Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 51 Hüküm no: 36 Orijinal metin no: [7b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Göç amacıyla İstanbul’a geliş gidişlerin kontrol altında tutulması
Üsküdar kadısı -zîdet fezâiluhû- ve mefâhirü’l-kuzât ve’l-hükkâm ma‘denü’l-fezâil ve’l-hükkâm Gekbûze ve Karamürsel ve Pazarköy ve Yalakâbâd ve Gemlik ve Mudanya ve Taşköprü ve sâir ol havâlîde olan kuzât ve nüvvâb -zîde fazluhum- ve mefâhirü’l-emâsil ve’l-akrân zikr olunan kazâların serdârları ve mukāta‘ât ve evkāf zâbitleri ve sâir zâbitânım ve iskele emînleri ve a‘yân-ı vilâyet -zîde kadruhüm- tevkī‘-i refî‘-i hümâyûn vâsıl olıcak ma‘lûm ola ki taşradan Âsitâne-i aliyyeme ev göçü gelmemek ve sahîh erbâb-ı mesâlihden olanlar ile erbâb-ı ticâretden olanlardan mâ‘adâsının bir tarîkle bu tarafa salıverilmeyüp i‘âdelerine ihtimâm ve dikkat eylemeniz içün her bâr evâmir-i aliyyemle tenbîh-i ekîd olunmakda iken adem-i ihtimâm ve iğmâzlardan nâşî bu esnâda ba‘zan ev göçü ve ba‘zan bilâ-maslahat ve serserî makūlesi ve da‘vâcı nâmıyla cem‘iyyet ile meçhûlü’l-ahvâl kimesneler Âsitâne-i aliyyeme gelüp ibâdullahı bîhûde mezâhim-i müzâyakalarına bâ‘is olundukların re’yü’l-ayn müşâhede olunmakdan nâşî ceste ceste ahz ve kayıklara vaz‘ ve semtli ve semtlince mahâllerine i‘âde ve sevk ü tesyîr olunup lâkin ma‘ber ü meberlerine gereği gibi tenbîh lâzım gelenlere tenbîh-i te’kîd ve ekîd ve dönmeyenleri isim [ü] resmiyle i‘lâm eyleyesiz ve’s-selâm.
Tahrîren fî-evâsıtı Muharrem sene seb‘a ve seb‘în ve mi’ete ve elf.
El-Mahrûse İslambol
|