İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 357 Hüküm no: 242 Orijinal metin no: [50a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Zenci Reyhan Ağa’nın mirasçılarına kalan tütüncü dükkânının müzâyede yoluyla satılması Tütüncü gediği mübâya‘ası 4000 guruş Kezâlik mahmiye-i İstanbul’da Avrat pazarı kurbünde Canbaziye mahallesinde sâkin iken bundan mukaddem vefât eden Divân-ı De‘âvî çavuşlarından Zenci Reyhan Ağa b. Abdullah’ın verâseti zevce-i menkûha-i metrûkesi Zenciye Emine Kadın bt. Abdullah ile sulbî sagīr oğlu İsmail’e münhasıra olduğu lede’ş-şer‘î’l-enver zâhir ve mütehakkık oldukdan sonra sagīr-i mezbûrun vâlidesi ve tesviye-i umûruna kıbel-i şer‘den vasiyy-i mansûbesi zâtı ta‘rîf-i şer‘î ile mu‘arrefe olan mezbûre Emine Kadın meclis-i şer‘-i şerîf-i enverde mahkeme-i mezkûre muhzırânından Mustafa Ağa b. Hüseyin mahzarında tütüncü esnâfının kethüdâsı el-Hâc Mehmed Abdüllatif Efendi b. İsmail ile duhân tüccârından mazbûtü’l-esâmî on nefer müslim ve beş nefer hıristiyan lonca ihtiyârları taraflarından mürsel vekîlleri Yiğitbaşı Ahmed Ağa b. el-Hâc Ali hâzır olduğu hâlde bi’l-asâle ve bi’l-vesâye ikrâr-ı tâm ve takrîr-i kelâm edip zikr olunan Canbaziye mahallesinde Arasta sûkunda vâki‘ bir tarafdan Kasab Mehmed Ağa’nın menzili ve bir tarafdan attâr dükkânı ve bir tarafdan kabristân ve taraf-ı râbi‘i tarîk-i âm ile mahdûd şehriye üç guruş kiralı bir bâb vakıf tütüncü dükkânı derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûme bin iki yüz altmış altı senesi Şevvalü’l-mükerremi’nin on üçüncü günü tarihiyle müverraha ve ol târihde Dârü’l-hilâfeti’l-aliyye kādısı olan sudûr-ı izâmdan Meşrebzâde merhûm Ali Raif Efendi’nin imzâ ve hatemini hâviye işbu bir kıt‘a hâmiş-i hüccet ve kethüdâ-yı mûmâ-ileyhin takdîm eylediği bir kıt‘a ilmühaber mantûklarınca müteveffâ-yı mezbûr Reyhan Ağa’nın hayâtında ile’l-vefât yedinde müstakillen mülkü ve ba‘de vefâtihî benimle vasîsi olduğum sagīr-i mezbure mevrûs olmağla ben âlât-ı gedik-i mezkûru Kısmet-i Askerîye mahkemesi tarafından vürûd eden bir kıt‘a ilmühaber mantûkunca münâdî yediyle sûk-ı sultânî ve mecma‘-ı nâs olan mahallerde lede’l-müzâyede ve gıbbe inkıtâ‘ı’r-rağbe el-yevm semen-i misli idüğü bî-garez sikāt-ı müslimînin alâ tarîki’ş-şehâde ihbârlarıyla zâhir ve mütehakkık olan dört bin guruşa tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ile bi-safkatin vâhidetin mezbûr Mustafa Ağa’ya bi’l-asâle ve bi’l-vesâye bey‘ ve temlîk ve teslîm eylediğimde ol dahi ber-vech-i muharrer [50b] iştirâ ve temellük ve tesellüm ve kabz u kabûl eyledikden sonra semen-i olan meblağ-ı merkūm dört bin guruşu tamamen bana def‘ u teslîm ben dahi yedinden bi’l-asâle ve bi’l-vesâye tamâmen ahz u kabz ve müteveffâ-yı merkūmun defter-i kassâmına idhâl eyledim ba‘de’l-yevm âlât-ı gedik-i mezkûrda benimle sagīr-i mezbûrun aslâ ve kat‘â alâka ve medhalimiz kalmayıp mezbûr Mustafa Ağa’nın mülk-i müşterâsı ve hakk-ı sırfı olmuşdur dedikde gıbbe’t-tasdîk mezbûr Mustafa Ağa meclis-i şer‘-i hatîrde bâ‘isetü’l-kitâb merkūme Emine Kadın mahzarında ikrâr-ı tâm ve takrîr-i kelâm edip ben dahi ber-minvâl-i muharrer ânifen ve şirâen mâlik olduğum âlât-ı gedik-i mezkûru tarafeynden bi’l-îcâb ve’l-kabûl bâtten ve sahîhan bi-safkatin vâhidetin dört bin guruş semen-i medfû‘ ve makbûza mezbûre Emine Kadın’a bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl edip fîmâ-ba’d âlât-ı gedik-i mezkûr mezbûre Emine Kadın’ın mülk-i müşterâsı ve hakk-ı sırfı olup benim aslâ ve kat‘â alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 16 Receb sene 1279 Şuhûdü’l-hâl: Muhzır el-Hâc Mustafa Ağa b. ( ), Muhzır el-Hâc Salih Ağa b. ( ), Muhzır Süleyman Ağa b. ( ), Muhzır Feyzullah Ağa b. ( ), ve gayruhum