İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 359 Hüküm no: 243 Orijinal metin no: [50b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal esnâfından Haralombo v. İstavri’nin yağcı mahzeninin yarı hissesini zahîreci esnâfından Maloğlu Aleksi v. Moses’e satması Yağcı mahzeni mübâya‘ası 6000 guruş Kezâlik teba‘a-i Devlet-i aliyye’nin Rum milletinden ve bakkal esnâfından Haralombo v. İstavri meclis-i şer‘-i hatîr-i lâzımü’t-tevkīrde teba‘a-i Devlet-i aliyye’nin Rum milletinden olduğu bâ-ilmühaber mütehakkık olan zahîreci esnâfından bâ‘isü’r-rakīm Maloğlu Aleksi v. Moses muvâcehesinden bakkal esnâfının kethüdâsı Ahmed Efendi tarafından mürsel esnâf-ı merkūme çavuşu Dimitri v. Yuvan ile teba‘a-i Devlet-i aliyye’den ve Avrupa tüccârından Hıristo v. Vancesti hâzır oldukları hâlde ikrâr-ı tâm ve takrîr-i kelâm edip mahmiye-i İstanbul hısnı ebvâbından Balık pazarı kapısı hâricinde vâki‘ bir tarafdan el-Hâc İsmail Ağa’nın bakkal dükkânı ve bir tarafdan Nevşehirli Yuvan’ın bakkal dükkânı ve bir tarafdan Ekmekci Manas’ın uncu değirmeni ve taraf-ı râbi‘i tarîk-i âm ile mahdûd Ayasofya-i Kebîr Câmi‘-i şerîfi Vakfı müsakkafâtından Hatipoğlu el-Hâc Davud Ağa’nın taht-ı tasarrufunda olan şehriye sekiz guruş kirâlı bir bâb yağcı mahzeni derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûmenin nısf hisse-i şâyi‘ası gāib ani’l-meclis Berber Manol v. Lefter’in yedinde mülkü olup mâ‘adâ âhar nısf hisse-i şâyi‘ası bin iki yüz yetmiş dört senesi şehr-i Rebî‘ülevveli’nin onuncu günü târihiyle müverraha ve ol târihde İstanbul Bab mahkemesi nâibi olan müderrisîn-i kirâmdan mekremetlü es-Seyyid Mustafa Faik Efendi’nin imzâ ve hatemini hâviye işbu bir kıt‘a mübâya‘a hüccceti nâtıka olduğu üzere yedimde mülküm iken ben ber-vech-i muharrer mâlik olduğum nısf hisse-i şâyi‘a-i âlât-ı gedik-i mezkûru bin iki yüz yetmiş altı senesi Zilhicceti’ş-şerîfesinin üçüncü günü târihiyle müverraha ve ol târihde mahkeme-i mezkûre nâibi olan müderrisîn-i kirâmdan mekremetlü es-Seyyid Halil Efendi’nin imzâ ve hateminihâviye işbu bir kıt‘a hücccet-i şer‘iyye mantûkunca yirmi beş bin guruş semen-i makbûza hâzır-ı merkūm Hıristo’ya bey‘ ve teslim ol dahi iştirâ ve tesellüm ve kabz u kabûl etmişdi lâkin mebî‘-i mezkûr hakīkatde bey‘ olunmayıp semen-i merkūm yirmi beş bin guruş cihet-i karzdan zimmetimde hâzır-ı merkūm Hıristo’ya deynim olup mukābelesinde âhar nısf hisse-i şâyi‘a-i mezkûre rehin olmağla ben deyn-i mezkûr yirmi beş bin guruşu hâzır-ı merkūm Hıristo’ya edâ ve teslîm ol dahi yedimden ahz u kabz edip âhar nısf hisse-i şâyi‘a-i âlât-ı gedik-i mezkûru rehniyetden fek ve bana teslîm eylediğinde ben dahi ahz u kabz eylediğimden sonra ben akd-i âti’z-zikrin sudûruna değin ber-vech-i muharrer mâlik olduğum âhar nısf hisse-i şâyi‘a-i âlât-ı gedik-i mezkûru tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-ilmühaber ve bâ-izn-i şerîk on altı bin guruşa merkūm Aleksi’ye bey‘ ve temlîk ve vech-i lâyıkıyla teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm on altı bin guruşu tamâmen bana def‘ u teslîm ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik ba‘de’l-yevm âhar nısf hisse-i şâyi‘a-i âlât-ı gedik-i mezkûrda benim aslâ ve kat‘â alâka ve medhalim kalmayıp Aleksi’nin mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 21 Cemâziyelûlâ sene 1279 Şuhûdü’l-hâl: Muhzır Süleyman Ağa b. ( ), Muhzır Şakir Ağa b. ( ), Muhzır Mustafa Ağa b. ( ), Muhzır Feyzullah Ağa b. ( ), ve gayruhum