Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 537 Hüküm no: 650 Orijinal metin no: [113a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Mustafa’nın menzilini Hacı Mehmed ve Hüseyin Beşe b. Musa’ya sattığı Unkapanı dâhilinde Bıçakçı mahallesinde mülknâmedir. Mahmiye-i İstanbul’da Bıçakçı Alâaddin mahallesinde sâkine Fâtıma bt. Mustafa b. Said nâm hâtunun zevci ve tarafından husûs-ı âti’l-beyâna vekîl olduğu zâtı ma‘rifet-i şer‘iyye ile ârifân Yusuf Bey b. Memi ve Abdurrahman Çelebi b. Musli şehâdetleriyle şer‘an [vekâleti] sâbit olan Abdünnebi Çelebi b. Resul meclis-i şer‘-i şerîf-i enverde işbu bâ‘iseyi’l-kitâb el-Hâc Mehmed ve Hüseyin Beşe b. Musa mahzarlarında bi’l-vekâle ikrâr ve takrîr-i kelâm edip müvekkile-i mezbûre Fâtıma [113b] Hâtun yedinde mülkü olup mahalle-i mezbûrede vâki‘ bir tarafdan Haydar Paşa odaları ve bir tarafdan gallesi imâma meşrûta vakıf menzil ve bir tarafdan mescid-i şerîf duvarı ve bir tarafdan tarîk-i âm ile mahdûd hâriciyye iki fevkānî ve bir tahtânî oda ve ahır ve su kuyusu ve kenîf ve dâhiliyyesi üç fevkānî ve dört tahtânî oda ve üç sofa ve bir matbah ve tahtapûş ve mahzen ve bi’r-i mâ ve kenîf ve bahçeyi müştemil mülk menzilini, bi cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî bey‘-i bâtt-ı kat‘î ile mezbûrân el-Hâc Mehmed ve Hüseyin Beşe’ye bin yüz kırk esedî guruşa bey‘ ve teslîm mezbûrân dahi iştirâk-i seviy üzre iştirâ ve tesellüm ve kabûl ettiklerinden sonra semeni olan meblağ-ı mezbûr bin kırk esedî guruşu müvekkile-i mezbûreye edâ ve teslîm ol dahi yedlerinden tamâmen ahz u kabz ve kabûl eyledi ba‘de’l-yevm menzil-i mezbûr müştereken merkūmânın mülk-i müşterâları olmuşdur müvekkile-i mezbûre bir vechile alâka ve medhali kalmamışdır keyfe mâ yahtârân mutasarrıfân olsunlar dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb ve imlâ olundu. Fi’l-yevmi’s-sânî aşer min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: Ahmed Efendi b. Mustafa, Abdullah Çelebi b. Mehmed, Âbid Çelebi b. Mustafa, Şaban b. Ramazan, Hüseyin Çelebi b. Osman, el-Hâc Mehmed b. Süleyman, el-Hâc Süleyman b. Ali, el-Hâc Ahmed b. Ali, Mehmed Çelebi b. Hüseyin, el-Hâc Ali b. Süleyman, Bekir Çelebi b. Osman, Yusuf Bey b. Abdi, Halil b. Mehmed.