İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 349 Hüküm no: 235 Orijinal metin no: [48b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Hatun bt. Hacı Hafız Ali’nin tütüncü dükkânı hisselerini Hacı Haydar Ağa b. Abdullah’a satması Tütüncü mübâya‘ası Kezâlik mahmiye-i İstanbul’da Zeyrek kurbünde Hızır Bey mahallesinde sâkin iken bundan mukaddem vefât eden kabahasırcı esnâfından el-Hâc Mustafa Ağa b. Mehmed bin Abdullah’ın verâseti zâhirde zevce-i menkûha-i metrûkesi Emine Hatun bt. el-Hâc Hafız Ali’den gayri vâris ve vârisesi olmamağla bi’l-cümle terekesinin rub‘u zevce-i mezbûre Emine Hatun’a ve selâse-i erbâ‘ı cânib-i beytü’l-mâla âid ve râci‘ olduğu lede’ş-şer‘i’l-enver zâhir ve mütehakkık oldukdan sonra zâtı ta‘rîf-i şer‘î ile mu‘arrefe olan mezbûre Emine Hatun meclis-i şer‘-i hatîrde esnâf-ı merkūmeden bâ‘isü’l-kitâb el-Hâc Haydar Ağa b. Abdullah mahzarında tütüncü esnâfının kethüdâsı el-Hâc Mehmed Abdüllatif Efendi b. İsmail ile duhân tüccârından mazbûtü’l-esâmî on nefer müslim ve beş nefer hıristiyan lonca ihtiyârları taraflarından mürsel kethüdâ vekîli Ahmed Efendi Efendi b. Osman hâzır olduğu halde ikrâr-ı tâm ve takrîr-i kelâm edip mahmiye-i mezkûrede At pazarı civârında Destgâhcılar içinde berber ve sucu dükkânları beynlerinde kâin Eshâm Muhâsebesi kaleminde Salih Ağa ismine mukayyed şehriye yüz para kirâ-yı kadîmelü bir bâb tütüncü dükkânı derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûmenin dört sehm i‘tibârıyla üç sehm hisse-i şâyi‘ası benim ve bir sehm hisse-i şâyi‘ası dahi zevcim müteveffâ-yı mezbûr el-Hâc Mustafa Ağa’nın hayâtında ile’l-vefât yedimizde olup bin iki yüz altmış iki senesi Muharremi’nin yedinci günü târihiyle müverraha ve ol târihde Dârü’l-hilâfeti’l-aliyye kādısı olan sudûr-ı izâmdan Sirozîzâde semâhatlü es-Seyyid Mehmed Tahir Efendi hazretlerinin imzâ ve hatemini hâviye işbu bir kıt‘a hüccet ve bin iki yüz yetmiş beş senesi Rebî‘ülâhiri’nin beşinci günü târihiyle müverraha ve ol târihde dârü’s-saltanati’s-seniyye kādısı olan sudûr-ı izâmdan semâhatlü Mustafa Asım Efendi hazretlerinin imzâ ve hatemini hâviye işbu diğer bir kıt‘a hüccet-i şer‘iyye ve kethüdâ-yı mûmâ-ileyhin takdîm eylediği bir kıt‘a ilmühaber mantûklarınca yedimizde mülk ve hakkımız olup ve zevcim mezbûr el-Hâc Mustafa Ağa vefât etdikde âlât-ı gedik-i mezkûrdan ber-minvâl-i muharrer mâlik olduğu bir sehm hisse-i şâyi‘asını rub‘ hisse-i şâyi‘ası bana mevrûs ve selâse-i erbâ‘ hisse-i şâyi‘ası dahi cânib-i beytü’l-mâla âid ve râci’ olmağla ben âlât-ı gedik-i mezkûrdan akd-i âti’z-zikrin sudûruna değin ber-vech-i muharrer mâlike olduğum üç sehm hisse-i şâyi‘a-i mezkûr ile bir sehm hisse-i şâyi‘a-i mezkûreden dahi kezâlik mâlike olduğum rub‘ hisse-i şâyi‘amı tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile dört bin guruşa mezbûr el-Hâc Haydar Ağa’ya bey‘ ve temlîk ve vech-i lâyıkıyla teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl etdikden sonra semeni olan meblağ-ı merkūm dört bin guruşu tamâmen bana def‘ u teslîm ben dahi yedinden bi’t-tamâm ve’l-kemâl ahz u kabz eyledim ba‘de’l-yevm âlât-ı gedik-i mezkûrun üç sehm hisse-i şâyi‘asıyla bir sehm hisse-i şâyi‘asının rub‘ hisse-i şâyi‘a-i mezkûresinde benim aslâ ve kat‘â alâka ve medhalim kalmayıp mezbûr el-Hâc Haydar Ağa’nın mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 6 Ramazan sene 1279 Şuhûdü’l-hâl: Eş-şahidune’s-sabıkūn