed Efendi b. Mustafa Mehmed İzzet Efendi b. Mustafa, Ömer Ağa b. Ahmed, İsmail Ağa b. Osman Ömer Efendi b. Mehmed, Mahalle-i mezbûre bekçisi Mustafa bin Hasan, Çukadâr Ahmed Ağa b. ( ), Muhzır Süleyman Ağa b. ve gayruhum