İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 345 Hüküm no: 232 Orijinal metin no: [47b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yanmış bakkal dükkânının Dimestoklu v. Petro ve Kesriyeli Viko v. Nikola tarafından başka bir yere taşınması Gedik nakli Kezâlik her biri teba‘a-i Devlet-i aliyye’nin Rum milletinden Kalfa karyeli Dimestokluv. Petro ve Kesriyeli Viko v. Nikola meclis-i şer‘-i şerîf-i hatîrde mahmiye-i İstanbul’da Koca Mustafa Paşa mahallesinde sâkin bâ‘isü’l-kitâb el-Hâc Mehmed Tâli‘î Efendi b. Mehmed mahzarında bakkal esnâfının kethüdâsı Ahmed Efendi b. el-Hâc Mustafa ile mazbûtü’l-esâmî nizâm ustaları taraflarından mürsel esnâf-ı merkūme çavuşu Aleksi v. Kosti hâzır olduğu hâlde her biri ikrâr-ı tâm ve takrîr-i kelâm edip mahmiye-i mezkûre hısnı ebvâbından Edirne kapısı dâhilinde Araboğlu dükkânı karşısında vâki‘ bir tarafdan Aşçı Anaştaş v. Adam’ın aşçı dükkânı ve bir tarafdan mukaddemâ sebzeci ve hâlâ Simon v. Dimitri’nin turşucu dükkânı ve bir tarafdan Aya Yorgi kilisesi duvarı ve taraf-ı râbi‘i tarîk-i âm ile mahdûd merhûm Rüstem Paşa Vakfı musakkafâtından bizim bâ-temessük-i mütevelli bi’l-icâreteyn münâsefeten taht-ı tasarrufumuzda olan şehriye beş guruş kirâlı Kapalı bakkal dükkânı demekle arîf [48a] bir bâb mühterik bakkal dükkânı derûnunda müstahlas ve mevcûd beyne’l-esnâf gedik ta‘bîr olunur âlât-ı lâzime-i ma‘lûmenin yüz yirmi sehm i‘tibârıyla yetmiş beş sehm hisse-i şâyi‘ası ber-vech-i vakfiyet bizim bâ-temessük-i mütevelli bi’l-icâreteyn taht-ı tasarrufumuzda ve kırk beş sehm hisse-i şâyi‘ası dahi sene-i sâbıka yani bin iki yüz yetmiş sekiz senesi Cumâdelâhiresi’nin on beş ve on yedinci günleri târihleriyle müverrahalar ve ol tarihlerde Dârü’l-hilâfeti’l-aliyye kādısı olan sudûr-ı izâmdan semâhatlü Mehmed Arif Hilmi Efendi hazretlerinin imzâ ve hatmleriyle mahtûmeler işbu iki kıt‘a mübâya‘a hücceti mantûklarınca yedimizde seviyyen mülk ve hakkımız ve mahmiye-i İstanbul’da Koca Mustafa Paşa Hângâhı ittisâlinde kâin bir tarafdan Tütüncü Aleksi dükkânı ve bir tarafdan Fâtımatü’z-zehrâHanım’ın çömlekçi dükkânı ve bir tarafdan hângâh-ı mezkûr duvarı ve taraf-ı râbi‘i tarîk-i âm ile mahdûd âhar gedikden ârî bir bâb mühterik attâr dükkânı arsası merhûm-ı müşârün-ileyh Koca Mustafa Paşa Vakfı müsakkafâtından mûmâ-ileyh el-Hâc Mehmed Tâli‘î Efendi’nin bâ-temessük-i mütevelli bi’l-icâreteyn müstakillen taht-ı tasarrufunda olmağla biz arsa-i mezkûreyi şehriye yirmi guruş icâre tesmiyesiyle mûmâ-ileyh el-Hâc Mehmed Tâli‘î Efendi’den ba‘de’l-istîcâr izniyle teberru‘an li’l-vakf arsa-i mezkûre üzerine mâlımızdan bir bâb bakkal dükkânı binâ ve inşâ ve dükkân-ı mezkûr derûnuna ber-vech-i meşrûh mâlik ve mutasarrıf olduğumuz mecmû‘ âlât-ı gedik-i mezkûru usûl ve nizâmına tatbîkan nakl ve icrâ edip âlât-ı gedik-i mezkûr zikr olunan bakkal dükkânı derûnuna ber-minvâl-i muharrer nakl ve icrâ olunup mahall-i evvel-i mezkûrun kaydı terkîn ve mahall-i sânî-i mezkûrde mu‘teber ve müstakır olmak üzere işbu sene-i mübâreke şehr-i Rebî‘ülâhiri’nin on beşinci günü târihiyle müverrah Evkāf Muhâsebesi Kalemi’nden İstanbul mahkemesi tarafında[n] bir kıt‘a ilmühaber dahi vürûd etmekle biz âlât-ı gedik-i mezkûrdan ber-minvâl-i muharrer mâlik olduğumuz kırk beş sehm hisse-i şâyi‘a-i mezkûreyi bâ-ilmühaber tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safkat-i vâhide ile mûmâ-ileyh el-Hâc Mehmed Tâli‘î Efendi’ye bin guruşa bey‘ ve temlîk ve vech-i lâyıkıyla teslîm eylediğimizde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm bin guruşu tamamen bize def‘ u teslîm biz dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik ba‘de’l-yevm âlât-ı gedik-i mezkûrun kırk beş sehm hisse-i şâyi‘a-i merkūmesinde bizim aslâ ve kat‘â alâka ve medhalimiz kalmayıp mûmâ-ileyh el-Hâc Mehmed Tâli‘î Efendi’’nin mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 28 Ramazan sene 1279 Şuhûdü’l-hâl: Muhzır Ahmed Ağa b. ( ), Muhzır Şakir Ağa b. ( ), Muhzır Feyzullah Ağa b. ( ), Muhzır Süleyman Ağa b. ( ), ve gayruhum