İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 355 Hüküm no: 240 Orijinal metin no: [49b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Mehmed Efendi b. Hasan’ın imâmeci dükkânını imâmeci esnâfının yiğitbaşısı Mehmed Ağa ve kız kardeşi Ayşe Hanım’a satması İmâmeci gediği mübâya‘ası 20000 guruş Âsitâne-i sa‘âdet âşiyâne ve bilâd-ı selâse mahkemelerine bâ-fermân-ı âlî mine’l-kadîm merbût olan duhâncı gediklerinden mâ‘adâ gerek Dersaâdet ve gerek bilâd-ı selâse-i mezkûrede kâin ber-vech-i mülkiyet tasarruf olunmakda bulunan her nev‘ gediklerin mübâya‘a ve ikrâr-ı mülk ve hibe ve irsen intikāl misillü kâffe-i mu‘âmelâtı ve vukū‘ bulan muhâkemâtı münhasıran ve mahsûsan İstanbul Mahkemesi’nden icrâ ve iktizâ eden i‘lâm ve hüccet-i şer‘iyyeleri ancak mahkeme-i mezkûre tarafından i‘tâ olunmak ve gedikât ashâbının rızâ ve muvâfakatları olmadıkça kadîm mülk kirâları tezyîd olunmamak ve senedât-ı sahîha ve mu‘tebere ile ber-vech-i mülkiyet tasarruf olunmakda bulunan gediklerin müstakır oldukları mahalden ihrâc ve imhâsı zımnında mülk sâhibleri tarafından da‘vâya tasaddî olunur ise hükkâm-ı şer‘-i şerîf cânibinden istimâ‘ olunmaması bâlâsı tuğrâ-yı garrâ-yı cihân-bânî ile muvaşşah ve müzeyyen bir kıt‘a nizâmnâme ve bâ-fermân-ı âlî müesses olan nizâm-ı müstahsene iktizâsından bulunduğuna binâen imâmeci esnâfının kethüdâsı el-Hâc Mehmed Efendi b. Hasan meclis-i şer‘-i münîrde bâ‘iseyi’l-kitâb nefsinden asîl ve li-ebeveyn kız karındaşı Âişe Hanım bt. Ali tarafından husûs-ı âti’l-beyânda tasdîka vekîl-i şer‘îsi esnâf-ı merkūme yiğitbaşısı Mehmed Ağa mahzarında esnâf-ı merkūmeden el-Hâc İsmail Ağa b. el-Hâc Osman ve Salih Ağa b. Mehmed ve el-Hâc Ahmed Ağa b. Abdülhamid hâzır oldukları hâlde ikrâr-ı tâm ve takrîr-i kelâm edip [50a] mahmiye-i İstanbul’da Uzun Çarşı nâm mahalde vâki‘ bir tarafdan el-Hâc Seyyid Efendi dükkânı ve bir tarafdan Hafız Ahmed Efendi dükkânı ve bir tarafdan bahçe ve taraf-ı râbi‘i tarîk-i âm ile mahdûd merhûm Mehmed Emin Ağa Vakfı müsakkafâtından Hâce Zeliha Hanım ve Nefise Hanım’ın bi’l-icâreteyn taht-ı tasarruflarında olan şehriye beş guruş kirâlı bir bâb imâmeci dükkânı derûnunda mevcûde beyne’l-esnâf gedik ta‘bîr olunur akd-i âti’z-zikrin sudûruna değin işbu sene-i mübâreke Rebî‘ülâhirin on üçüncü günü tarihiyle müverraha İstanbul Mahkemesi’nden verilen bir kıt‘a mübâya‘a hücceti mantûkunca yedimde müstakillen mülk ve hakkım olan âlât-ı lâzime-i ma‘lûmeyi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-ilmühaber yirmi bin guruşa asîl ve vekîl ve müvekkile-i mezbûrân Âişe Hanım ve Mehmed Ağa’ya ale’l-iştirâki’s-seviy bey‘ ve temlîk ve teslîm eylediğimde onlar dahi ber-vech-i muharrer seviyyen iştirâ ve temellük ve tesellüm ve kabz u kabûl eylediklerinden sonra semeni olan meblağ-ı merkūm yirmi bin guruşu tamamen bana def‘ u teslîm ben dahi yedlerinden bi’t-tamâm ve’l-kemâl ahz u kabz eyledim fîmâ-ba’d âlât-ı gedik-i mezkûrda benim aslâ ve kat‘â alâka ve medhalim kalmayıp asîl ve vekîl ve müvekkile-i mezbûrân Âişe Hanım ve Mehmed Ağa’nın ale’l-iştirâki’s-seviy mülk-i müşterâları ve hakk-ı sırfları olmağla mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 26 Şa‘bân sene 1279 Şuhûdü’l-hâl: Muhzır Mustafa Ağa b. ( ), Muhzır Şakir Ağa b. ( ), Muhzır Feyzullah Ağa b. ( ), Muhzır Ahmed Ağa b. ( ), ve gayruhum