İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 353 Hüküm no: 238 Orijinal metin no: [49a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi esnâfından Kigork v. Artin’in francalacı fırını ve fırına bağlı yanmış değirmendeki hisselerinin bir kısmını Sahak v. Artin’e satması ve borçlarının ödenmesi Françalacı fırını Kezâlik teba‘a-i Devlet-i aliyye’nin Ermeni milletinden ve habbâz esnâfından Kigork v. Artin meclis-i şer‘-i şerîf-i hatîrde teba‘a-i Devlet-i aliyye’nin Ermeni milletinden olduğu bâ-ilmühaber mütehakkık olan esnâf-ı merkūmeden bâ‘isü’r-rakīm Sahak v. Artin muvâcehesinde esnâf kethüdâsı İbrahim Ağa b. Ahmed ile sâir mazbûtü’l-esâmî nizâm ustaları taraflarından mürsel Yiğitbaşı es-Seyyid İsmail Efendi b. es-Seyyid Mehmed Emin hâzır olduğu hâlde ikrâr-ı tâm ve takrîr-i kelâm edip medîne-i Üsküdar’da Ahmediye civârında vâki‘ bir tarafdan Mûytâb el-Hâc Mahmud menzili ve bir tarafdan mukaddemâ hân ve hâlâ doğramacı dükkânı ve tarafeyni tarîk-i âm ile mahdûd merhûm Eminzâde el-Hâc Ahmed Ağa Vakfı müsakkafâtından Hâcce Âişe Hanım bt. Abdullah ile merkūm Sahak ve Siron v. Avanis’in taht-ı tasarruflarında olan şehriye yirmi altı guruş kirâlı Kızlarağası Fırını demekle arîf bir bâb françalacı fırını derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûmenin yüz yirmi sehm i‘tibârıyla yüz sehm hisse-i şâyi‘ası âharların yedlerinde mülkleri olup mâ‘adâ yirmi sehm hisse-i şâyi‘ası benim ve fırın-ı mezkûre merbût fırın-ı mezkûr karşısında kâin bir tarafdan Hâcce Havva Hatun menzili ve bir tarafdan Kolağası Ahmed Ağa menzili ve ba‘zen bakkal esnâfından Limbo’nun bakkal dükkânı ve tarafeyni tarîk-i âm ile mahdûd merhûm-ı mûmâ-ileyh el-Hâc Ahmed Ağa Vakfı müsakkafâtından merkūm Sahak ile merkūm Siro’nun taht-ı tasarruflarında olan şehriye otuz guruş kirâlı altı horoslu bir bâb mühterik değirmen derûnunda müstahlas ve mevcûd beyne’l-esnâf gedik ta‘bîr olunur yirmi dört re’s bârgir ve onlara tâbi‘ sâir âlât-ı lâzime-i ma‘lûmenin on dokuz re’s bârgir ve onlara isâbet eden âlât-ı sâiresi âharların yedlerinde mülkleri olup mâ‘adâ beş re’s bârgir ve onlara îcâb eden âlât-ı sâiresi dahi benim akd-i âti’z-zikrin sudûruna değin şehr-i sâbık Muharremü’l-harâmının yirmi altıncı günü târihiyle müverraha İstanbul Mahkemesi’nden verilen işbu bir kıt‘a mübâya‘a hücceti nâtıka olduğu üzere yedimde mülk [49b] ve hakkım olmağla ben fırın-ı mezkûr gediği âlâtından ber-minvâl-i muharrer mâlik olduğum yirmi sehm hisse-i şâyi‘amın on sehm hisse-i şâyi‘asını yedimde bi’l-ibkā mâ‘adâ on sehm hisse-i şâyi‘asını bi-safkatin vâhidetin dört bin dokuz yüz on altı buçuk guruşa ve değirmen-i mezkûr gediği âlâtından ber vech-i meşrûh mâlik olduğum beş re’s bârgir ve onlara isâbet eden âlât-ı sâirenin iki re’s bârgir on iki mıh ve onlara îcâbeden âlât-ı sâiresini yedimde bi’l-ibkā ma‘adâ ik re’s bârgir on iki mıh ve onlara iktizâ eden âlât-ı sâiresini bi-safkatin vâhidetin iki bin beş yüz guruşa tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve bâ-izn-i şürekâ ve bâ-ilmühaber merkūm Sahak’a bey‘ ve temlîk ve vech-i lâyıkıyla teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra benim cânib-i mîrîye zimmetimde sekiz yüz otuz üç guruş deynim olmağla mebî‘ayn-ı mezkûreynin semenleri olan cem‘an yedi bin dört yüz on altı buçuk guruşun dört yüz on altı buçuk guruşunu deyn-i mezkûrumun ol mikdârına mahsûben kabza memûrîne edâ ve teslîm etmek üzere merkūm Sahak’a emr ve tarafımdan tevkîl eylediğimde ol dahi kabûl ve ber-vech-i meşrûh edâ-i deyne ta‘ahhüd edip semen-i mezkûrun mâ’adâsı olan yedi bin guruşunu tamâmen bana def‘ u teslîm ben dahi yedinden tamâmen ahz u kabz edip mebî‘-i mezkûrların tağrîr ve gabnlarına müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik ba‘de’l-yevm fırın-ı mezkûr gediği alâtının on sehm hisse-i şâyi‘a-i mezkûresiyle değirmen-i mezkûr gediği alâtının iki re’s bârgir on iki mıh ve onlara iktizâ eden âlât-ı sâiresinde benim aslâ ve kat‘â alâka ve medhalim kalmayıp merkūm Sahak’ın mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 3 Safer sene 1279 Şuhûdü’l-hâl: Muhzır Süleyman Ağa b. ( ), Muhzır Mustafa Ağa b. ( ), Muhzır Feyzullah Ağa b. ( ), Muhzır Ahmed Ağa b. ( ), ve gayruhum