İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 343 Hüküm no: 231 Orijinal metin no: [47b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Mehmed Tâli‘î Efendi’nin harâb françalacı fırınını Dimestoklu v. Petro ve Kesriyeli Viko v. Nikola’ya satması ve onların fırını başka bir yere taşımaları Ekmekçi gediği nakli Âsitâne-i sa‘âdet-âşiyâne ve bilâd-ı selâse mahkemelerine bâ-fermân-ı âlî mine’l-kadîm merbût olan duhâncı gediklerinden mâ‘adâ gerek Dersaâdet ve gerek bilâd-ı selâse-i mezkûrede kâin ber-vech-i mülkiyet tasarruf olunmakda bulunan her nev‘ gediklerin mübâya‘a ve ikrâr-ı mülk ve hibe ve irsen intikāl misillü kâffe-i mu‘âmelâtı ve vukū‘ bulan muhâkemâtı münhasıran ve mahsûsan İstanbul Mahkemesi’nden icrâ ve iktizâ eden i‘lâm ve hüccet-i şer‘iyyeleri ancak mahkeme-i mezkûre tarafından i‘tâ olunmak ve gedikât ashâbının rızâ ve muvâfakatları olmadıkça kadîm mülk kirâları tezyîd olunmamak ve senedât-ı sahîha ve mu‘tebere ile ber-vech-i mülkiyet tasarruf olunmakda bulunan gediklerin müstakır oldukları mahalden ihrâc ve imhâsı zımnında mülk sâhibleri tarafından da‘vâya tasaddî olunur ise hükkâm-ı şer‘-i şerîf cânibinden istimâ‘ olunmaması bâlâsı tuğrâ-yı garrâ-yı cihân-bânî ile muvaşşah ve müzeyyen bir kıt‘a nizâmnâme ve bâ-fermân-ı âlî müesses olan nizâm-ı müstahsene iktizâsından bulunduğuna binâen mahmiye-i İstanbul’da Koca Mustafa Paşa mahallesinde sâkin el-Hâc Mehmed Tâli‘î Efendi b. Mehmed meclis-i şer‘-i münîrde her biri teba‘a-i Devlet-i aliyye’den olduğu bâ-ilmühaber mütehakkık olan bâ‘iseyi’s-sifr Kalfa karyeli Dimestokluv. Petro ve Kesriyeli Viko v. Nikola muvâcehelerinde ekmekçi esnâfının kethüdâsı İbrahim Ağa b. Ahmed ile sâir mazbûtü’l-esâmî nizâm ustaları taraflarından mürsel esnâf-ı merkūme yiğitbaşısı es-Seyyid İsmail Efendi b. es-Seyyid Mehmed Emin hâzır olduğu hâlde ikrâr-ı tâm ve takrîr-i kelâm edip medîne-i Hazret-i Ebâ Eyüb el-Ensârî radiye anhu rabbühü’l-bârîde Nişancılar nâm mahalde kutbü’l-ârîfin şeyhü’l-Murâd el-Nakşibendî dergâhı karşısında vâki‘ bir tarafdan Geyikçayırı ve bir tarafdan bahçe ve tarafeyni tarîk-i âm ile mahdûd Emin-i şa‘îr-i esbak merhûm el-Hâc Süleyman Efendi Vakfı müsakkafâtından esnâf-ı merkūme nizâm ustalarından Rumelihisârlı es-Seyyid el-Hâc Süleyman Ağa b. es-Seyyid İlyas’ın bâ-temessük-i mütevelli bi’l-icâreteyn taht-ı tasarrufunda olan bir bâb harâb françalacı fırını derûnunda mevcûde beyne’l-esnâf gedik ta‘bîr olunur akd-i âti’z-zikrin sudûruna değin sene-i sâbıka yani bin iki yüz yetmiş sekiz senesi Rebî‘ülâhiri’nin on yedinci günü târihiyle müverraha ve ol târihde Dârü’l-hilâfeti’l-aliyye kādısı olan sudûr-ı izâmdan semâhatlü Mehmed Arif Hilmi Efendi hazretlerinin imzâ ve hatmlarını hâviye işbu bir kıt‘a mübâya‘a hücceti mantûkunca yedimde müstakillen mülk ve hakkım olan âlât-ı lâzime-i ma‘lûmeyi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-ilmühaber merkūmân Dimestoklu ve Viko’ya on üç bin guruşa ale’l-iştirâki’s-seviy bey‘ ve temlîk ve teslîm eylediğimde onlar dahi ber-vech-i muharrer seviyyen iştirâ ve temellük ve tesellüm ve kabz u kabûl edip âlât-ı gedik-i mezkûru mahmiye-i İstanbul hısnı ebvâbından Edirne kapısı dâhilinde Araboğlu dükkânı karşısında vâki‘ bir tarafdan Aşçı Anaştaş v. Adam’ın aşçı dükkânı ve bir tarafdan mukaddemâ sebzeci ve hâlâ Simon v. Dimitri’nin turşucu dükkânı ve bir tarafdan Aya Yorgi kilisesi duvarı ve taraf-ı râbi‘i tarîk-i âm ile mahdûd merhûm Rüstem Paşa Vakfı musakkafâtından bâ-temessük-i mütevelli bi’l-icâreteyn münâsefeten taht-ı tasarruflarında olan Kapalı bakkal dükkânı demekle arîf bir bâb mühterik bakkal dükkânı arsası üzerine inşâ eyledikleri âhar gedikden ârî olduğu işbu sene-i mübâreke şehr-i Rebî‘ülâhir’in on beşinci günü târihiyle müverrah Evkāf Muhâsebesi kaleminden İstanbul Mahkemesi’nden vürûd eden bir kıt‘a ilmühaber meâlinden müstebân olan bir bâb françalacı fırını derûnunda usûl ve nizâmı vechile nakl ve icrâya ta‘ahhüd eylediklerinden sonra semeni olan meblağ-ı merkūm on üç bin guruşu tamâmen bana def‘u teslîm ben dahi yedlerinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik ba‘de’l-yevm âlât-ı gedik-i mezkûrde benim aslâ ve kat‘â alâka ve medhalim kalmayıp merkūmân Dimestoklu ve Viko’nun ale’l-iştirâki’s-seviy mülk-i müşterâları ve hakk-ı sırfları olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 28 Ramazan sene 1279 Şuhûdü’l-hâl: Muhzır Ahmed Ağa b. ( ), Muhzır Süleyman Ağa b. ( ), Muhzır Şakir Ağa b. ( ), Muhzır Feyzullah Ağa b. ( ), ve gayruhum