İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 350 Hüküm no: 236 Orijinal metin no: [48b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tütün tüccârından Kostaki v. Arsin’in tütüncü dükkânını Avrupa tüccârından Sekpas v. Serkiz’e satması Tütüncü mübâya‘ası 50000 guruşa Kezâlik teba‘a-i Devlet-i aliyye’nin Rum milletinden ve duhân tüccârından Kostaki v. Arsin meclis-i şer‘-i hatîrde teba‘a-i Devlet-i aliyye’nin Ermeni milletinden ve berâtlı Avrupa tüccârından bâ‘isü’r-rakīm Sekpas v. Serkiz muvâcehesinde tütüncü esnâfının kethüdâsı es-Seyyid el-Hâc Mehmed Abdüllatif Efendi b. İsmail ile duhân tüccârından mazbûtü’l-esâmî on nefer müslim ve beş nefer hıristiyan lonca ihtiyârları taraflarından mürsel kethüdâ vekîli Ahmed Efendi b. Osman hâzır olduğu halde ikrâr-ı tâm ve takrîr-i kelâm edip mahmiye-i İstanbul’da Ketencilarbaşı’nda Sabuncu Hanı sırasında vâki‘ bir tarafdan süpürgeci dükkânı ve bir tarafdan mukaddemâ misk yağcı ve hâlâ sahtiyancı dükkânı ve bir tarafdan Kârgîr Hân ve taraf-ı râbi‘i tarîk-i âm ile mahdûd Süpürgeci el-Hâc İbrahim Ağa’nın taht-ı tasarrufunda olan şehriye yedi buçuk guruş kirâlı Eshâm Muhâsebesi kaleminde Musa Ağa ismine mukayyed bir bodrumu müştemil bir bâb kârgîr vakıf tütüncü dükkânı derûnunda mevcûde beyne’l-esnâf gedik ta‘bîr olunur akd-i âti’z-zikrin sudûruna değin bin iki yüz altmış iki senesi Zilhicceti’ş-şerîfesinin on sekizinci günü tarihiyle müverraha ve ol târihde Dârü’l-hilâfeti’l-aliyye kādısı olan Kahvecibaşızâde Mehmed Nurullah Efendi merhûmun imzâ ve hatemini hâviye işbu bir kıt‘a mübâya‘a hücceti ve kethüdâ-yı mûmâ-ileyhin takdîm eylediği bir kıt‘a ilmühaber mantûklarınca yedimde müstakillen mülk ve hakkım olan âlât-ı lâzime-i ma‘lûmeyi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile elli bin guruşa merkūm Sekbas’a bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm elli bin guruşu tamâmen bana def‘ u teslîm ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik ba‘de’l-yevm âlât-ı gedik-i mezkûrde benim aslâ ve kat‘â alâka ve medhalim kalmayıp merkūm Sekbas’ın mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a. Fî 9 Şa‘bân sene 1279 Şuhûdü’l-hâl: Eş-şahidune’s-sabıkūn