Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 540 Hüküm no: 654 Orijinal metin no: [114a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Çelebi b. İbrahim’in Halil b. Mustafa’da alacağı olduğu Edâya tenbîh Mahmiye-i İstanbul’da Sarıgez’de sâkin işbu bâ‘isü’l-kitâb Ali Çelebi b. İbrahim nâm kimesne meclis-i şer‘-i şerîf-i enverde yine mahalle-i mezbûreden Halil b. Mustafa nâm kimesne mahzarında üzerine da‘vâ ve takrîr-i kelâm edip mezbûr Halil zimmetinde cihet-i deyn-i şer‘îden yirmi üç guruş ile bir rub‘ guruş hakkım olup hâlâ mezbûr Halil ber vech-i muharrer zimmetinde bana ol mikdâr deyni olduğunu alâ ruûsi’l-işhâd ikrâr ve i‘tirâf dahi eyledikden sonra meblağ-ı mezbûrun dokuz buçuk guruşunu yedinden ahz u kabz edip üç esedî guruş ile bir rub‘ guruşa hakkım bâkī kalmışdır hâlâ suâl olunup meblağ-ı bâkī-i mezbûru dahi bana edâya merkūm Halil’e tenbîh olunmak matlûbumdur dedikde gıbbe’s-suâl ve akībe’l-inkâr, müdde‘î-i mezbûrdan müdde‘âsına beyyine taleb olundukda udûl-i müslimînden ve mahalle-i mezbûre sükkânından Mehmed Çelebi b. Hasan ve diğer Mehmed Çelebi b. Ali nâm kimesneler li ecli’ş-şehâde meclis-i şer‘a hâzırân olup isre’l-istişhâd fi’l-hakīka işbu merkūm Halil müdde‘î-i mezbûre Ali Çelebi’ye cihet-i deyn-i şer‘îden yirmi üç esedî guruş ve rub‘ guruş zimmetimde lâzımü’l-edâ [deynim] vardır deyû bizim huzûrumuzda mukaddemâ ikrâr ve bizi işhâd etmişidi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde gıbbe’t-ta‘dîl ve’t-tezkiyye şehâdetleri makbûle olmağın mûcebiyle meblağ-ı bâkī-i mezbûr on üç esedî guruş ile bir rub‘ guruşu müdde‘î-i mezbûra edâya merkūm Halil’e tenbîh birle mâ vaka‘a bi’t-taleb ketb olundu. Fi’l-yevmi’r-râbi‘ aşer min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: İbrahim Çelebi [b.] Ahmed, Mehmed b. İdris, Ali b. Bâli, Hasan b. Mehmed.