İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 346 Hüküm no: 233 Orijinal metin no: [48a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun bt. Abdüsselam’ın kocası Hacı Ebubekir Ağa’dan miras kalan kârgîr tütüncü mağazası hissesini diğer mirasçılardan Hacı Mehmed Ağa’ya satması Tütüncü mübâya‘ası Kezâlik mahmiye-i İstanbul’da Aksaray kurbünde Gureba Hüseyin Ağa mahallesinde sâkin iken bundan mukaddem vefât eden duhân tüccârından el-Hâc Ebubekir Ağa b. Ali bin Molla Osman’ın verâseti zevce-i menkûha-i metrûkeleri Âişe Hatun bt. Abdüsselam ve Emine Hürmüz Hatun bt. Abdullah ile mezbûre Emine Hürmüz Hatun’dan mütevellidler sulbî kebîr oğulları tütüncü esnâfından el-Hâc Mehmed Ağa ve Ahmed Emin Ağa’ya münhasıra ve tashîh-i mesele-i mirâsları on altı sehimden olup sihâm-ı mezkûreden birer sehimden iki sehmi zevcetân-ı mezbûretân Âişe Hatun ve Emine Hürmüz Hatun’a ve yedişer sehimden on dört sehmi dahi mezbûrân el-Hâc Mehmed Ağa ve Ahmed Emin Ağa’ya isâbeti lede’ş-şer‘î’l-enver zâhir ve mütehakkık oldukdan sonra zâtı ta‘rîf-i şer‘î ile mu‘arrefe olan mezbûre Âişe Hatun meclis-i şer‘-i şerîf-i enverde bâ‘isü’l-kitâb mezbûr el-Hâc Mehmed Ağa mahzarında tütüncü esnâfının kethüdâsı es-Seyyid el-Hâc Mehmed Latif Efendi b. İsmail ile mazbûtü’l-esâmî on nefer müslim ve beş nefer hıristiyan lonca ihtiyârları taraflarından mürsel kethüdâ vekîli Ahmed Efendi b. Osman hâzır olduğu hâlde ikrâr-ı tâm ve takrîr-i kelâm edip mahmiye-i mezkûrede Duhân Gümrüğü kurbünde Tuzcular sûkunda mukaddemâ maliye kalemi baş halifesiyle Mihal dükkânları beynlerinde ve el-yevm bir tarafdan duhân tüccârından Hâcıpaşazâde el-Hâc Ahmed Efendi mağazası ve bir tarafdan yine tüccâr-ı mezkûreden Hüsnü Efendi mağazası ve bir tarafdan yine tüccâr-ı merkūmeden Nikola arsası ve taraf-ı râbi‘i tarîk-i âm ile mahdûd merhûm Rüstem Paşa Vakfı musakkafâtından zevcim müteveffâ-yı merkūm el-Hâc Ebubekir Ağa’dan müntakil mezbûrân el-Hâc Mehmed Ağa ve Ahmed Emin Ağa’nın bâ-temessük-i mütevelli bi’l-icâreteyn taht-ı tasarruflarında olan şehriye beş guruş kirâlı fevkinde iki bâb odayı müştemil bir bâb kârgîr tütüncü mağazası derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûme müteveffâ-yı mezbûr el-Hâc Ebubekir Ağa’nın hayâtında ile’l-vefât bin iki yüz elli dört senesi Recebi’l-ferdinin on dördüncü günü târihiyle müverraha ve ol târihde evkāf müfettişi olan Mehmed Emin Asaf Beyefendi merhûmun imzâ ve hatemini hâviye bir kıt‘a ve sene-i merkūme Şevvali’l-mükerreminin dokuzuncu günü târihiyle müverraha ve ol târihde Dârü’l-hilâfeti’l-aliyye kādısı olan sudûr-ı izâmdan Reîsü’l-küttâb Arif Efendizâde Mehmed Raif Beyefendi merhûmun imzâ ve hatemini hâviye bir kıt‘a ki cem‘an iki kıt‘a mübâya‘a hücceti ve kethüdâ-yı mûmâ-ileyhin takdîm eylediği bir kıt‘a ilmühaber mantûklarınca yedinde müstakillen mülkü ba‘de vefâtihî ber tashîh-i mezkûr benimle mezbûrûn Emine Hürmüz Hatun ve el-Hâc Mehmed Ağa ve Ahmed Emin Ağa’ya mevrûs olmağla ben âlât-ı gedik-i mezkûrdan ber-minvâl-i muharrer mâlike olduğum bir sehm hisse-i şâyi‘a-i mezkûreyi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şerîkân-ı mezbûrân beş bin guruşa mezbûr el-Hâc Mehmed Ağa’ya bey‘ ve temlîk ve vech-i lâyıkıyla teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm beş bin guruşu tamâmen bana def‘ u teslîm ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik ba‘de’l-yevm âlât-ı gedik-i mezkûrun ber tashîh-i merkūm bir sehm hisse-i şâyi‘a-i mezkûresinde benim aslâ ve kat‘â alâka ve medhalim kalmayıp yedi sehm hisse-i şâyi‘ası mukaddemâ irsen ve bir sehm hisse-i şâyi‘ası bu def‘a şirâen ki cem‘an sekiz sehm hisse-i şâyi‘ası mezbur el-Hâc Mehmed Ağa’nın mülk-i mahzı ve hakk-ı sırfı olmuşdur dedikde gıbbe. Fî Gurre-i Şa‘bân sene 1279 Şuhûdü’l-hâl: Muhzır Ahmed Ağa b. ( ), Muhzır Feyzullah Ağa b. ( ), Muhzır Şakir Ağa b. ( ), Muhzır Mustafa Ağa b. ( ), ve gayruhum