Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 541 Hüküm no: 656 Orijinal metin no: [114b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Salih b. Mustafa’nın alacaklı olduğu Mehmed b. Ömer ile sulh olduğu İbrâ ve iskāt hüccetidir. Mahmiye-i İstanbul’da Hocapaşa mahallesinde sâkin Sâlih b. Mustafa nâm kimesne meclis-i şer‘-i şerîf-i enverde Mehmed b. Ömer nâm tabîb tarafından husûs-ı âti’l-beyâna vekîl-i müsecceli olan Hasan Efendi b. Mehmed mahzarında ikrâr ve takrîr-i kelâm edip müvekkil-i mezbûr Mehmed zimmetinde cihet-i deyn-i şer‘îden kırk esedî guruş hakkım olup meblağ-ı mezbûru merkūm Mehmed’den taleb ve da‘vâ eylediğimde ol dahi inkâr ettiğinden mâ‘adâ benim sende bir altın bilezik ve bir sîm kılıç vardır deyû da‘vâ sadedinde olmuşdu el-hâletü hâzihî muslihûn tavassut edip da‘vâ-yı mezkûrumdan bin beş yüz akçe üzerine mezbûr Hasan Efendi benimle sulh olup ben dahi [sulh-i] mezbûru kabûl ve bedel-i sulh olan meblağ-ı mezbûr bin beş yüz akçeyi vekîl-i merkūm yedinden tamâmen ahz u kabz eylediğimden sonra meblağ-ı bâkīden ben müvekkil-i mezbûr Mehmed’in zimmetini ibrâ ve iskāt edip vekîl-i mezbûr dahi zikr olunan bilezik ve kılıç da‘vâsından benim zimmetimi ibrâ ve iskāt eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâdis aşer min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: Mehmed Çelebi b. ( ), el-Hâc Osman b. ( ), helvacı Mehmed, es-Seyyid Mehmed Çelebi, İsmail Çelebi.