İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 87 Hüküm no: 39 Orijinal metin no: [19-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halkın işlerine ait davalar uzatılmadan sonuçlandırılarak en geç bir haftada senetlerinin sahiplerine verilmesi Devâirde rü’yet olunan mesâlih-i ibâd için îcâb eden senedlerin verilmesi fermânı Devâir-i şer‘iyede rü’yet olunmakda olan bi’l-cümle mesâlih-i ibâdın mihver-i lâyıkında cereyân ettirilmesiyle beraber mu‘âmelât-ı müteferri‘asının vakt ü zamanıyla tesrî‘ ve tesviyesine ikdâm-ı tâm kılınması akdem-i makāsıd ve âmâl-i adâlet-iştimâl-i âlî olup binâberîn görülen da‘vâların iktizâ eden sened-i şer‘îsi müddet-i kalîle zarfında i‘tâ olunmak lâzımeden bulunduğu hâlde ba‘zan teehhürât vukū‘u rivâyet ve bundan dolayı arz-ı şikâyet kılınmakdadır. Ashâb-ı mesâlihin ekserîsi taşralı olduklarından bu sebeble müddet-i medîde hâne köşelerinde tahammül ve tâkat getirilemez derecelerde sefâlet ve zarûret çekerek mağdûr ve perîşân olmaları muvâfık-ı rızâ-yı âlî olmayacağı gibi bu sûret fî-nefsi’l-emr hamiyet ve vazîfe-i me’mûriyete dahi münâfî göründüğünden ba‘de ezîn kâffe-i devâir-i şer‘iyede rü’yet olan mesâlih-i ibâdın sür‘at-i tesviyesiyle hükm-i şer‘î lâhık oldukdan sonra iktizâ eden sened-i şer‘înin nihâyetü’n-nihâye bir haftaya kadar tanzîm ve temhîr kılınarak sahibine i‘tâ edilmesi ve te’hîre bâdî olur hâl ü hareketden be-gāyet tevakkī ve mücânebet kılınması husûslarına i‘tinâ ve dikkatle cânib-i seniyyü’l-cevânib-i hazret-i zıllullâhîye ashâb-ı mesâlih vesâire tarafından isticlâb-ı da‘avât-ı hayriyeye bezl-i mesâ‘î ve ihtimâm olunması ihtâr olunur ve buna nezâret-i sahîha ve kâmile icrâsı dahi devâir-i merkūme rüesâ-yı kirâmının himmet-i mahsûsalarına tevdî‘ kılınır. Fî 11 Ca sene [1]285.