Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 538 Hüküm no: 652 Orijinal metin no: [113b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimo v. Esteryo’nun ölen Pilaş v. Yorgaki’ye borcu olduğunu kabul ettiği İbrâ ve iskāt Mahmiye-i İstanbul’da Abdi Subaşı mahallesi sükkânından olup meydan kasablarından iken bundan akdem hâlik olan Pilaş v. Yorgaki’nin verâseti zevce-i metrûkesi Rabye bt. Nikola ile evlâd-ı sıgārı Panayot ve Tanaş ve Maryora ve Malamata’ya ve kebîre kızları Ezmerağda ve İsanine’ye münhasıra olduğu şer‘an zâhir ve müte‘ayyin oldukdan sonra yine mahmiye-i mezbûrede Langa’da Çakır Ağa mahallesi sükkânından Dimo v. Esteryo nâm zimmî meclis-i şer‘-i şerîf-i enverde sıgār-ı mezkûrûnun tesviye-i emirleri için kıbel-i şer‘den mansûbe vasîleri olan mezbûr Rabye ile mezkûretân Ezmerağda ve İsanine taraflarından husûs-ı âti’l-beyâna vekîl-i müseccelleri olan Avadik v. Haçador muvâcehesinde ikrâr-ı tâm ve takrîr-i kelâm edip hâlik-i mezbûr Pilaş ile hayâtında beynimizde nice ahz u i‘tâ ve mu‘âmelât-ı şettâ vâki‘ olup ba‘de helâkihî veresesi ile beynimizde hesâb gördüğümüzde ba‘de külli’l-hesâb iki yüz otuz esedî guruş mezbûrun zimmetinde lâzımü’l-edâ [ve] lâzımü’l-kazâ deynimdir dedikde gıbbe’t-tasdîki’ş-şer‘î mukırr-ı mezbûrun karındaşı Yani mâl-ı mezbûra emriyle kefîl oldukdan sonra yine kefîl-i mezbûr nefsine ve gaybet eder [ise] mâl-ı mezbûra Trandafilo v. Angeli zimmî kefîl olup mâ vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Mehmed b. İdris, Ali b. Bâli, Mustafa Çelebi b. Ahmed, İbrahim b. Ahmed.