İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 87 Hüküm no: 40 Orijinal metin no: [19-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İhtiyar muhacirlerden hürriyetlerini ispat edenlere verilen ilâm için harç alınmayıp sadece varaka bahası alınması 123 Taraf-ı âlî-i hazret-i Fetvâ-penâhîye Ma‘rûz-ı bende-i dîrîneleridir ki, Mehâkim-i şer‘iye idâreleri hakkında müesses bulunan nizâmnâmede aceze-i muhâcir yedinden hürriyetleri sâbit olanları verilen i‘lâmât harcına dâir sarâhat olmamasından dolayı ba‘zı mahallerden istifsâr-ı re’y olunmuş olup eğerçi muhâcirînden ısbât-ı hürriyet eyleyenlerden mezkûr nizâmnâmenin otuz dördüncü maddesine tevfîkan ale’l-ıtlâk yüz yirmi beşer guruş harc-ı i‘lâm alınmakda ise de efrâd-ı muhâcirîn zâten bî-vâye olarak saltanat-ı seniyyenin i‘ânât-ı mahsûsasıyla geçinmekde olduklarından bunlardan hürriyetleri sübût bulan acezenin harc-ı i‘lâm ahzı zımnında tazyîki şân-ı merâhim-unvân-ı pâdişâhîye muvâfık olamayacağına mebnî ba‘de ezîn ale’l-umûm aceze-i ahrâra i‘tâ olunacak vesâik-i şer‘iyeden resm alınmayarak yalnız varaka bahâsı ahzıyla iktifâ kılınması tensîb edilmiş ve keyfiyet bi’l-cümle vülât-ı ızâm hazerâtına iş‘âr ve madde-i mezkûreye zeyl olmak üzere kaleme aldırılan fıkra-i nizâmiyenin bir sûreti leffen tisyâr kılınmış olmağla îcâbının icrâsına himem-i aliyye-i Fetvâ-penâhîlerini derkâr buyurulmak bâbında emr ü irâde hazret-i men-lehu’l-emrindir. Fî 11 Cumâdelûlâ sene 1285 ve fî 13 Ağustos sene [12]84. Mehâkim-i şer‘iye nizâmnâmesinin otuz dördüncü maddesine zeyl: İsbât-ı hürriyet için acezeye verilecek hücec-i şer‘iyeden yalnız varaka bahâsı ahz olunur.