İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 360 Hüküm no: 244 Orijinal metin no: [50b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hanife Hatun bt. Abdullah’ın vakfiyesi Vakfiye Mâ-fîhi mine’l-vakfı ve’ş-şürût cerâ indî ale’l-vechi’l-mazbût ve hakemtü bi-sıhhatihî ve lüzûmihî âlimen bi’l-hilâfi beyne’l-e’immeti’l-eşrâf ve ene’l-fakîrü ileyhi azze şânühû Osman Paşazade Mehmed Nuri el-Kādî bi-dari’l-hilâfeti’l-aliyye. Gufira lehû Mehâmid-i hâlisa-i bî-had ve cevâhir-i esniye-i lâ-yu‘ad ol zât-ı pâk-ı ahad cenâbullâhi’s-samed dergâh-ı emcedine ref‘-i med olunur ki, akdesiyet-i zât-ı ulyâsı lem yelid ve lem yuled nazîme-i celîlesiyle mansûs ve müberhen ve a‘zamiyyet-i şan-ı kibriyâsı ve lem-yekün lehu küfüven ahad tetimme-i kerîmesiyle vâzıh ve rûşendir ve dürûd-ı bisyâr ve nahît-i bî-şümâr ol nâzenîn-i cenâb-ı perverdigâr Resûlü’s-sekaleyn Ahmed-i muhtâr ravza-i pür-envârına bezl ü îsâr olunur ki, sadr-ı menşûr câh-ı ricâleti hâtemü’n-nebiyyîn ve rahmeten li’l-âlemîn unvân-ı müstetâbıyla pür-zîver-i kadr-ı behîn-i zât-ı sa‘âdeti “Levlâke levlâk lemâ halaktü’l-eflak” hitâbıyla mutarraza müşerrefdir?. Sitâyiş-i bi-hesâb-ı mecmû‘-ı âl ve ashâb müşâhid-i müşktâbına bahş ü îhâb olunur ki her biri necm-i sipihr-i dîn ve meş‘al-i şâhrah-ı şer‘-i güzîndir. Ba‘de îfa-yı âyin-i merâsim-i vâcibü’l-kadîm bâ‘is-i cünbüş-nümâ-yı kilek-i kadîm budur ki, Mahmiye-i İstanbul hısnı ebvâbından Kumkapı dâhilinde Tavâşi Süleyman Ağa mahallesinde sâkine Hanife Hatun bt. Abdullah b. Abdurrahman tarafından husûs-ı âti’l-beyânda vekîl olduğu zâtını ârifân mahalle-i mezkûre muhtar-ı evveli el-Hâc Mehmed Memiş Ağa b. Mehmed Emin [51a] ve Ebniye Meclisi hulefâsından Mehmed Refik Efendi b. Ali şehâdetleriyle mahzar-ı hasm-ı câhidde ber-nehc -i şer‘î sâbit ve sübût ve vekâletine hükm-i şer‘î lâhık olan hulefâ-i mûmâ-ileyhimden Hafız Ahmed Efendi b. Ali meclis-i şer‘-i şâmihü’l-beyân-ı Ahmedî ve mahfil-i dîn-i râsihü’l-erkân-ı Muhammedî’de husûs-ı lâhıkü’t-tafsîli tescîl ve tekmîle mütevelli ve ahkâm-ı vakf-ı câi’t-tafsîli tesbîl ve şöyle velî nasb ve ta‘yin olunan mahalle-i mezkûre ahâlisinden ve altın varakçı esnâfından es-Seyyid Osman Efendi b. es-Seyyid Mehmed mahzarında bi’l-vekâle ikrâr-ı sahîh-i şer‘î ve i‘tirâf-ı sarîh-i mer‘î eyleyip müvekkilem mûmâ-ileyhâ Hanife Hatun etyab-ı mâl ve enfes-i menâlinden ifrâz ve kemâl-i imtiyâz ile mümtâz eylediği bin guruşu hasbeten lillâhi’l-ehad ve taleben li merdâti Rabbihi’s-samed vakf-ı sahîh-i şer‘î müebbed ve habs-i sarîh-i mer‘î muhalled ile vakf ve habs ve şöyle şart eyledi ki nukūd-ı mevkûfe-i merkūme bâ-yed-i mütevelli rehn-i kavî ve kefîl-i melî veyahud ikisinden biri ile alâ vechi’l-helâl istirbâh ve istiğlâl olunup bi-feyzihî te‘âla hâsıl olan galle ve nemâsını vakf-ı mezkûre mütevelli olanlar ahz u kabz edip galle-i nukūd-ı merkūmeden seksen guruş ile beher sâl-i meymenet-iştimâlde vâki‘ şehr-i mevlid-i Resûl-i Rabbi’l-âlemîn bâ‘is-i icâd ve mârid-i ve tîn? sallallâhu te‘âla aleyh ve alâ alihi ve sahbihi ve sellem duhûlünde mahalle-i mezkûre câmi‘-i şerîfinde bir zât-ı menkabet namınâ vilâdet-i bâ-sa‘âdet-i seyyidi’l-beşer aleyh ve alâ alihi ve sahbihi ve salavâtü’l-lâhive selâmuhû mâttasale’l-izni bi’l-hayr efendimizi de’b-ı dîrîn-i müztahsen üzere kırâat buyurup hâsıl olan ucûr-ı kırâat ve sevâbını evvelâ ve bi’z-zât rûh-ı mukaddes-i hazret-i sultanü’l-enbiyâ aleyh ve alâ al ve ashâbı efdali’s-salât ve’t-tahiyyât efendimize ve sâir kâffe-i müminîn ve müminât ervâhlarına ihdâya himmet edip levâzım-ı sâiresi dahi rü’yet ve tanzîm oluna ve yine galle-i vakf-ı mezkûrdan otuz guruş ile beher sâl-ı ferhunde-fâlde şehr-i Ramazan-ı gufrân-ı feyezân duhûlünde şem‘-i asel iştirâ olunup mahalle-i mezkûre câmi‘-i şerîfine ikād oluna ve beher sene galle-i vakf-ı mezkûrdan on guruş câmi‘-i şerîf-i mezkûr müezzinine verile ve müvekkilem mûmâ-ileyhâ Hanife Hatun vakf-ı mezkûrunun tevliyetini hayâtda oldukça kendüye ve ba‘de’l-vefât mezbûr es-Seyyid Osman Efendi’ye ve ba‘de’l-vefât mahalle-i mezkûrede imâm olanlara ber-vech-i hasbî meşrûta ola ve fazla-i galle-i vakf-ı mezkûr asl-ı mâl-ı vakfa zam oluna ve şurût-ı mezkûreye ri‘âyet müte‘azzire olur ise mutlakâ galle-i vakf-ı mezkûr fukarâ-i müslimîne meşrûta ola ve vakf-ı mezkûrunun bi’l-cümle şurût ve kuyûdunun tebdîl ve tağyîri ve taklîl ve teksîri ve idhâl ve ihrâcı merraten ba‘de ûlâ ve kerreten gıbbe uhrâ yed ve meşiyetinde ola deyu ta‘yîn-i şurût ve tebyîn-i kuyûd birle meblağ-ı merkūm bin guruşu mütevelli-i merkūme teslîm eylediğinde ol dahi vakfiyet üzere ahz u kabz ve emsâli gibi tasarruf eyledi deyu hatm-ı kelâm ve ifâ-yı merâm eyledikde gıbbe’t tasdîki’ş-şer‘î vekîl-i mûmâ-ileyh esbagallâhu nia‘mehû aleyh vakf-ı mezkûru ahkâm ve şurût ve kuyûdunu istihkâm râdde-i hayriyesiyle vakf-ı mezkûrdan müvekkilesi mûmâ-ileyhâ Hanife Hatun’a izâfetle bi’l-vekâle rucû‘ ve meblağ-ı mevkûf-ı mezkûru müvekkilesi mûmâ-ileyhâ Hanife Hatun’un mülküne istirdâd bâbında mütevelli-i mezbûr es-Seyyid Osman Efendi ile nizâ‘a şurû‘ ve mütevelli-i mezbûr es-Seyyid Osman Efendi dahi teslîmden imtinâ’ ile kema-hüve’l meşhûr vel mastûrmüterâfi‘an ve fasl u hasma tâlibân olduklarında hâkim-i hâsim-i vâlâ-cenâb-ı tûbâ lehû ve hüsnü me’âb efendi hazretleri dahi cânib-i vakf-ı evlâ ve ahrâ görüp âlimen bi’l-hilâfi beyne’l-e’immeti’l-eslâf alâ kavli men yerâhu vakf-ı mezkûrun evvelâ sıhhat ve şurût-ı mezkûrenin cevâzına ve sâniyen lüzûmuna hükm-i sahîh-i şer‘î ve kazâ-i sarîh-i mer‘î etmeğin min ba‘d vakf-ı mezkûr sahîh ve lâzım ve habs-i sarîh ve mütehattim olup nakz ve tahvîli muhâl ve vâkife-i müvekkile-i mûma-ileyhâdan gayra tebdîl ve tağyîri adîmü’l-ihtimâl oldu “fe-men beddelehu ba‘demâ semi‘ahû fe-innemâ ismuhû ale’llezîne yubeddilûnehû innallâhe semî‘un”ve ecrü’l-vâkıfu ale’l-hayyil cevâdi’l-kerîm cerâ zâlike hurrire fî 15 Receb sene 1279 Şuhûdü’l-hâl: Mahalle-i mezkûre imâmı es-Seyyid Mahmud Aziz Efendi bin Hasan, Mehmed Refik Efendi el-mezbûr, Es-Seyyid Mehmed Memiş Ağa el-merkūm, Muhzır Feyzullah Ağa b. Musa, Tahtacı el-Hâc Salih Ağa b. Hayrullahve gayruhüm