Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 539 Hüküm no: 653 Orijinal metin no: [114a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bolu mütesellimi Ali Ağa’nın eski mütesellim üzerine açtığı alacak davasının meşrû olmadığı Mu‘ârazadan men‘ hüccetidir. Mahmiye-i İstanbul’da Lâlezâr mahallesi sükkânından olup bin doksan bir senesinde Bolu mütesellimi olan Ali Ağa b. ( ) meclis-i şer‘-i şerîf-i enverde Veli Ağa b. Ali mahzarında üzerine da‘vâ ve takrîr-i kelâm edip yine târih-i merkūmda Bolu mütesellimi olan gāib ani’l-meclis Fazlı Ağa nâm kimesne zikr olunan mütesellimlikden azl ve yerine ben mütesellim olup mezbûrun muhâsebesini gördüğümde benim tahvîl târihime mahsûb olmak üzre cürm-i cinâyet ve bâd-ı havâdan merkūm Fazlı Ağa’nın beş yüz guruş makbûzu olduğu zâhir olmağla meblağ-ı mezbûru merkūm Fazlı Ağa’dan taleb eylediğimde ol dahi mahmiye-i mezbûreye gelip Mahmud Ağa nâm kimesneye teslîme ta‘ahhüd ve meblağ-ı mezbûra mezbûr Veli Ağa kefîl olmuşdu hâlâ meblağ-ı mezbûru kefâletine binâen merkūm Veli Ağa’dan taleb ederim suâl olunsun dedikde müdde‘î-i mezbûrun takrîr-i meşrûhu üzre da‘vâsı meşrû‘ olmayıp lağv-ı mahz olmağla merkūm Veli Ağa’ya suâl dahi teveccüh etmeyip mezbûr Ali Ağa bî-vech mu‘ârazadan men‘ olunmağın mâ vaka‘a bi’t-taleb ketb olundu. Fi’l-yevmi’r-râbi‘ aşer min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: İbrahim Çelebi b. Ahmed, Mustafa Çelebi b. Ahmed, Mehmed b. Ahmed, Mehmed b. İdris.