İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 356 Hüküm no: 241 Orijinal metin no: [50a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fıçıcı Nikola v. Sotri’nin şerbethâne hisselerini şerbethâneci esnâfından Apostol v. İstamat’a satması Şerbethâne mübâya‘ası 6000 guruş Kezâlik mahrûse-i Galata’ya muzâfe İstinye nâhiyesine tâbi‘ Büyükdere karyesinde sâkin teba‘a-i Devlet-i aliyye’nin Rum milletinden Fıçıcı Nikola v. Sotri meclis-i şer‘-i şerîf-i hatîrde teba‘a-i Devlet-i aliyye’nin Latin tâifesinden olduğu bâ-ilmühaber mütehakkık olan şerbethâneci esnâfından bâ‘isü’r-rakīm Apostol v. İstemat muvâcehesinde teba‘a-i Devlet-i aliyye’den ve esnâf-ı merkūmenin Samatya kolu ustabaşısı Haci Delot v. Yakof ve karye-i mezkûre ustabaşısı İstefan v. Mike hâzır oldukları hâlde ikrâr-ı tâm ve takrîr-i kelâm edip sâlifü’l-beyân Büyükdere karyesinde bakkal dükkânı civârında Kalafatyeri nâm mahalde vâki‘ leb-i deryâya nâzır bir tarafdan benim tasarrufumda olan fıçıcı dükkânı ve bir tarafdan hâzır-ı merkūm İstefan şerbethânesi ve bir tarafdan yine hâzır-ı merkūm İstefan şerbethânesi mağazası ve taraf-ı râbi‘i tarîk-i âm ile mahdûd yirmi sekiz sehm i‘tibârıyla on yedi sehm hisse-i şâyi‘ası âharların ve on bir sehm hisse-i şâyi‘a benim yedimizde mülkümüz olan beher şehr otuz guruş kirâlı Sotri şerbethânesi demekle arîf bir bâb şerbethâne derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûmeden yüz yirmi sehm i‘tibârıyla otuz dört sehm bir pul ve nısf puldan yedi sehm i‘tibârıyla iki sehm hissesi ve yine dört sehm bir pul ve nısf puldan iki sümün ve nısf pulun yedi hisse i‘tibârıyla bir hisseden dahi bir rub‘ hissesi ve sekiz sehm iki pul ve nısf puldan semen ve nısf pulun yedi sehm i‘tibârıyla bir hissesinden iki rub‘ pul hissesi bâ-sûret-i Zecriye ve hâlâ Zecriye Nâzırı izzetlü Hüseyin Efendi’nin bir kıt‘a ilmühaberi mantûklarınca akd-i âti’z-zikrin sudûruna değin yedimde mülk ve hakkım olmağla ben âlât-ı gedik-i mezkûrdan ber-minvâl-i muharrer mâlik olduğum hises-i mezkûreyi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ altı bin guruşa merkūm Apostol’a bey‘ ve temlîk ve vech-i lâyıkıyla teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm altı bin guruşu tâmamen bana def‘ u teslîm ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik ba‘de’l-yevm âlât-ı gedik-i mezkûrun hises-i mezkûresinde benim aslâ ve kat‘â alâka ve medhalim kalmayıp merkūm Apostol’un mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 27 Muharrem sene 1279 Şuhûdü’l-hâl: Muhzır Süleyman Ağa b. ( ), Muhzır el-Hâc Yusuf Ağa b. ( ), Muhzır el-Hâc Salih Ağa b. ( ), Muhzır Feyzullah Ağa b. ( ), ve gayruhum