İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 365 Hüküm no: 247 Orijinal metin no: [51b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tütüncü esnâfından Artin v. Isodor’un Manuk v. Agop’tan aldığı borç karşılığında tütüncü dükkânını rehin vermesi Tütüncü gediği Topkapı dâhilide Teba‘a-i Devlet-i aliyye’nin Ermeni milletinden mukaddemâ kuyumcu ve hâlâ tütüncü esnâfından Artin v. Isodor meclis-i şer‘-i şerîf-i hatîrde medîne-i Hazret-i Ebâ Eyüb el-Ensârî radıye anhu Rabbühü’l-bârî mahallâtından Baba Haydar mahallesinde sâkin teba‘a-i Devlet-i aliyye’nin Ermeni milletinden bâ‘isü’r-rakīm Püskülcü Manuk v. Agop muvâcehesinde tütüncü esnâfının kethüdâsı el-Hâc Mehmed Abdüllatif Efendi b. İsmail ile mazbûtü’l-esâmî on nefer müslim ve beş nefer hıristiyan lonca ihtiyârları taraflarından mürsel kethüdâ vekîli Ahmed Efendi b. Osman hâzır olduğu hâlde ikrâr-ı tâm ve takrîr-i kelâm edip merkūm Manuk mâlından bana yüz beş aded tam yüzlük mecîdiye altını ikrâz ve teslîm ben dahi iktirâz ve kabz ve umûruma sarfla istihlâk edip zikr olunan yüz beş aded tam yüzlük mecîdiye altını ile semeni işbu târih-i rakīmden iki sene tamamına değin müeccel ve mev‘ûduna merkūm Manuk’un mâlından ve yedinden bi-safkatin vâhidetin iştirâ ve kabz eylediğim üç aded hilâlî koyun sâ‘ati semeninden dahi otuz bir buçuk aded tam yüzlük mecîdiye altını mukābelesinde mahmiye-i İstanbul hısnı ebvâbından Topkapı dâhilinde menzil ve ekmekçi destgâhı beynlerinde köşe başında kâin Eshâm Muhâsebesi kaleminde mukayyed şehriye beş guruş kirâlı bir bâb tütüncü dükkânı derûnunda mevcûde beyne’l-esnâf gedik ta‘bîr olunur yedimde olup bin iki yüz altmış bir senesi Recebi’l-ferdinin yirmi beşinci günü târihiyle müverrah ve ol târihde Dârü’l-hilâfeti’l-aliyye kādısı olan Paşmakçızâde es-Seyyid İbrahim Efendi merhûmun imzâ ve hatemini hâviye işbu bir kıt‘a mübâya‘a hücceti hâmişi mantûkunca yedimde müstakillen mülk ve hakkım olan âlât-ı lâzime-i ma‘lûmeyi rehin vaz‘ ve merkūm Manuk’a teslîm eylediğimde ol dahi ber-vech-i muharrer irtihân ve tesellüm ve kabz u kabûl eyledikden sonra eğer ben deyn-i merkūmu ecl-i mezkûr hitâmında edâ ile âlât-ı gedik-i mezkûru rehinden fek ve tahlîs edemez ise âlât-ı gedik-i mezkûru semen-i misilleriyle âhara bey‘ ve kabz-ı semen ve makbûzundan deyn-i mecmû‘-ı merkūmu merkūm Manuk’a edâya ve fazla kalır ise fazlasını bana teslîme ve husûs-ı mezkûr mütevakkıf olduğu umûrun küllisine tarafımdan hâzır-ı mezbûr Ahmed Efendi’yi küllemâ azeltüke fe-ente vekîli mefhûmu üzere azl ve ini‘izâlden masûne ve akd-i rehinde meşrûta vekâlet-i devriye-i sahîha-i şer‘iyye ile vekîl ve nâib-i münâb nasb ve ta‘yîn eylediğimde ol dahi ber-vech-i muharrer vekâlet-i mezkûreyi kabûl ve merâsimini kemâ-yenbagī vaktinde edâya ta‘ahhüd ve iltizâm eyledi dedikde gıbbe’t-tasdîk. Fî 6 Cumâdelâhir sene 1279 Şuhûdü’l-hâl: Muhzır Mehmed Ağa b. ( ), Muhzır Mustafa Ağa b. ( ), Muhzır Feyzi Ağa b. ( ), Muhzır el-Hâc Salih Ağa b. ( ), ve gayruhum