Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 538 Hüküm no: 651 Orijinal metin no: [113b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Haseki Sultan hâssı mültezimlerinden Murtaza Bey b. Hacı İsmail’in hassa borcu olduğu Haseki Sultan hüccetidir. Sultânü’l-muhadderât burhânü’l-mu‘azzamât tâcü’l-mestûrât iklîletü’l-muhassenât aliyyetü’d-derecât safiyyetü’s-sıfât sa‘âdetlü Haseki Sultan -dâmet ismetühâ- hazretlerinin hâslarından Avanik hâssı cemâ‘atinden Hacılar ve tevâbi‘i cemâ‘ati ekrâdının hâlâ der-uhde beyleri olan Murtaza Bey b. el-Hâc İsmail ve cemâ‘at kethüdâlarından Mehmed Kethüdâ b. Mustafa, Cuma Kethüdâ b. İsfendiyar ve aşîret ihtiyârlarından Molla Yusuf b. el-Hâc Fîrûz ve Molla Abdüsselâm b. el-Hâc Bâli ve imâm Halil b. Hacı Mehmed ve Veli b. el-Hâc İsâ meclis-i şer‘-i şerîf-i enverde müşârün-ileyhâ hazretlerinin hâlâ kethüdâlığı hizmetinde şeref-yâb olan umdetü erbâbü’l-iz ve’l-ikbâl zübdetü ashâbü’l-câh ve’l-celâl izzetlü el-Hâc Hasan Efendi tarafından husûs-ı âti’l-beyâna sâbitü’l-vekâle vekîl olan işbu bâ‘isü’l-kitâb es-Seyyid Mehmed Ağa mahzarında her biri ikrâr-ı tâm ve takrîr-i kelâm edip müşârün-ileyhâ hazretlerinin mutasarrıfe oldukları mârrü’l-beyân Avanik hâssı bin doksan altı senesinde voyvoda ve müceddeden tahrîre me’mûr olan mezbûr es-Seyyid Mehmed Ağa ma‘rifetiyle tahrîr oldukda her senesi altı bin üç yüz altmış yedi buçuk esedî guruşa maktû‘ ve mezbûr Murtaza Bey’e der-uhde ve iltizâm olunmağın hâss-ı mezkûrûn işbu bin doksan yedi senesi malı olan altı bin üç yüz altmış yedi buçuk esedî guruş ve merkūm es-Seyyid Mehmed Ağa’nın iltizâmında olan doksan altı senesi malından bekāyâ kalan iki bin dört yüz elli guruş ve müvekkil-i mûmâ-ileyhden istidâne ve kabz eylediğim yüz otuz iki buçuk guruş ki min haysi’l-mecmû‘ sekiz bin dokuz yüz elli guruş hâlâ deynim olmağla meblağ-ı mecmû‘-ı mezkûru bi’t-tamâm getirip mûmâ-ileyhe teslîm etmek üzre ta‘ahhüd ve her birimiz âhara kefîl olduk dediklerinde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sânî aşer min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: Osman Ağa b. İshak, Mustafa Bey b. Ali, Yusuf Efendi b. ( ), Halil Ağa b. ( ), Mucurluoğlu? Osman Ağa.