Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 543 Hüküm no: 658 Orijinal metin no: [114b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Musli Ahmed Çelebi b. Ases’in Hacı İsmail Ağa’ya borcunu kabul etmesi Musli Ahmed Çelebi el-Hâc İsmail zimmetini ibrâ. Tüccârdan olup mahmiye-i İstanbul’da Vezir handa sâkin Musli Ahmed Çelebi b. Ases nâm kimesne meclis-i şer‘-i şerîf-i enverde ve mahfil-i dîn-i münîf-i ezherde bâ‘isü hâze’l-kitâb el-Hâc İsmail Ağa el-Umrî nâm kimesne mahzarında ikrâr-ı tâm ve takrîr-i kelâm edip mezbûr el-Hâc İsmail Ağa’ya cihet-i karz-ı şer‘îden bin elli guruş deyni târih-i kitâbdan yüz seksen gün tamâmına değin müeccel olmak üzre yedinden iştirâ ve kabz eylediğim beynimizde ma‘lûm Hind metâ‘ı bahâsından dahi bin guruş ki cem‘an iki bin elli esedî guruş mezbûr el-Hâc İsmail Ağa’ya zimmetimde vâcibü’l-edâ deynimdir dedikde gıbbe’t-tasdîki’ş-şer‘î mezbûr Ahmed Çelebi meclis-i şer‘de ikrâr ve takrîr-i kelâm edip mezbûr el-Hâc İsmail Ağa’nın yedinde olan hüccet nâtıka olduğu üzre beynimizde cereyân eden târih-i kitâba gelince mu‘âmelât-ı şettâ ve hukūk-ı ma‘lûme ve mechûleye ve ahz u kabza ve i‘tâya müte‘allika cemî‘ de‘âvîden ve eymân ve mütâlebâtdan mezbûr el-Hâc İsmail Ağa’nın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde gıbbe’t-tahkīki’ş-şer‘î mâ vaka‘a bi’t-taleb ketb olundu. Fi’l-yevmi’s-sâdis aşer min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: Es-Seyyid Abdülkerim Çelebi, es-Seyyid Selahaddin Çelebi, el-Hâc Şâhin Ağa b. Abdullah, Ramazan Çelebi, Bayram Çelebi, es-Seyyid Ebülbeşir, Yahya Çavuş Musulî, es-Seyyid Mahmud Çelebi, el-Hâc Ahmed es-Seyyâh?, Yusuf Efendi b. Hüseyin Efendi, el-Hâc Abdurrahman eş-şehîr? Diyârbekrî, Mustafa Çelebi b. ( ), İbrahim Çelebi Erdebilîzâde, el-Hâc Abdülvehhâb, el-Hâc Bekir Harputlu, el-Hâc Osman Harputlu, el-Hâc Mansur Musulî, Sâlih Çelebi b. el-Hâc Yasin, es-Seyyid Ahmed eş-Şâ­mî Şeyhü’l-Harâm, [115a] Hasan b. Veysî, Mustafa Bâzirgânbaşı Diyârbekrî.