İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 351 Hüküm no: 237 Orijinal metin no: [49a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi esnâfından Karabet v. Kirkor’un francalacı fırını ve fırına bağlı yanmış değirmendeki hisselerini Kigork v. Artin’e satması ve devlete olan borçlarının ödenmesi Françalacı fırını mübâya‘ası 14833 guruş Kezâlik teba‘a-i Devlet-i aliyye’nin Ermeni milletinden ve habbâz esnâfından Karabet v. Kirkor meclis-i şer‘-i şerîf-i hatîrde teba‘a-i Devlet-i aliyye’nin Ermeni milletinden olduğu bâ-ilmühaber mütehakkık olan esnâf-ı merkūmeden bâ‘isü’r-rakīm Kigork v. Artin muvâcehesinde esnâf-ı merkūme kethüdâsı İbrahim Ağa b. Ahmed ile sâir mazbûtü’l-esâmî nizâm ustaları taraflarından mürsel Yiğitbaşı es-Seyyid İsmail Efendi b. Seyyid Mehmed Emin hâzır olduğu hâlde ikrâr-ı tâm ve takrîr-i kelâm edip medîne-i Üsküdar’da Ahmediye civârında vâki‘ bir tarafdan Mûytâb el-Hâc Mahmud menzili ve bir tarafdan mukaddemâ hân ve hâlâ doğramacı dükkânı ve tarafeyni tarîk-i âm ile mahdûd merhûm Eminzâde el-Hâc Ahmed Ağa Vakfı müsakkafâtından Hâcce Âişe Hanım bt. Abdullah ile esnâf-ı merkūmeden Sahak v. Artin ve Siron v. Avanis tasarruflarında olan şehriye yirmi altı guruş kirâlı Kızlarağası Fırını demekle arîf bir bâb francalacı fırını derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûmenin yüz yirmi sehm i‘tibârıyla yüz sehm hisse-i şâyi‘ası âharların yedlerinde mülkleri olup mâ‘adâ yirmi sehm hisse-i şâyi‘ası bin iki yüz elli dokuz senesi Muharremü’l-harâmının on sekizinci günü târihiyle müverraha ve ol târihde Dârü’l-hilâfeti’l-aliyye kādısı olan sudûr-ı izâmdan Gelenbevîzâde Mehmed Said Efendi merhûmun imzâ ve hatemini hâviye işbu bir kıt‘a hüccet-i şer‘iyye ve bin iki yüz yetmiş senesi Cumâdelâhiresinin yirmi altıncı günü târihiyle müverraha ve ol târihde Dârü’s-saltanati’s-seniyye kādısı olan sudûr-ı izâmdan İsmet Beyzâde semâhatlü Abdullah Refet Beyefendi hazretlerinin imzâ ve hatemini hâviye işbu diğer bir kıt‘a hüccet-i şer‘iyye ve fırın-ı mezkûre merbût fırın-ı mezkûr karşısında kâin bir tarafdan Hâcce Havva Hanım menzili ve bir tarafdan Kolağası Ahmed Ağa menzili ve ba‘zen bakkal esnâfından Limbo’nun bakkal dükkânı ve tarafeyni tarîk-i âm ile mahdûd merhûm-ı mûmâ-ileyh el-Hâc Ahmed Ağa Vakfı müsakkafâtından merkūmân Sahak ve Siro’nun tasarruflarında olan şehriye otuz guruş kirâlı altı horoslu bir bâb mühterik değirmen derûnundan müstahlas ve mevcûd beyne’l-esnâf gedik ta‘bîr olunur yirmi dört re’s bârgir ve onlara tâbi‘ sâir âlât-ı lâzime-i ma‘lûmenin on dokuz re’s bârgir ve onlara isâbet eden âlât-ı sâiresi âharların yedlerinde mülkleri olup mâ‘adâ beş re’s bârgir ve onlara îcâbeden âlât-ı sâiresi dahi bin iki yüz altmış dokuz senesi Cumâdeleûlâsının yirmi ikinci günü târihiyle müverraha ve ol târihde Dârü’l-hilâfeti’l-aliyye kādısı olan sudûr-ı izâmdan Yasincizâde semâhatlü es-Seyyid Mehmed İlmi Efendi hazretlerinin imzâ ve hatmlarını hâviye işbu bir kıt‘a hüccet-i şer‘iyye ve kethüdâ-yı mûmâ-ileyhin takdîm eylediği bir kıt‘a ilmühaber mantûklarınca akd-i âti’z-zikrin sudûruna değin yedimde mülk ve hakkım olmağla ben fırın-ı mezkûr gediği âlâtından ber-minvâl-i muharrer mâlik olduğum yirmi sehm hisse-i şâyi‘asını bi-safkatin vâhidetin dokuz bin sekiz yüz otuz üç guruşa ve değirmen-i mezkûr gediği âlâtından kezâlik ber-minvâl-i muharrer mâlik olduğum beş re’s bârgir ve onlara îcâb eden âlât-ı sâiresini bi-safkatin vâhidetin beş bin guruşa tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ile bâ-izn-i şürekâ merkūm Kigork’a bey‘ ve temlîk ve vech-i lâyıkıyla teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra benim cânib-i mîrîye zimmetimde sekiz yüz otuz üç guruş deynim olmağla mebî‘âyn-ı mezkûreynin semenleri olan cem‘an on dört bin sekiz yüz otuz üç guruşun sekiz yüz otuz üç guruşunu deyn-i mezkûruma mahsûben mahallinde kabza memûre edâ ve teslîm etmek üzere merkūm Kigork’a emr ve tarafımdan tevkîl eylediğimde ol dahi kabûl ve ber-vech-i meşrûh edâ-i deyne ta‘ahhüd edip semen-i mezkûrun mâ’adâsı olan on dört bin guruşunu tamâmen bana def‘ u teslîm ben dahi yedinden tamâmen ve kâmilen ahz u kabz edip mebî‘-i mezkûrların tağrîr ve gabnlarına müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik ba‘de’l-yevm fırın-ı mezkûr gediği alâtının yirmi sehm hisse-i şâyi‘a-i mezkûresiyle değirmen-i mezkûr gediği alâtının beş re’s bârgir ve onlara îcâb eden âlât-ı sâiresinde benim aslâ ve kat‘â alâka ve medhalim kalmayıp merkūm Kigork’un mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 26 Muharrem sene 1279 Şuhûdü’l-hâl: Muhzır Mustafa Ağa b. ( ), Muhzır Ahmed Ağa b. ( ), Muhzır Şakir Ağa b. ( ), Muhzır Süleyman Ağa b. ( ), ve gayruhum