Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 540 Hüküm no: 655 Orijinal metin no: [114a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kesan bt. Mardiros’un menzilini Papa Hıdır v. Bedros’a satması Mülknâme Kâtib Kasım mahallesinde Mahmiye-i İstanbul’da Kâtib Kasım mahallesinde sâkine Kesan [bt.] Mardiros nâm nasrâniye meclis-i şer‘-i şerîf-i enverde işbu râfi‘ü’l-vesîka Papa Hıdır v. Bedros nâm Ermeni muvâcehesinde ikrâr ve takrîr-i kelâm edip mahalle-i mezbûrede vâki‘ bir tarafı Agop v. Yani mülkü ve bir tarafı semerci Kirkor mülkü ve bir tarafı Mustafa Paşa vakıfları ve bir tarafı tarîk-i âm ile mahdûd bir bâb fevkānî ve bir bâb tahtânî oda ve bodrum ve su kuyusu ve kenîfi müştemil mülk menzil zevcimin mülkü olup ba‘de helâkihî düyûn-ı kesîresi olup ve menzil-i mezkûrdan gayrı ism-i mâl ıtlâk olunur şeyi olmayıp bi’l-izni’ş-şer‘î bey‘ ve semeni ile edâ-i deyn olundukdan sonra tedâvül-i eyâdî ile ben iştirâ ve temellük etmekle hâlâ menzil-i mezbûru bi cümleti’t-tevâbi‘ mezbûr Papa Hıdır’a üç yüz on esedî guruşa bâtten bey‘ ve temlîk ve teslîm ol dahi iştirâ ve kabûl ve temellük ve tesellüm eyledikden sonra kabz-ı semen-i mezkûr eyledim ba‘de’l-yevm menzil-i mezkûr mülk-i müşterâsıdır keyfe mâ yeşâ mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis aşer min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: Seyyid Mehmed Efendi b. Halil Efendi, Yusuf Efendi b. Veliyyüddin, Musa Efendi b. Hasan el-Müderris, İbrahim Halîfe b. Mehmed, Ali Çelebi b. Mehmed, Hasan Çelebi b. Musa, Laçinoğlu Mosi, Merkon v. Bedros, Toma v. Murad, Minas v. ( ), Mıgırdiç v. Kirkor.