İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 354 Hüküm no: 239 Orijinal metin no: [49b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yazıcı Hasan Efendi’nin ekmekçi fırını ve ona bağlı değirmendeki hisselerinin bir kısmını Seyyid Abdülhalim Ağa satması ve borçlarının ödenmesi Ekmekçi fırını Kezâlik Yazıcı Şerif Hasan Efendi b. es-Seyyid el-Hâc Osman meclis-i şer‘-i münîrde bâ‘isü’l-kitâb es-Seyyid Abdülhalim Ağa b. Süleyman mahzarında ekmekçi esnâfının kethüdâsı İbrahim Ağa b. Ahmed ile sâir mazbûtü’l-esâmî nizâm ustaları taraflarından mürsel vekîlleri esnâf-ı merkūme yiğitbaşısı es-Seyyid İsmail Efendi b. es-Seyyid Mehmed Emin hâzır olduğu hâlde ikrâr-ı tâm ve takrîr-i kelâm edip mahmiye-i İstanbul’da Davudpaşa İskelesi kurbünde vâki‘ şehriye yirmi beş guruş kirâlı Denizhamamı Fırını demekle meşhûr bir bâb ekmekçi fırını ve ona merbût ittisâlinde vâki‘ şehriye yirmi beş guruş kirâlı beş horoslu bir bâb ekmekçi değirmeni derûnlarında mevcûde beyne’l-esnâf gedik ta‘bîr olunur yirmi re’s bârgir ve onlara tâbi‘ sâir âlât-ı lâzime-i ma‘lûmenin on altı re’s bârgir on iki mıh ve onlara isâbet eden âlât-ı sâiresi âharların yedlerinde mülkleri olup mâ‘adâ üç re’s bârgir on iki mıh ve onlara îcâb eden âlât-ı sâiresi dahi akd-i âti’z-zikrin sudûruna değin işbu sene-i mübâreke Muharremü’l-harâmın yirmi ikinci günü târihiyle müverraha İstanbul Mahkemesi’ndeni‘tâ olunan bir kıt‘a mübâya‘a hücceti ve kethüdâ-yı mûmâ-ileyhin takdîm eylediği bir kıt‘a ilmühaber mantûklarınca yedimde mülk ve hakkım olmağla ben ber-minvâl-i muharrer mâlik olduğum üç re’s bârgir on iki mıh ve onlara îcâb eden âlât-ı sâirenin bir re’s bârgir on iki mıh ve ona iktizâ eden âlât-ı sâiresini yedimde bi’l-ibkā mâ‘adâ iki res bârgir ve onlara isâbet eden âlât-ı sâiresini tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ on iki bin yüz kırk iki guruşa mezbûr es-Seyyid Abdülhalim Ağa’ya bey‘ ve temlîk ve vech-i lâyıkıyla teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra benim cânib-i mîrîye zimmetimde on üç bin dokuz yüz guruş deynim olmağla semen-i merkūm on iki bin yüz kırk iki guruşun yedi bin dokuz yüz kırk iki guruşunu deyn-i mezkûrumun ol mikdârına mahsûben kabza memûruna edâ ve teslîm etmek üzere mezbûr es-Seyyid Abdülhalim Ağa’ya emr ve tarafımdan tevkîl eylediğimde ol dahi kabûl ve ber-vech-i meşrûh edâ-i deyne ta‘ahhüd edip semen-i mezkûrun mâ’adâsı olan dört bin iki yüz guruşu tamâmen bana def‘ u teslîm ben dahi yedinden tamâmen ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik ba‘de’l-yevm âlât-ı gedik-i mezkûrun sâlifü’l-beyân iki re’s bârgir ve onlara isâbet eden âlât-ı sâiresinde benim aslâ ve kat‘â alâka ve medhalim kalmayıp mezbûr es-Seyyid Abdülhalim Ağa’nın mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 15 Şa‘bân sene 1279 Şuhûdü’l-hâl: Muhzır Ahmed Ağa b. ( ), Muhzır Süleyman Ağa b. ( ), Muhzır Şakir Ağa b. ( ), Muhzır Feyzullah Ağa b. ( ), ve gayruhum