Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 542 Hüküm no: 657 Orijinal metin no: [114b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi v. Franko’nun borcuna karşılık evini 37. Yeniçeri Odası Vakfı’na bey‘ bi’l-istiğlâl yoluyla sattığı İstiğlâl hüccetidir. Mahrûse-i Galata müzâfâtından Kasımpaşa’da Tatavla nâm mahalde sâkin Yorgi v. Franko nâm zimmî meclis-i şer‘-i şerîfde Dergâh-ı âlî yeniçerilerinin otuz yedinci ağa bölüğüne mahsûs oda ahâlîsinin düzenleri için mevkūfe nukūda bi’l-fi‘l mütevellî olan işbu bâ‘isü’l-kitâb umdetü’l-eşbâh Sinan Paşazâde Mehmed Bey tarafından husûs-ı âti’l-beyâna vekîl olan Mehmed Hoca b. İbrahim mahzarında ikrâr-ı tâm ve takrîr-i kelâm edip mütevellî-i mûmâ-ileyh mütevellîsi olduğu mâl-ı vakf-ı mezbûrdan bana iki yüz on esedî guruş idâne ve teslîm ben dahi istidâne ve kabz eyledim meblağ-ı mezbûr zimmetimde lâzımü’l-edâ deynimdir dedikde gıbbe’t-tasdîki’ş-şer‘î mezbûr Yorgi ile zevcesi olup ta‘rîf-i şer‘î ile mu‘arrefe olan Cevherye bt. Yanaki nâm nasrâniye meclis-i şer‘-i şerîfde vekîl-i mezbûr muvâcehesinde takrîr-i kelâm edip ale’l-iştirâki’s-seviy silk-i mülkümüzde münselik olup mahalle-i mezbûrede vâki‘ bir tarafı Safro nâm zimmî mülkü ve bir tarafı Malamata nâm nasrâniye mülkü ve bir tarafı Dimitri mülkü ve bir tarafı tarîk-i âm ile mahdûd bir bâb fevkānî oda ve bir sofa ve tahtânî bir oda ve bir mahzen ve kenîf ve bahçeyi müştemil mülk menzilimizi ve yine mahrûse-i mezbûre hâricinde ma‘lûmü’l-hudûd bir kıt‘a bahçemizin mütevellî-i mezkûra iki yüz on guruşa safka-i vâhide ile bi tarîki’l-istiğlâl bey‘ ve teslîm ol dahi iştirâ ve tesellüm eyledikden sonra semenleri olan meblağ-ı mezbûru deyn-i merkūma takās, ol dahi mukāssa ve kabûl eyledikden sonra yine mütevellî-i mezbûr menzil ve bahçeyi ba‘de’t-tahliyye târih-i kitâbdan bir sene tamâmına değin yine otuz bir guruşa îcâr ve teslîm ve biz dahi istîcâr ve kabûl ve meblağ-ı mezbûr ile ücret-i mezkûreden her birimiz âharın zimmetine lâzım gelen meblağa emr ve kabûlü hâviye kefâlet-i sahîha ile kefîl olduk dediklerinde gıbbe’t-tasdîk mezbûre Cevherye’nin vâlidesi Kanila bt. Yamandi ve Edirnekapısı kurbunda sâkin İsayi v. Kirkor ve Sulu Manastır’da sâkin Agop v. Bedros ve Frenk v. Yani asl-ı mâl-ı mezbûr ve ücret-i mezkûreye her birisi emr ve kabûlü hâviye kefâlet-i sahîha-i şer‘iyye ile kefîl olmağın mâ vaka‘a bi’t-taleb ketb olundu. Fi’s-sâlis aşer min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: Veli Efendi, Mehmed b. İbrahim, İbrahim Çelebi b. Ahmed, Mustafa Çelebi b. Ahmed.