İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 348 Hüküm no: 234 Orijinal metin no: [48a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun bt. Abdüsselam’ın kocası Hacı Ebubekir Ağa’dan kalan tütüncü dükkânı hissesini Hacı Mehmed Ağa’ya satması Tütüncü mübâya‘ası. Kaydı ihrâc şüd fî Gurre-i Rebi’ulâhir sene [1]290 Kezâlik mahmiye-i İstanbul’da Aksaray kurbünde Gureba Hüseyin Ağa mahallesinde sâkin iken bundan mukaddem vefât eden duhân tüccârından el-Hâc Ebubekir Ağa b. Ali bin Molla Osman’ın verâseti zevce-i menkûha-i metrûkeleri Âişe Hatun bt. Abdüsselam ve Emine Hürmüz Hatun bt. Abdullah ile mezbûre Emine Hürmüz Hatun’dan mütevellidler sulbî kebîr oğulları tütüncü esnâfından el-Hâc Mehmed Ağa ve Ahmed Emin Ağa’ya münhasıra ve tashîh-i mesele-i mirâsları on altı sehimden olup sihâm-ı mezkûreden birer sehimden iki sehmi zevcetân-ı mezbûretân Âişe Hatun ve Emine Hürmüz Hatun’a ve yedişer sehimden on dört sehmi dahi mezbûrân el-Hâc Mehmed Ağa ve Ahmed Emin Ağa’ya isâbeti lede’ş-şer‘î’l-enver zâhir ve mütehakkık oldukdan sonra zâtı ta‘rîf-i şer‘î ile mu‘arrefe olan mezbûre Âişe Hatun meclis-i şer‘-i şerîf-i enverde bâ‘isü’l-kitâb mezbûr el-Hâc Mehmed Ağa mahzarında tütüncü esnâfının kethüdâsı es-Seyyid el-Hâc Mehmed Latif Efendi b. İsmail ile mazbûtü’l-esâmî on nefer müslim ve beş nefer hıristiyan lonca ihtiyârları taraflarından mürsel kethüdâ vekîli Ahmed Efendi b. Osman hâzır olduğu hâlde ikrâr-ı tâm ve takrîr-i kelâm edip mahmiye-i mezkûrede Kapan-ı Dakîk kapısı hâricinde Baklacıoğlu [48b] şerbethânesi karşısında berber ve enfiyeci dükkânları beynlerinde vâki‘ Eshâm Muhâsebesi kaleminde esnâf-ı merkūmeden Küçük Yorgi v. Dimitri ismine mukayyed şehriye beş guruş kirâlı bir bâb vakf tütüncü dükkânı derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûmenin nısf hisse-i şâyi‘ası âharın yedinde mülkü olup mâ‘adâ âhar nısf hisse-i şâyi‘ası dahi zevcim müteveffâ-yı mezbûr el-Hâc Ebubekir Ağa’nın hayâtında ile’l-vefât bin iki yüz altmış dört senesi Muharremü’l-harâmının altıncı günü târihiyle müverraha İstanbul mahkemesi sicillinden muhrece işbu bir kıt‘a kayd-ı hâmiş-i hüccet-i şer‘iyye ve kethüdâ-yı mûmâ-ileyhin takdîm eylediği bir kıt‘a ilmühaber mantûklarınca yedinde müstakillen mülkü ve ba‘de vefâtihî ber tashîh-i merkūm benimle mezbûrûn Emine Hatun ve el-Hâc Mehmed Ağa ve Ahmed Emin Ağa’ya mevrûs olmağla ben âlât-ı gedik-i mezkûrun nısf hisse-i şâyi‘a-i merkūmesinde akd-i âti’z-zikrin sudûruna değin ber-minvâl-i muharrer mâlike olduğum bir sehm hisse-i şâyi‘a-i mezkûreyi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şerîkân-ı mezbûrân iki bin guruşa mezbûr el-Hâc Mehmed Ağa’ya bey‘ ve temlîk ve vech-i lâyıkıyla teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm iki bin guruşu tamâmen bana def‘ u teslîm ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik ba‘de’l-yevm nısf hisse-i şâyi‘a-i âlât-ı gedik-i mezkûrun ber tashîh-i merkūm bir sehm hisse-i şâyi‘a-i merkūmesinde benim aslâ ve kat‘â alâka ve medhalim kalmayıp yedi sehm hisse-i şâyi‘ası mukaddemâ irsen ve bir sehm hisse-i şâyi‘ası bu def’a şirâen ki cem‘an sekiz sehm hisse-i şâyi‘ası mezbur el-Hâc Mehmed Ağa’nın mülk-i mahzı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî Gurre-i Şa‘bân sene 1279 Şuhûdü’l-hâl: Eş-şahidune’s-sabıkūn