İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 363 Hüküm no: 246 Orijinal metin no: [51b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kaybolan Tütüncü Kigork v. Adam’ın kiracısı olduğu tütüncü dükkânının açılıp Kigork’a ait eşyanın sayılması ve satılması İstanbul’da Sultan Hân aleyhi-rahmetü ve’l-gufrân hazretleri Câmi‘-i şerîfi kurbünde Üçler mahalle mahallesinde sebil pîşgâhında menzil tahtında kâin bir bâb tütüncü dükkânında beher şehr yüz altmış guruş kirâ ile müşâhereten müstecir olan teba‘a-i Devlet-i aliyye’nin Ermeni milletinden Tütüncü Kigork v. Adam işbu târih-i i‘lâmdan beş ay mukaddem dükkân-ı mezkûru mukaffalan terk ve ta‘tîl birle diyâr-ı âhara firâr ve gaybet-i munkatı‘a ile gāib ve mefkūd ve hayât ve memâtı nâ-ma‘lûm olduğuna binâen dükkân-ı mezkûrun kuflu ma‘rifet-i şer‘le feth ve küşâd ve derûnunda mevcûde mefkūd-ı merkūmun mütesâri‘ü’l-fesâd olan mâlı tahrîr ve semen-i misilleriyle âhara bey‘ ve esmânı mefkūd-ı merkūmun hâli mütebeyyin oluncaya değin yed-i emîne vaz‘ ve dükkân-ı mezkûru kendüye teslîm olunmasını dükkân-ı mezkûrun mutasarrıfı olan mahalle-i merkūmede sâkine mu‘arrefetü’z-zât Fâtıma Hanım bt. Abdullah bâ-arzuhâl istid‘â etmekle ol bâbda sâdır olan fermân-ı âlîye imtisâlen savb-ı şer‘-i enverden mezûnen mürsel Kâtib es-Seyyid Hafız Osman Nuri Efendi ve ma‘an meb‘ûs ümenâ-i şer‘den Çukadâr Ahmed Ağa ve Muhzır Süleyman Ağa ve husûs-ı mezkûre mübâşir ta‘yîn olunan Divân-ı De‘âvî çavuşânı kılavuz-ı sânîsi Mustafa Ağa ve esnâf-ı merkūmenin bâ-berât-ı âlîşân kethüdâsı el-Hâc Mehmed Latif Efendi tarafından mürsel esnâf-ı merkūmenin yiğitbaşısı Ahmed Ağa b. el-Hâc Ali ile dükkân-ı mezkûre varıp mefkūd-ı merkūmun ber-vech-i muharrer gāib ve mefkūd olduğu mahalle-i merkūme imâmı Hafız Hüseyin Hüsnü Efendi b. Osman ve mahalle-i merkūme ahâlisinden Berber Mehmed Ağa b. Osman ve civâr-ı merkūmun köşe ustası Hıristo v. Panayot haberleriyle zâhir ve mütehakkık oldukdan sonra muhbirûn-ı mezbûrûn hâzır oldukları hâlde dükkân-ı mezkûrun kuflu ma‘rifet-i şer‘le feth ve küşâd ve derûnunda mevcûde mâlı mefkūd-ı merkūmun hâli tebeyyün oluncaya değin mu‘temed ve müstakîm idüğü kezâlik bi’l-ihbâr zâhir ve mütehakkık olup kıbel-i şer‘den bi’l-kabûl vasi ve kayyım nasb olunan teba‘a-i Devlet-i aliyye’den ve Ermeni milletinden ve esnâf-ı merkūme ustabaşılarından Hacı Mardiros v. Manuk ma‘rifeti ve ma‘rifet-i şer‘le tahrîr ve usûl-i esnâf vechile Duhân Gümrüğü pîşgâhına nakil ve cümlesi mütesâri’ü’l-fesâd olmağla mefkūd-ı merkūmun semen-i misilleriyle âhara bey‘ olunan mâlıdır ki ber-vech-i âtî zikr olunur. Fî 17 Şevval sene 1278 Yün memlû döşek 1 aded, penbe memlû basma yorgan 1 aded, yün memlû yasdık 1 aded 45 guruş Havan 1 aded, bıçak 7 aded, bileği taşı 1 aded 90 guruş Kendir boğça ve hâtem 3 aded 22 kıyye?, fî 28 guruş 30 para 920 guruş Tilmiş? Kanber Dükkânı 11 Kıyye? 33 guruş Bâ-defter-i müfredât attâriye emti‘ası esmânı 116 guruş Cem‘an Yekûn 1204 guruş [minhe’l-ihrâcât:] Harc-ı defter ve kaydiye 14 guruş Dellâliye ve masârıf-ı nakliye 50 guruş Yekûnü’l-ihrâcât: 64 guruş Sahhu’l-bâkī1140 guruş Sahhü’l-bâkī merkūm bin yüz kırk guruşu vasi ve kayyım-ı merkūm Hacı Mardiros bi’l-vesâye ahz u kabz ve bilâ zarûret kendi mâlına haltla ba‘de’l-istihlâk meblağ-ı bâkī merkūm bin yüz kırk guruş mefkūd-ı merkūma damânen deyni olduğunu kâtib-i mûmâ-ileyh huzûrunda tav‘an ikrâr u i‘tirâf edip ve emriyle meblağ-ı merkūm bâkī bin yüz kırk guruşa duhân tüccârından Langalı Kirkor v. Marat ve yine duhân tüccârından olup Gedikpaşa kolu ustası Parnek v. Mardiros’dan her biri tarafeynden bi’l-emr ve’l-kabûl kefâlet-i mutlaka-i sahîha-i şer‘iyye ile başka başka kefîl ve zâmin olduklarında tashîhan li’l-kefâle vasi ve kayyım nasb olunan muhzır-ı mezbûr Mustafa Ağa dahi kefâlet-i mezkûreyi kabûl eylediği mûmâ-ileyh inhâsıyla işbu mahalle şerh verildi. Osman Paşazade Mehmet Nuri el-Kādî bi-dâri’l-hilâfeti’l-aliyye nemekahü’l-fakîr ileyhi azze şânühû gufire lehümâ