İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 105 Hüküm no: 70 Orijinal metin no: [34M-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İzmid demiryolu eshamından emvâl-i eytâmın da faydalanması Bu dahi Sâye-i teshîlât-vâye-i hazret-i şehin-şâhîde inşâsına mübâşeret olunmuş olan İzmid demiryolu için küşâd olunan eshâm-ı cedîdeden îrâd alanlar intifâ‘ edeceği misillü taraf-ı vâlâ-yı Meşîhat-penâhîden iş‘âr buyrulduğu vechile emvâl-i eytâma dahi verilecekdir. Şu kadar ki eytâm akçesine sehim <> verildiği hâlde bir yetîm sabî ısbât-ı rüşdünde sehimin mu‘accelesine derstres olmak lâzım gelince hakk-ı eytâma ri‘âyeten hîn-i sabâvetinde bir yetîme verilmiş olan sehimin yetîm-i râşidin talebiyle mu‘accelesi Hâzîne-i celîleden îfâ olunmak ve yetîm-i sabînin vefâtıyla nukūdunun mirasa idhâli takdîrinde hükm-i şer‘î ile kezâlik sehim-i mu‘âccelesi Hazîne-i Mâliye’den nakd edilmek imtiyâzâtı hakkında eytâm hakkında münhasıran câiz ve mer‘î olacakdır. Bir de Dersa‘âdet ve memâlik-i mahrûse-i şâhânede hayrât ve meberrât için nukūd tahsîsine arzu-keş adamlar olacağından ve bu yolda vakfedilen paralar ekseriyâ şunun bunun ellerinde telef ve zâyi‘ olmakda idiğinden hayrât için nukūd irbâh ve tahsîs edenlere istenilir ise eshâm i‘tâ olunacakdır. Fakat bunların mahlûlü olmayacakdır ve buna mukābil olmak üzere eshâmın beş yüz guruş on beşer senelik i‘tibârıyla verilecekdir.