İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 366 Hüküm no: 248 Orijinal metin no: [52a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Manifaturacı Yorgi ve akrabalarının tütüncü dükkânındaki hisselerini Manav Kiryako v. Yordam’a satmaları Tütüncü mübâya‘ası Duhân Gümrüğü kurbünde Zahîreciler içinde 8000 guruş Kezâlik mahmiye-i İstanbul’da Cibali kapısı hâricinde Seferikoz mahallesinde sâkinler her biri teba‘a-i Devlet-i aliyye’nin Rum milletinden olup kendi nefsinden asîl ve anası Katerina bt. Simon v. Adam ile li-ebeveyn kız karındaşı Sormine? tarafından husûs-ı âti’l-beyânda vekîl olduğu şahıslarını bi’l-ma‘rifeti’ş-şer‘iyye ârifân tütüncü esnâfı kethüdâ vekîli Ahmed Efendi b. Osman ve yiğitbaşısı Ahmed Ağa b. el-Hâc Ali şehâdetleriyle ber-nehc -i şer‘î sâbit olan mânifaturacı Yorgi diğer li-ebeveyn er karındaşı kezâlik teba‘a-i Devlet-i aliyye’den ve millet-i merkūmeden Nikola hâzır olduğu hâlde meclis-i şer‘-i şerîf-i enverde vilâyet-i Anadolu’da Niğde kazâsı kurâsından Turdonos karyesi ahâlisinden kezâlik teba‘a-i Devlet-i aliyye’den ve millet-i merkūmeden işbu hâmilü’r-rakīm Manav Kiryako v. Yordam muvâcehesinde esnâf-ı merkūmenin bâ-berât-ı şerîf -i âlîşân kethüdâsı el-Hâc Abdüllatif Efendi hâzır olduğu hâlde bi’l-asâle ve bi’l-vekâle ikrâr-ı tâm ve takrîr-i kelâm edip mahmiye-i İstanbul’da Duhân Gümrüğü kurbünde Zahîreciler sûkunda hasırcı dükkânı ittisâlinde kâin Harameyn-i muhteremeyn Evkâfı müsakkafâtından Sabuncu Avram v. Bünyad ve Yorgi v. Praşkova’nın bi’l-münâsafa taht-ı tasarruflarında olan bir bâb tütüncü dükkânı derûnunda mevcûde şehriye dört guruş kirâ-yı kadîmelü Eshâm Muhâsebesi Kalemi’nde mukayyed ve mu‘teber beyne’l-esnâf gedik ta‘bîr olunur âlât-ı lâzime-i ma‘lûmenin yüz yirmi sehm i‘tibârıyla seksen sehm hisse-i şâyi‘ası âhar ma‘lûmü’l- esâmî kesânın ve mâ‘adâ kırk sehm hisse-i şâyi‘ası dahi bi-hükmi’l-münâsahati’ş-şer‘iyye iki bin sekiz yüz seksen sehimden olup sihâm-ı merkūmeden bin yedi yüz dört sehm hissesi yedimizde olup bin iki yüz yetmiş altı senesi Şevvalü’l-mükerremi’nin yirminci günü târihiyle müverrah ve ol târihde İstanbul kādısı olan sudûr-ı izâmdan Halil Hamid Paşazâde semâhatlü Nazif Beyefendi hazretlerinin imzâ ve hatemini hâviye işbu bir kıt‘a hüccet ve kethüdâ-yı mûmâ-ileyhin takdîm eylediği bir kıt‘a ilmühaber mantûklarınca benimle ve müvekkilelerim merkūmetân ve hâzır-ı merkūm Nikola’nın iştirâken ve şâyi‘an yedimizde mülk ve hakkımız olmağla el-hâletü ben bi’l-asâle ve müvekkilelerim merkūmetâna izâfetle bi’l-vekâle ve hâzır-ı merkūm Nikola dahi kezâlik bi’l-asâle ber-vech-i muharrer iştirâken mâlik olduğumuz cem‘an bin yedi yüz dört sehm hisse-i şâyi‘a-i âlât-ı gedik-i merkūmu tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile merkūm Kiryako’ya bâ-izn-i şürekâ sekiz bin guruşa bey‘ ve temlîk ve teslîm eylediğimde ol dahi iştirâ ve temellük ve tesellüm ve kabz u kabûl edip semeni olan meblağ-ı mezkûr sekiz bin guruşu bize def‘ u teslîm eylediğinde biz dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile bi’l-asâle ve izâfetle bi’l-vekâle ibrâ vü ıskāt ve her birimiz ber-vech-i muharrer âharın ibrâsını kabûl eyledik, ba‘de’l-yevm mârrü’z-zikr bin yedi yüz dört sehm hisse-i şâyi‘a-i merkūme-i âlât-ı gedik-i mezkûrda benimle anam ve kız karındaşım ve müvekkilelerim merkūmetân Katerina ve Sormin’e? ve hâzır-ı merkūm Nikola’nın aslâ ve kat‘â alâka ve medhalimiz kalmayıp merkūm Kiryako’nun mülk-i müşterâsı ve hakk-ı sırfı olmuşdur dedikde gıbbe’t-tasadîk. Fî 15 Receb sene 1279 Şuhûdü’l-hâl: Muhzır Mustafa Ağa b. ( ), Muhzır Ahmed Ağa b. ( ), Muhzır Yusuf Ağa b. ( ), Muhzır Feyzullah Ağa b. ( ), ve gayruhum